بۇگىن نۇر-Cۇلتان قالاسىندا حالىقارالىق تۇركى اكادەمياسىنىڭ ۇيىمداستىرۋىمەن «تۇركى ەلدەرىندەگى باق. جاڭا جاعدايداعى ىنتىماقتاستىقتىڭ دامۋى» اتتى دوڭگەلەك ۇستەل ءوتتى، دەپ حابارلايدى "ادىرنا" ۇلتتىق پورتالى.
اتالعان باسقوسۋ حVII ەۋرازيالىق مەديافورۋمى اياسىندا تۇڭعىش رەت ءوتىپ وتىر.
القالى جيىنعا تۇركى تىلدەس ەلدەردىڭ، سونداي-اق، ماجارستان مەن تاجىكستاننان تانىمال مەديا-مەنەدجەرلەرى، اتاپ ايتقاندا، ازەربايجان پرەزيدەنتىنىڭ بۇرىنعى ءباسپاسوز حاتشىسى، تەلەجۇرگىزۋشى توفيگ ابباسوۆ، تۇركيانىڭ NTV ارناسىنىڭ سىرتقى جاڭالىقتار قىزمەتىنىڭ مەنەدجەرى احمەت يەشيلتەپە، ماجارستاننىڭ «دۋنا» تەلەكومپانياسىنىڭ ديرەكتورى پالففي يشتۆان، حالىقارالىق تۇركى اكادەمياسىنىڭ ۆيتسە-پرەزيدەنتى فيزۋلي مادجيدلي، تۇرىكمەنستان مەملەكەتتىك اقپارات اگەنتتىگىنىڭ باس ديرەكتورىنىڭ ورىنباسارى سياحەمۋراد كاكىشەۆ، تاجىكستاننىڭ «اۆەستا» اقپاراتتىق اگەنتتىگىنىڭ باس رەداكتورى دجانوتحان كۋربانوۆا، قازاقستان جۋرناليستەر وداعى سىيلىعىنىڭ لاۋرەاتى ءلاززات تانىسباي، سونىمەن قاتار بەلگىلى باق وكىلدەرى مەن ساراپشىلار قاتىستى.
دوڭگەلەك ۇستەل وتىرىسىن قازاقستاندىق مەديا سالاسىنداعى تانىمال جۋرناليست سايات جوكەن جۇرگىزىپ وتىردى.
باسقوسۋ بارىسىندا باق وكىلدەرى تۇركىتىلدەس ەلدەردىڭ ماسس-مەديا سالاسىنداعى تانىمال تۇلعالارمەن تىلدەسۋگە مۇمكىندىك الدى. اتالعان ەلدەردىڭ ۇزدىك مەديا مەنەدجەرلەرى قازاقستاندىق ارىپتەستەرىمەن قازىرگىدەي اقپارات تاراتۋدىڭ وزەكتىلىگى جاعدايىندا جۇمىس ىستەۋ تاجىريبەلەرىمەن ءبولىستى.
حالىقارالىق تۇركى اكادەمياسىنىڭ ۆيتسە-پرەزيدەنتى فيزۋلي مادجيدلي دوڭگەلەك ۇستەلدە سويلەگەن سوزىندە: «وسىدان 140 جىل بۇرىن، 1883 جىلى ۇلى ويشىل ءارى پۋبليتسيست يسمايل بەي گاسپىرالى «تىلدە، ويدا، ىستە بىرلىك» ۇرانىمەن «تەردجۋمان» گازەتىن شىعارا باستادى. قارىم-قاتىناس جاساۋ قيىن جىلدارى تۇركى الەمىنە تاراپ كەتكەن گازەت بىرىڭعاي اقپاراتتىق كەڭىستىك قۇرۋ جونىندەگى العاشقى باستاما بولدى.
بۇگىنگى تاڭدا ءبىزدىڭ مەملەكەتتەرىمىزدە ينتەگراتسيالىق پروتسەسس ءۇشىن كوپ نارسە جۇزەگە اسىرىلدى. ءبىزدىڭ حالىقتارىمىزدىڭ ورتاق تاريحىمىزعا نەگىزدەلگەن جارقىن بولاشاقتى قۇرۋعا ۇمتىلىسى بار.
قازاقستاندا وتكىزىلىپ جاتقان ەۋرازيالىق مەديا-فورۋم كوپتەگەن جىلدار بويى ماڭىزدى جاھاندىق الاڭ بولعاندىعى سونىڭ ايقىن مىسالى. بۇل پلاتفورما وتە پايدالى جانە ونى ينتەگراتسيا ماقساتىندا پايدالانۋ كەرەك.
جوعارىدا ايتىپ وتكەنىمدەي، تۇركى اكادەمياسىنىڭ نەگىزگى باعىتى تۇركى مەملەكەتتەرى مەن حالىقتارىنىڭ ورتاق مۇراسىن زەرتتەۋگە جانە ناسيحاتتاۋعا باعىتتالعان. وسى ماقساتتا ىرگەلى عىلىمي ەڭبەكتەر، سوزدىكتەر، عىلىمي-مادەني جانە گەوگرافيالىق اتلاستار جارىق كوردى. «اتالار ميراسى» ەلەكتروندىق پورتالى قۇرىلدى. تۇركى ەلدەرىندە الەۋمەتتىك ساۋالناما جۇرگىزەتىن «تۇركبارومەتر» جوباسى جۇزەگە اسىرۋدا. اكادەميا ءارتۇرلى عىلىمي جانە ارحەولوگيالىق ەكسپەديتسيالار ۇيىمداستىرىپ كەلەدى. تۇركى اكادەمياسىنىڭ رەسمي سايتى، Telegram ارناسى جانە الەۋمەتتىك جەلىلەردەگى بارلىق رەسمي اككاۋنتتار دا وسى ماقساتقا قىزمەت ەتەدى.
سونىمەن قاتار، عىلىمي ۇيىمدار، ۋنيۆەرسيتەتتەر جانە ساراپتاۋ ورتالىقتارى اراسىنداعى قاتىناستاردى ودان ءارى نىعايتۋ ءۇشىن مۇمكىندىكتەر بار. مۇنىڭ ءبارى ەلدەرىمىزدىڭ اقپاراتتىق ساياساتىنا قىزمەت ەتەتىن ماڭىزدى باعىتتار» ̶ دەدى.
قاتىسۋشىلاردىڭ پايىمدى پىكىرلەرى مەن ورامدى ويلارى جانە تەرەڭ ساراپتامالىق تالداۋلار كوپتەن كۇتكەن ەۋرازيا مەديافورۋمىنىڭ ماڭىزىن ارتتىرا ءتۇستى.
ايتا كەتۋ كەرەك، فورۋمنىڭ تاقىرىپتارى گەوساياسات، تەحنولوگيا، ەتيكالىق ستاندارتتار سالاسىندا سوڭعى جىلدارى دامىعان جاھاندىق وزگەرىستەر مەن تەندەنتسيالاردى قامتىدى.
"ادىرنا" ۇلتتىق پورتالى
