نۇر-سۇلتاندا كوتتەدج جالداپ، حەللوۋين تويلاماق بولعان جاستار جاۋاپقا تارتىلدى، دەپ حابارلايدى "ادىرنا" ۇلتتىق پورتالى نۇر-سۇلتان قالالىق پوليتسيا دەپارتامەنتىنە سىلتەمە جاساپ.
جاستار قازىرگى شەكتەۋلەردى ۇمىتىپ، ميفتىك كەيىپكەرلەر ستيلىندە گريم جاساپ، كوڭىل كوتەرگەن. كورشىلەردىڭ مازاسىن العاندىقتان، تۇندە پوليتسياعا شاعىم تۇسكەن. وقيعا ورنىنا پوليتسيا قىزمەتكەرلەرى بارعان. تىنىشتىقتى بۇزعانى ءۇشىن پوليتسياعا 26 ادام جەتكىزىلدى. ولاردىڭ ىشىندە كامەلەتكە تولماعان 8 ءجاسوسپىرىم بار.
پوليتسيا دەپارتامەنتىنىڭ مالىمەتىندە: «يۋۆەنالدىق پوليتسيانىڭ ۋچاسكەلىك ينسپەكتورلارى كامەلەتكە تولماعانداردىڭ تۇنگى ۋاقىتتا ۇيىندە بولماعانى ءۇشىن ولاردىڭ زاڭدى وكىلدەرىن قر اكىمشىلىك قۇقىقبۇزۋشىلىقتار تۋرالى كودەكسىنىڭ 442-بابى 2-بولىگى بويىنشا اكىمشىلىك جاۋاپقا تارتتى. بالالارمەن پروفيلاكتيكالىق اڭگىمە جۇرگىزىلدى.
18 ادامعا قاتىستى ۋچاسكەلىك ينسپەكتورلار قر اقبتك 437-بابى بويىنشا حاتتاما تولتىرىپ، 5 اەك مولشەرىندە ايىپپۇل سالدى. ودان بولەك، كوتتەدجدى جالعا بەرگەن ادامعا قاتىستى ماتەريال كارانتيندىك شارالاردى بۇزعانى ءۇشىن جاۋاپقا تارتۋ ماقساتىندا نۇر-سۇلتان قالاسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جىبەرىلدى. ءموبيلدى توپ ءبىر تاۋلىك ىشىندە 344 كاسىپكەرلىك نىسانىن تەكسەرىپ، 41 رەت كارانتين رەجيمى بۇزىلعانىن انىقتادى", -دەلىنگەن.
نۇر-سۇلتان قالاسىنىڭ پوليتسيا دەپارتامەنتى تۇرعىندارعا جانە ويىن-ساۋىق مەكەمەلەرىنىڭ يەلەرىنە كارانتين رەجيمى جالعاسىپ جاتقانىن جانە باس سانيتارلىق دارىگەر قاۋلىسىنىڭ تالاپتارىن ساقتاۋ كەرەكتىگىن ەسكەرتەدى.
سۋرەت: tupa-germania.ru سايتىنان
