اتىراۋ وبلىسىنىڭ اكىمى ماحامبەت دوسمۇحامبەتوۆتىڭ توراعالىعىمەن وتكەن جيىندا ازىق-تۇلىك باعاسىن تۇراقتاندىرۋ جانە كۇزگى جيىن-تەرىم ماسەلەلەرى قارالدى.
وتىرىستا اۋىل شارۋاشىلىعى باسقارماسىنىڭ باسشىسى امانگەلدى سالامات اپتا سايىن الەۋمەتتىك ماڭىزى بار ازىق-تۇلىك تاۋارلارى باعالارىنا جانە قورىنا مونيتورينگ جۇرگىزىلۋدە ەكەنىن ايتىپ ءوتتى. سونىڭ ىشىندە، نان باعاسىنا دا توقتالدى.
«الەۋمەتتىك نان جانە 1-سۇرىپتى ۇن باعاسىن تۇراقتى ۇستاۋ باعىتىنداعى ءۇش جاقتى مەموراندۋمعا سايكەس، وڭىرىمىزگە بولىنگەن 16000 توننا بيدايدىڭ، وبلىسقا ۇن تارتۋ مەكەمەسى "كارات" جاۋاپكەرشىلىگى شەكتەۋلى سەرىكتەستىگى ارقىلى 10000 تونناسى تاسىمالداندى. مەموراندۋم نەگىزىندە الەۋمەتتىك نان باعاسى 90 تەڭگە، 1-سۇرىپتى ۇن باعاسى 145 تەڭگەدەن ساتىلۋدا»،-دەدى ول.
سونداي-اق، جەرگىلىكتى اۋىلشارۋاشىلىعى تاۋار وندىرۋشىلەرگە وزدەرىنىڭ ونىمدەرىن حالىققا قول جەتىمدى باعامەن ۇسىنۋى ماقساتىندا 227 تەگىن ساۋدا نۇكتەلەرى بەرىلگەنى دە ايتىلدى.
ا.سالاماتتىڭ سوزىنشە، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتى ۇستاۋ ماقساتىندا كۇنى بۇگىنگە دەيىن كاسىپكەرلەر، تاۋار وندىرۋشىلەر جانە ءىرى ساۋدا ورىندارى اراسىندا 207 مەموراندۋم جاساقتالعان.
سونىمەن قاتار، جيىندا وبلىستاعى كۇزگى جيىن-تەرىم ماسەلەسى دە قوزعالدى. اۋىلشارۋاشىلىعى باسقارماسى باسشىسىنىڭ مالىمەتىنشە، وبلىس بويىنشا بيىل ەگىستىكتىڭ جالپى كولەمى 9 469 گەكتاردى قۇراسا، قازىرگى كەزدە بارلىعى 6 292 گەكتار ەگىن القاپتارى جينالىپ، جالپى جۇمىستىڭ 66,4% ورىندالعان.
جيىن سوڭىندا ايماق باسشىسى ماحامبەت دوسمۇحامبەتوۆ اپتا سايىن وتەتىن ازىق-تۇلىك جارمەنكەلەرىنىڭ سانىن ارتتىرۋ ارقىلى حالىققا ۇسىنىلاتىن الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ قاجەتتىگىن ەسكەرتتى. سونداي-اق، كۇزگى ەگىن جيناۋ جۇمىستارىن مەرزىمىندە اياقتاۋدى تاپسىردى.
ايتا كەتەيىك، ءونىم جيناۋ جۇمىستارى قازان ايىنىڭ اياعىنا دەيىن جالعاسپاق.
