قۋدالاۋعا ۇشىراپ، قامالعان تۋىستارىن بوساتۋدى تالاپ ەتكەن ءبىر توپ تۇرعىن نۇر-سۇلتانداعى قىتاي ەلشىلىگىنە باردى. ولار شىڭجاڭدا قالعان جاقىندارىنىڭ نەگىزسىز ايىپتالىپ جاتقانىن ايتىپ، كورشى ەلدىڭ قازاقستانداعى ەلشىسى چجان سياومەن تىلدەسپەك بولدى. بىراق ەلشىلىكتىڭ ىشىنە كىرە المادى. ايتۋلارىنشا، قىتاي بيلىگى قازاقستان ازاماتتارىن زاڭسىز ۇستاپ، قاماعان. ەندى ولار تەز ارادا كورشى ەل تاراپى جاۋاپ بەرسىن، بولماسا ەلشىلىك الدىندا قونىپ، اشتىق جاريالايمىز دەپ وتىر. بۇل تۋرالى “ادىرنا” ۇلتتىق پورتالى “ينفورمبيۋرو” جاڭالىقتار باعدارلاماسىنا سىلتەمە جاساپ حابارلايدى.
گۇلباران بەس جىلدان بەرى قىتايدىڭ تۇزەۋ مەكەمەلەرىنە قامالعان تۋىستارىن بوساتۋدى تالاپ ەتىپ ءجۇر. ايتۋىنشا، كورشى ەل بيلىگى ىنىسىنە جازىقسىز جالا جاۋىپ، قاماپ قويعان. ول شىڭجاڭدىقتاردىڭ باسىم بولىگى ءدىني ۇستامىنا بايلانىستى قىسىم كورىپ جاتىر دەيدى.
“ەكى اي ناماز ۇيرەنگەنى ءۇشىن قاماپ تاستاعان. ءبىر اۋىلدىڭ مولداسىن ۇستاپ، سول مولدانى ۇرىپ-سوعىپ مويىنداتىپ، مەنىڭ بالام باستاعان ءبىر توپ بالا جازىقسىز سوتتالىپ وتىر. باۋىرىمنىڭ جالعىز بالاسى. باۋىرىم اۋرۋشاڭ بولدى. ول جەردە ارىزدانۋعا قۇقىعىڭ جوق”، – دەيدى الماتى قالاسىنىڭ تۇرعىنى گۇلباران ءومىرالى.
قىتاي ەلشىلىگىنە كەلگەن اشۋلى توپ قولدارىنا "جازىقسىز جازالاندى" دەگەن تۋىستارىنىڭ سۋرەتتەرىن ۇستاپ تۇردى. ولار كورشى ەلدىڭ قازاقستانداعى ەلشىسى چجان سياومەن تىلدەسپەك بولدى. بىراق جينالعان ەلدىڭ ارىزىن تىڭداۋعا بىردە-ءبىر شەنەۋنىك شىققان جوق. پوليتسەيلەر دە "ەلشىلىكتىڭ جاڭا عيماراتىندا ەشكىم جوق" دەدى. ال سىرتقى ىستەر مينيسترلىگىنىڭ وكىلى بولات سىرلىباەۆ جينالعانداردىڭ تالاپتارى تۋرالى بىلەتىنىن ايتتى.
“بۇل كىسىلەردىڭ تالابىن بىلەمىز. ءبىز بۇل ماسەلەمەن اينالىسىپ جاتىرمىز. بىرنەشە جىل بولدى. بۇل كىسىلەردىڭ كوبىسىن ءوزىمىز قابىلداعانبىز. سوندىقتان قازىر ءبىز بارايىق، قۇجاتتارىن كوتەرىپ قارايىق، ارىزدارىن الايىق تاعى دا”، – دەيدى قر ءسىم كونسۋلدىق قىزمەت دەپارتامەنتىنىڭ باسقارما باسشىسى بولات سىرلىباەۆ.
تالابىن ايتۋعا كەلگەندەر شەنەۋنىكتەر ماردىمدى جاۋاپ بەرمەسە، ەلشىلىك الدىندا قونامىز دەدى. سەبەبى جەتى ايدان بەرى الماتى قالاسىنداعى كونسۋلدىق الدىندا ىشكى نارازىلىقتارىن ءبىلدىرىپ، اشتىق جاريالاپ شارشاپتى. سوندىقتان باس قالاعا كەلىپ، تالاپتى ەلشىنىڭ وزىنە ايتۋدى ۇيعارعان.
”ادىرنا” ۇلتتىق پورتالى
