اتىراۋ وبلىسىنىڭ اكىمى، «Nur Otan» پارتياسى اتىراۋ وبلىستىق فيليالىنىڭ توراعاسى ماحامبەت دوسمۇحامبەتوۆتىڭ جەتەكشىلىگىمەن ساياسي كەڭەس بيۋروسىنىڭ جانە اتىراۋ وبلىستىق ماسليحاتىنداعى «Nur Otan» پارتياسى دەپۋتاتتىق فراكتسياسىنىڭ بىرلەسكەن ءماجىلىسى ءوتتى.
كۇن تارتىبىندە «Nur Otan» پارتياسىنىڭ سايلاۋالدى باعدارلاماسىن ىسكە اسىرۋ جونىندەگى «جول كارتاسىنىڭ» ورىندالىسى جانە اتىراۋ وبلىسىندا ينكليۋزيۆتى ءبىلىم بەرۋدى دامىتۋ ماسەلەلەرى تالقىلاندى.
پارتيانىڭ 2021-2025 جىلدارعا ارنالعان سايلاۋالدى باعدارلاماسىن ىسكە اسىرۋ جونىندەگى «جول كارتاسىنىڭ» ورىندالىسى تۋرالى اتىراۋ وبلىسى اكىمىنىڭ ورىنباسارى ناريمان تاۋشوۆ باياندادى.
«وبلىستىڭ جول كارتاسىندا 7 باسىم باعىت بويىنشا 128 ءىس-شارا جوسپارلانعان. اتالعان ءىس-شارالاردىڭ 34,7%-ى «الەۋمەتتىك قىزمەتكە باعدارلانعان ايماق»، 26,6%-ى «ەكونوميكالىق تۇراقتى ايماق»، 15,3%-ى «جايلى ايماق» باعىتىنا تيەسىلى. قالعان 23,4%-ىن باسقا باعىتتار قۇراپ وتىر. وسى نەگىزدە اعىمداعى جىلى اتىراۋ قالاسىندا 560 ورىندىق 2 بالاباقشانىڭ قۇرىلىسى اياقتالىپ، پايدالانۋعا بەرىلدى. سونداي-اق، اتىراۋ قالاسىندا 2610 ورىندىق 9 بالاباقشالاردىڭ قۇرىلىسى مەملەكەتتىك-جەكەشەلىك ارىپتەستىك اياسىندا جۇرگىزىلۋدە. جىل اياعىنا دەيىن 4 بالاباقشا قۇرىلىسى اياقتالادى»،-دەگەن ن.تاۋشوۆ، جول كارتاسىنداعى كەيبىر شارالاردىڭ ورىندالماي قالۋ قاۋپى دە بار ەكەنىنە نازار اۋداردى.
جيىندا ينكليۋزيۆتى ءبىلىم بەرۋدى دامىتۋ باعىتىندا اتقارىلىپ جاتقان جۇمىستار تۋرالى اتىراۋ وبلىسى ءبىلىم بەرۋ باسقارماسىنىڭ باسشىسى ساتقان ەسەنعاليەۆ اقپارات بەردى.
«وبلىستىڭ 159 مەكتەبىندە ينكليۋزيۆتى بىلىممەن 1040 ەرەكشە ءبىلىمدى قاجەت ەتەتىن وقۋشىنىڭ دامۋ دەڭگەيى مەن جاس ەرەكشەلىگى ەسكەرىلىپ، ءبىلىم بەرىلۋدە. بارلىق ءبىلىم بەرۋ ۇيىمدارىندا بالالاردى ينكليۋزيۆتىك بىلىممەن قامتۋ ءۇشىن مەكتەپتەردى ارنايى جابدىقتاۋ جۇمىستارى جۇرگىزىلۋدە. بۇگىنگى تاڭدا ينكليۋزيۆتى ءبىلىم بەرۋدى قولداۋ باعىتىندا اۋتيستىك سپەكترى بۇزىلعان بالالار ءۇشىن قوعامدىق قورلاردىڭ باستاماسىمەن 6 مەكتەپتە ينكليۋزيانى قولداۋ كابينەتتەرى اشىلدى»،- دەدى س.ەسەنعاليەۆ.
سونداي-اق، باسقارما باسشىسى ەرەكشە ءبىلىمدى قاجەت ەتەتىن بالالاردىڭ قۇقىقتارى مەن مۇددەلەرىن قورعاۋ ماقساتىندا 400 ورىندىق كوررەكتسيالىق ورتالىق اشىلۋ جوسپارلانۋدا ەكەنىن دە جەتكىزدى.
جيىن سوڭىندا «Nur Otan» پارتياسى وبلىستىق فيليالىنىڭ توراعاسى، ايماق باسشىسى ماحامبەت دوسمۇحامبەتوۆ تالقىلانعان ماسەلەلەر بويىنشا جۇمىستى جانداندىرۋ قاجەتتىگىن ايتىپ، جاۋاپتى تۇلعالارعا بىرقاتار تاپسىرمالار بەردى.
«جەرگىلىكتى اتقارۋشى ورگاندار وبلىستا ينكليۋزيۆتى ءبىلىم بەرۋدى دامىتۋ بويىنشا قاجەتتى شارالاردى قابىلداسىن. پارتيانىڭ وبلىستىق فيليالى جەرگىلىكتى اتقارۋشى ورگاندارمەن بىرلەسىپ، «كەدەرگىسىز كەلەشەك» جوباسى اياسىندا كەدەرگىسىز ورتا قالىپتاستىرۋ جۇمىسىنا تالداۋ جاساپ، ول «الەۋمەتتىك وسال توپتاردى قولداۋ جونىندەگى» ايماقتىق كەڭەس وتىرىسىندا قارالسىن»،-دەگەن م.دوسمۇحامبەتوۆ، وبلىس اكىمىنىڭ ورىنباسارى ن.تاۋشوۆقا پارتيانىڭ سايلاۋالدى باعدارلاماسىن ىسكە اسىرۋ جونىندەگى «جول كارتاسىنىڭ» ورىندالماۋ قاۋپى بار تارماقتارى بويىنشا قوسىمشا شارالار قابىلداۋ قاجەتتىگىن ەسكەرتتى.
سونداي-اق، وبلىس اكىمىنىڭ ءبىرىنشى ورىنباسارى س.ايداربەكوۆكە، سالالىق باسقارمالار، قالا، اۋداندار اكىمدەرىنە ورىندالماۋ قاۋپى بار ينۆەستيتسيالىق جوبالاردى، جۇمىس ورىندارىنىڭ قۇرىلۋى بويىنشا كورسەتكىشتەردى جەكە باقىلاۋعا الىپ، ينديكاتورلاردىڭ تولىق ورىندالۋىن قامتاماسىز ەتۋدى، قاجەت جاعدايدا ولاردى الماستىرۋ جونىندە ناقتى شارالار الۋدى تاپسىردى.
جيىنعا وبلىستىق پارتيا فيليالى ساياسي كەڭەسى بيۋروسىنىڭ جانە وبلىستىق ماسليحاتتاعى «Nur Otan» پارتياسى دەپۋتاتتىق فراكتسياسىنىڭ مۇشەلەرى، وبلىس اكىمىنىڭ ورىنباسارلارى، جەرگىلىكتى اتقارۋشى ورگاندار باسشىلارى، اۋماقتىق پارتيا فيليالدارىنىڭ توراعالارى قاتىستى.
