تاۋەلسىزدىكتىڭ 30 جىلدىعى قارساڭىندا شىمكەنت قالاسىندا بيىل كوممۋنالدىق تۇرعىن ءۇي قورىنداعى 10 كوپقاباتتى تۇرعىن ۇيگە اعىمداعى جوندەۋ جۇمىستارى جۇرگىزىلەدى. ولاردىڭ قاتارىندا نۇرسات شاعىن اۋدانىندا ورنالاسقان №134ا، 134ب، 135ا، 135ب، 135ۆ، 212, 216, 14 جانە جەلتوقسان كوشەسىندەگى №19, 19ا ۇيلەر بار. جوندەۋ جۇمىستارى بارىسىندا بۇل ۇيلەردىڭ شاتىرى اۋىستىرىلىپ، قاسبەتى جاڭارتىلماق.
قازىرگى تاڭدا جوندەۋ جۇمىستارىن جۇرگىزۋ ءۇشىن بيۋدجەتتەن قاراجات ءبولىنىپ، مەملەكەتتىك ساتىپ الۋ كونكۋرستارى جاريالاندى. مەردىگەر مەكەمە انىقتالعان جاعدايدا جوندەۋ جۇمىستارى جىل سوڭىنا دەيىن اياقتالادى دەپ جوسپارلانۋدا.
ايتا كەتۋ كەرەك، اعىمداعى جوندەۋ – عيماراتتار مەن ينجەنەرلىك جابدىقتاردىڭ بولىكتەرىن مەرزىمىنەن بۇرىن توزۋدان جۇيەلى جانە ۋاقتىلى قورعاۋعا باعىتتالعان بۇزىلۋدىڭ الدىن الۋ جانە ۇساق زاقىمدانۋلار مەن اقاۋلاردى جويۋ جولىمەن جاسالاتىن تەحنيكالىق ءىس-شارالار كەشەنى.
