جاتاقحاناعا كەلگەن رەكتور پالاۋ باسىپ، ستۋدەنتتەرگە نان ءپىسىرىپ بەردى

4624
Adyrna.kz Telegram

جاتاقحاناعا كەلگەن رەكتور پالاۋ باسىپ، ستۋدەنتتەرگە نان ءپىسىرىپ بەردى، دەپ حابارلايدى قازيتۋ ءباسپاسوز قىزمەتى.

ءبىلىم جولىندا ءوز ۇيىنەن جىراق جۇرگەن ستۋدەنتتەر وتباسىلىق جىلۋلىق پەن قامقورلىقتى سەزىنۋى كەرەك. ءبىلىم وردالارى تەك ساپالى مامان دايىنداپ قانا قويماي، ستۋدەنتتەردىڭ بويىنا «جۇمساق داعدىلاردى»، جالپىادامزاتتىق قۇندىلىقتارعا باستايتىن ۇلتتىق قۇندىلىقتاردى دا ءسىڭىرۋىمىز قاجەت دەدى، قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا تالىمگەرلەر ينستيتۋتىنىڭ اشىلۋىندا.

قازاقستان پرەزيدەنتى قاسىم-جومارت توقاەۆ حالىققا جولداۋىندا «باستى مىندەت – جالپى ادامزاتقا ورتاق قاستەرلى قۇندىلىقتاردى جاستاردىڭ بويىنا ءسىڭىرۋ» دەپ اتادى. بۇل مىندەت جاستارمەن تىكەلەي جۇمىس ىستەپ وتىرعان جوعارى وقۋ ورىندارىنا ۇلكەن جاۋاپكەرلىشىك جۇكتەيدى. وسى ورايدا قازيتۋ-دا تالىمگەرلەر ينستيتۋتى ءوز جۇمىسىن باستادى.

جوبا بارىسىندا ۋنيۆەرسيتەتتە قىزمەت ەتىپ جۇرگەن قىزمەتكەرلەر، وقىتۋشى-پروفەسسورلار وزدەرىنىڭ ومىرلىك تاجىريبەلەرىمەن بولىسەدى. ماسەلەن، اس دايىنداۋ، سپورتپەن شۇعىلدانۋ، ونەرگە باۋلۋ، دۇرىس تاماقتانۋ سياقتى قاراپايىم دا وزەكتى تاقىرىپتار ايتىلادى.

تالىمگەرلەر ينستيتۋتىنىڭ العاشقى كۇنىندە ۋنيۆەرسيتەت رەكتورى گۇلنار الىبەكقىزى ستۋدەنتتەر ۇيىندەگى «اس ءۇي» الاڭىندا ستۋدەنتتەرمەن بىرگە تاعام ازىرلەپ، اس دايىنداۋدىڭ قىر-سىرىمەن ءبولىستى. پالاۋ باسىپ، نان ءپىسىردى.

ستۋدەنتتەر دە وزدەرىنە دەگەن جىلىلىقتى، مەيىرىمدىلىكتى، قامقورلىقتى سەزىنىپ جاتقاندارىن جەتكىزدى. ساپالى ءبىلىم ءبىلىم بەرۋمەن قاتار، ادامي قۇندىلىقتاردى سىڭىرۋدە ءوز تاجىريبەلەرىمەن ءبولىسىپ وتىرعان ۇستازدارىنا العىستارىن جەتكىزدى.

وسى ۋنيۆەرسيتەتتىڭ «فينانس» ماماندىعى بويىنشا 2 كۋرس ستۋدەنتى بالنۇر سەرىكباي:

«ءۇيىمىزدى ساعىنىپ الىستا جۇرگەندە وقۋ وردامىزدىڭ وتباسىلىق جىلۋلىقتى سەزىندىرىپ، جانىمىزدى ۇعىپ، سىرلاسىپ، تالىمگەرلىك تانىتىپ جاتقانى بىزدەردى قۋانتادى. رەكتور بىزدەرمەن بىرگە تاعام دايىندىپ، جول نۇسقاپ وتىر. وقىتۋشى-پروفەسسورلار قۇرامى قاتار وتىرىپ، بىزدەرمەن سىرلاسىپ، ومىرلىك اقىل-كەڭەستەرىن ايتىپ جاتىر. ءبىلىم الىپ جاتقان بىزدەردىڭ بولاشاقتا تەك جاقسى مامان عانا ەمەس، جاقسى ادام بولىپ قالىپتاسۋىمىزعا تاربيەلەپ جاتىر»، - دەگەن ويىمەن ءبولىستى.

جاراتىلىستانۋ جانە عىلىمي پاندەر كافەدراسىنىڭ پروفەسسورى، جاقىندا عانا 75 جاس مەرەيتويىن اتاپ وتكەن فازيلا ۋتەگاليەۆا سالاۋاتتى ءومىر سالتىن ۇستانۋدا ءوز تاجىريبەسىمەن ءبولىسىپ، ستۋدەنتتەرگە گيمناستيكا جاساتتى. زەينەت جاسىنداعى پروفەسسور ءوزى دە كۇندەلىكتى فيتنەس زالعا بارۋدى ادەتكە اينالدىرعانىن ايتتى. ال پەداگوگيكا عىلىمدارىنىڭ دوكتورى، قاۋىمداستىرىلعان پروفەسسور رايسا ابديسۋلەيمەنوۆا «اتا-انالار الاڭىندا» ستۋدەنتتەردىڭ اتا-انالارىمەن ۆيدەو كونفەرەنتسيا ارقىلى بايلانىسقا شىعىپ، بالا تاربيەسىندە ورتا اڭگىمە ءوربىدى.

ۆوكال كلۋبىنىڭ جەتەكشىسى، ونەرتانۋ عىلىمدارىنىڭ ماگيسترى، ماناربەك جاليمبەتوۆ «ۆوكال كلۋبى» الاڭىندا ستۋدەنتتەرمەن بىرگە ۆوكالدان ساباق ءوتتى. ەسەپتەۋ تەحنيكاسى جانە باعدارلامالىق قامتاماسىز ەتۋ كافەدراسىنىڭ مەڭگەرۋشىسى، پروفەسسور امانجول بەكتەمىسوۆ «كونفەرەنتسيا زالىندا» روبوتوتەحنيكا بويىنشا شەبەرلىك ساعاتىن وتكىزىپ، ستۋدەنت جاستارعا جاڭا تەحنولوگيانىڭ قىر-سىرىن مەڭگەرتتى.

جالپى ەلىمىزدەگى جوعارى وقۋ ورىندارىندا العاش رەت وتكىزىلىپ وتىرعان تالىمگەرلەر ينستيتۋتى «جۇمساق داعدىلارعا، جالپىادامزاتتىق قۇندىلىقتارعا باستايتىن ۇلتتىق قۇندىلىقتاردى دارىپتەۋگە باعىتتالىپ وتىر. ستۋدەنتتەرمەن جۇمىس ىستەپ وتىرعان تالىمگەرلەر وزدەرى ءجۇرىپ وتكەن ءومىر جولى ارقىلى اقىل-كەڭەس، اشىق سۇحباتتاسۋ جۇرگىزدى. الدا 38 باعىتتا تالىمگەرلىك جۇمىستار جۇرگىزىلەتىن بولادى.

«ادامنىڭ ادامشىلىعى – اقىل، عىلىم، جاقسى اتا، جاقسى انا، جاقسى قۇربى، جاقسى ۇستازدان بولادى»، دەگەن اباي قۇنانبايۇلى. قازيتۋ-دىڭ 20 جىلدىعى اياسىنداعى جاڭا جوبالاردىڭ ءبىرى – تالىمگەرلەر ينستيتۋى. تالىمگەرلەردىڭ ستۋدەنتتەرمەن العاشقى كەزدەسۋى قازاقستان ينجەنەرلىك-تەحنولوگيالىق ۋنيۆەرسيتەتىنىڭ كامپۋسىندا ورنالاسقان ستۋدەنتتەر ۇيىندە ءوتىپ جاتىر.  ساپالى ءبىلىم الۋ، جان-جاقتى تۇلعا بولۋدا قىزمەت ەتەتىن، الەۋمەتتەنۋدە ۇلكەن ءرولى بار ستۋدەنتتىك، كاسىبي، سپورتتىق، شىعارماشىلىق  كلۋبتار مەن سەكتسيالار جۇمىسى جانە عىلىمي-يننوۆاتسيالىق زەرتتەۋلەرمەن ستۋدەنتتەردىڭ قاۋىپسىز قازيتۋ قالاشىعىندا اينالىسۋىنا جان-جاقتى جاعداي جاسالعان»، - دەپ اتادى گۇلنار سارسەنبەكوۆا.

 

     قازيتۋ ءباسپاسوز قىزمەتى

پىكىرلەر