قر تاۋەلسىزدىگىنىڭ 30 جىلدىعى قارساڭىندا شىمكەنت قالاسىندا نىسانا كوزدەۋدەن ەرەسەكتەر مەن جاسوسپىرىمدەر اراسىندا ازيا چەمپيوناتى وتەدى. 10-20 قىركۇيەك ارالىعىنا جوسپارلانعان قۇرلىقتىق تۋرنير ازيا اتۋ كونفەدەراتسياسى مەن قازاقستان سپورتتىق اتۋ فەدەراتسياسىنىڭ قولداۋىمەن ۇيىمداستىرىلىپ وتىر. "Shymkent Shooting Plaza" اتۋ كەشەنىندە XIV ازيا چەمپيوناتىنىڭ سالتاناتتى اشىلۋ ءراسىمى ءوتتى. جيىنعا شىمكەنت قالاسىنىڭ اكىمى مۇرات ايتەنوۆ، ازيا اتۋ كونفەدەراتسياسىنىڭ پرەزيدەنتى شەيح سالمان ءال-ساباح قاتىسىپ، قاتىسۋشىلارعا ساتتىلىك تىلەدى.
ازيا چەمپيوناتىنا 11 مەملەكەتتەن 160 سپورتشى قاتىسۋدا. اتاپ ايتار بولساق، شىمكەنت تورىندە باحرەين، يندونەزيا، قىرعىزستان، ساۋد ارابياسى، كۋۆەيت، پاكىستان، كاتار، تايلاند، ءباا، وزبەكستاننان، جالپى 120-دان استام سپورتشى سىنعا تۇسەدى.
مۇرات ايتەنوۆ - شىمكەنت قالاسىنىڭ اكىمى
ءدۇبىرلى جارىس ءوتىپ جاتقان "Shymkent Shooting Plaza" - ازيا وڭىرىندەگى ەڭ ءىرى اتۋ كەشەندەرىنىڭ ءبىرى. جارىسقا قاتىسۋشى سپورتشىلار، جاتتىقتىرۋشىلار جانە تورەشىلەر پتر-تەستىلەۋدىڭ تەرىس ناتيجەسى تۋرالى انىقتاما بەردى، رەسمي دەلەگاتسيا، سپورتشىلار مەن قاتىسۋشىلار ءار 3 كۇن سايىن COVID-19-عا پتر تەستىن تاپسىرادى. تۋرنير سپورت نىسانىنداعى بارلىق سانيتارلىق نورمالاردى ساقتاي وتىرىپ وتكىزىلەدى. اتالعان ءىس-شارانى ۇيىمداستىرۋعا مادەنيەت جانە سپورت مينيسترلىگى، قر ۇلتتىق وليمپيادا كوميتەتى جانە شىمكەنت قالاسىنىڭ اكىمدىگى قولداۋ كورسەتتى.
اسحات توقمۇقوۆ – قىرعىزستاندىق مەرگەن /اۋدارما/
ازيا چەمپيوناتى: ەل قورجىنىندا – ءبىر التىن، ءبىر كۇمىس جۇلدە
شىمكەنت قالاسىندا نىسانا كوزدەۋدەن ازيا بىرىنشىلىگى باستالدى. العاشقى جارىس كۇنىندە قازاقستان كومانداسى ءبىر التىن، ءبىر كۇمىس جۇلدە جەڭىپ الدى. ەرەسەكتەر اراسىندا 10 مەترگە پنەۆماتيكالىق تاپانشامەن اتۋ جاتتىعۋىندا وتانداسىمىز ەلدار يمانقۇلوۆ جەڭىسكە جەتتى. ونىڭ ەنشىسىندە – 235.1 ۇپاي. ەكىنشى ورىندا ساۋد ارابياسىنىڭ وكىلى سوفار موحاممماد الدوساري، ءۇشىنشى ورىندا تايلاندتىق نوپپادون سۋتۆيرۋح. جاستار اراسىندا تاپانشامەن 10 مەترگە نىسانا كوزدەۋدەن تاعى ءبىر قازاقستاندىق ياروسلاۆ ماحنەۆ كۇمىس جۇلدەگە يە بولدى. بۇل باسەكەدە التىن جۇلدەنى وزبەكستاندىق ۋميدبەك كامالبەكوۆ، قولانى تاعى ءبىر وزبەك مەرگەنى مۇحامماد كامالوۆ ەنشىلەدى. ال ءجاسوسپىرىم اراسىندا وزبەكستاندىق يلحومبەك وبيدجونوۆ جەڭىمپاز اتاندى. العاشقى كۇننىڭ قورىتىندىسى بويىنشا قازاقستان قۇراماسى ازىرگە 1 التىن، 1 كۇمىس جۇلدە يەلەندى. ايتا كەتەلىك، نىسانا كوزدەۋدەن ازيا چەمپيوناتى وسىمەن 14-ءشى رەت ۇيىمداستىرىلىپ وتىر. قۇرلىق دوداسى 20 قىركۇيەككە دەيىن جالعاسادى.
ءا. داۋلەتبەكقىزى
