شىمكەنت قالاسىندا كولىك كەپتەلىسىن بولدىرماۋ ماقساتىندا كوشەلەردىڭ قيىلىسىنا وڭ جاق وتكەلىن سالۋ جۇمىسى قارقىن العان. قالادا وڭ جاق وتكەلدەردىڭ جالپى قاجەتتىلىگى – 45 ورىن بولسا، 2021 جىلدىڭ جوسپارى بويىنشا 8 كوشەدەگى 10 ورىنعا جەرگە وڭ جاق وتكەل سالىنۋدا.
ايتا كەتسەك، جىل باسىندا بيىل 11 ورىنعا وڭ جاق وتكەل سالۋ جوسپارلانعان بولاتىن. جولاۋشىلار كولىگى جانە اۆتومابيل جولدارى باسقارماسىنىڭ مالىمەتىنشە، جوباعا وزگەرىس ەنگىزىلىپ، سالىناتىن وتكەل سانى 10 بولىپ بەكىتىلدى.اتاپ ايتقاندا، سىپىرعان اتا – ءال-فارابي، سىپىرعان اتا –تەمىرلان تاس جولىنىڭ قيىلىسى، رىسقۇلوۆ–ادىربەكوۆ، ارعىنبەكوۆ–وتەگەنوۆ، رىسقۇلوۆ–شاياحمەتوۆ، رىسقۇلوۆ –قازيەۆ، شاياحمەتوۆ–ارعىنبەكوۆ جانە ارعىنبەكوۆ–بايتەرەكوۆ كوشەلەرىنىڭ قيىلىسىندا قۇرىلىستى 3 مەردىگەر مەكەمە جۇمىس جۇرگىزىپ وتىر. اتالعان كوشەلەردە جۇمىس اياقتالعان سوڭ 60 جول بەلگىسى ورناتىلادى. وڭ جاق وتكەلىن سالۋ جۇمىسى وسى جىلدىڭ ءساۋىر ايىندا باستالعان. قۇرىلىستىڭ اياقتالۋى قازان ايىنىڭ سوڭىنا جوسپارلانعان.
