اقش-تا COVID-19 جۇقتىرعان ايەل 355 كۇن بويى اۋىرعان دەپ حابارلايدى "ادىرنا" ۇلتتىق پورتالى "Science Alert" سايتىنا سىلتەمە جاساپ.
مەريلەند شتاتىنىڭ 47 جاستاعى تۇرعىنى 2020 جىلدىڭ كوكتەمىندە كوروناۆيرۋسپەن اۋرۋحاناعا جاتقىزىلعان. ول كوپ ۇزاماي اۋرۋحانادان شىعارىلعان، بىراق جازىلىپ كەتپەگەن: ناۋقاس ۇيىندە قوسىمشا وتتەگى اپپاراتىن قولدانعان.
ۇلتتىق دەنساۋلىق ساقتاۋ ينستيتۋتىنىڭ (NIH) ماماندارى بيوماتەريال ۇلگىلەرىن سالىستىرىپ، ايەل ءبىر جىلعا جۋىق ۋاقىت بويى ۆيرۋستى قايتا جۇقتىرماعانىن انىقتاعان، سوعان قاراماستان، وعان كوروناۆيرۋس دياگنوزى قويىلعان جانە سايكەس بەلگىلەرى دە بايقالعان: جوتەل، ەنتىگۋ.
ۆيرۋس جۇقتىرعاننان كەيىن ون اي وتكەن سوڭ ناۋقاستىڭ دەنەسىنەن الىنعان ۆيرۋس گەنومىنىڭ تالداۋى ۆ.1.332 شتامىن كورسەتكەن، ول زەرتتەۋ ۋاقىتىندا ءىس جۇزىندە اينالىمدا بولماعان. بۇل ناتيجە ايەلدىڭ قايتادان جۇقتىرماعانىن جانە وسى ۋاقىت بويى پاتوگەن ونىڭ دەنەسىندە قالعانىن راستادى.
ايەلدىڭ يممۋنيتەتى قاتەرلى ىسىكتەن كەيىن السىرەگەنى ايتىلعان. ول ءۇش جىل بۇرىن اعزادا انتيدەنەلەردى قالىپتاستىرۋى كەرەك جاسۋشالار سانىن ازايتاتىن ەمدەۋ كۋرسىنان ءساتتى وتكەن ەكەن. دارىگەرلەردىڭ ايتۋىنشا، بۇل COVID-19-دىڭ ۇزاق ۋاقىتقا سوزىلۋىنا سەبەپ بولۋى مۇمكىن.
ەمدەلۋ كەزىندە ايەل ۆيرۋس جۇقتىرىپ، جازىلعان ادامداردان قان پلازماسىن العان. ناتيجەسىندە ناۋقاس تولىقتاي جازىلىپ، ەندى وتتەگى ماسكاسىنسىز جۇرەدى.
مەريلەند شتاتىنداعى ناۋقاس COVID-19 جۇقتىرىپ، 290 كۇن بويى اۋىرعان 72 جاستاعى ۇلىبريتانيالىقتىڭ رەكوردىن جاڭارتقان.
"ادىرنا" ۇلتتىق پورتالى.
