اقتوبە وبلىسىندا 270 ملرد تەڭگەگە اۋىل شارۋاشىلىعى ءونىمى ءوندىرىلدى

1783
Adyrna.kz Telegram

جىل باسىنان بەرى اقتوبە وبلىسىندا 270 ملرد تەڭگەگە اۋىل شارۋاشىلىعى ءونىمى ءوندىرىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.

بۇل تۋرالى وڭداسىن ورازالين ورتالىق كوممۋنيكاتسيالار قىزمەتىندە وتكەن اقتوبە وبلىسىنىڭ بيىلعى جىلدىڭ 9 ايى ىشىندەگى الەۋمەتتىك-ەكونوميكالىق دامۋىنىڭ قورىتىندىسى مەن الداعى كەزەڭگە جوسپارلارى تۋرالى ءباسپاسوز ءماسليحاتىندا مالىمدەدى.

"وبلىسىمىزدىڭ ماڭىزدى ەكونوميكالىق سالاسىنىڭ ءبىرى اۋىل شارۋاشىلىعى بولىپ تابىلادى. اعىمداعى جىلى اۋىل شارۋاشىلىعى تاۋارىن وندىرۋشىلەردى مەملەكەتتىك قولداۋ ماقساتىندا رەسپۋبليكالىق جانە جەرگىلىكتى بيۋدجەتتەن شامامەن 26,7 ملرد.تەڭگە سۋبسيديا ءبولىندى. ونىڭ ىشىندە، قوماقتى قاراجات، ياعني  6,7 ملرد. تەڭگە جەم-ءشوپ ساتىپ الۋعا ءبولىندى. ءبىزدىڭ وبلىس - اعىمداعى جىلى وسىنداي اۋقىمدا اۋىل شارۋاشىلىعىنا قاجەتتى قولداۋ كورسەتكەن وڭىرلەردىڭ ءبىرى. سونىمەن قاتار "ەڭبەك" باعدارلاماسى بويىنشا
746 جوبانى ىسكە اسىرۋعا 3,3 ملرد.تەڭگە ءبولىندى",- دەدى و.ورازالين.

جالپى، اعىمداعى جىلدىڭ 9 ايىندا 270 ملرد.تەڭگەدەن استام اۋىل شارۋاشىلىق ءونىمى ءوندىرىلدى. وتكەن جىلدىڭ سايكەس كەزەڭىمەن سالىستىرعاندا ءىرى قارا مال باسى 4,7%–عا، ۇساق مال – 3,2%-عا، جىلقى - 9,7%-عا، قۇس - 7,9%-عا ارتتى.

وڭىردە سۋارمالى جەرلەردى پايدالانۋعا بەرۋ جۇمىستارى دا بەلسەندى ءجۇرىپ جاتىر. قازىرگى ۋاقىتتا رەسپۋبليكالىق بيۋدجەت ەسەبىنەن وبلىستا 10,6 مىڭ گا ۇنەمى سۋارمالى جەرلەرگە قاجەتتى ينفراقۇرىلىم تارتۋ جۇمىستار جۇرگىزىلۋدە. اياقتاۋ مەرزىمى 2022 جىل. ناتيجەسىندە كەلەسى جىلى ۇنەمى سۋارمالى جەرلەردىڭ كولەمى 2020 جىلمەن سالىستىرعاندا 35,1%-عا  ۇلعايىپ 40,8 مىڭ گەكتار قۇرايدى.

ول ءوز كەزەگىندە اۋىل شارۋاشىلىعى ءونىمىن ۇلعايۋىنا جانە جەرگىلىكتى تۇرعىنداردى ازىقپەن قامتاماسىز ەتۋگە مۇمكىندىك بەرەدى.

 

"ادىرنا" ۇلتتىق پورتالى.

 

 

 

 

 

پىكىرلەر