بۇگىن قر پرەزيدەنتى قاسىم-جومارت توقاەۆتىڭ بۇقارالىق سپورتتى دامىتۋ بويىنشا بەرگەن تاپسىرماسى نەگىزىندە شىمكەنت قالاسى اكىمىنىڭ قولداۋىمەن «شىمكەنت جاستار ليگاسى» جوباسىنىڭ ەكىنشى كەزەڭىنىڭ رەسمي اشىلۋ سالتاناتى وتۋدە.
«شىمكەنت جاستار ليگاسى» جوباسى فۋتبول، ۆولەيبول، باسكەتبول، شاحمات سىندى سپورتتىڭ 4 تۇرىنەن جوعارى جانە ورتا ارناۋلى وقۋ ورىندارىنىڭ جاستارى جانە جالپى ءبىلىم بەرۋ مەكەمەلەرىنىڭ وقۋشىلارى اراسىندا وتكىزىلۋدە.
جوبا ماقساتى - جاستاردىڭ بوس ۋاقىتىن ءتيىمدى پايدالانۋ، جاپپاي سپورتقا باۋلي وتىرىپ سالاۋاتتى ءومىر سالتىن ناسيحاتتاۋ، بۇقارالىق سپورتتى دامىتۋ.
بۇگىنگى شارانىڭ رەسمي اشىلۋىنا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، شىمكەنت قالاسىنىڭ ءبىلىم باسقارماسىنىڭ باسشىسى جانات تاجيەۆا، قالالىق دەنە شىنىقتىرۋ جانە سپورت باسقارماسىنىڭ باسشىسى باۋىرجان تۇمانباەۆ، قالالىق ىشكى ساياسات جانە جاستار ىستەرى جونىندەگى باسقارماسىنىڭ مىندەتىن اتقارۋشى مۇراتجان شوتانوۆ جانە جالپى ءبىلىم بەرۋ مەكەمەلەرىنىڭ ديرەكتورلارى، سونداي-اق، قاتىسۋشى كوماندالار جانە ولاردىڭ جانكۇيەر فان-كلۋبتارى قاتىسۋدا.
باس تورەشىنىڭ بەكىتكەن كەستەسىنە سايكەس بۇگىن قىزدار اراسىندا ۆولەيبول سپورت تۇرىنەن ا.پۋشكين اتىنداعى №1 مەكتەپ گيمنازياسى جانە ج.ايماۋىتوۆ اتىنداعى №64 مەكتەپ گيمنازياسىنىڭ كومانداسى باقتارىن سىنايتىن بولادى.
جارىس قورىتىندىسى بويىنشا سپورت تۇرلەرىنەن ءى، ءىى، ءىىى ورىن العان كوماندالار ديپلوم، مەدال جانە باعالى سىيلىقتارمەن ماراپاتتالادى. سونداي-اق، سپورت تۇرلەرىنەن «ۇزدىك قاقپاشى»، «ۇزدىك قورعاۋشى»، «ۇزدىك ويىنشى»، «ۇزدىك جەتەكشى»، «ۇزدىك جانكۇيەر»، «ۇزدىك فان-كلۋبى» «ۇزدىك تاربيەشى»، «ۇزدىك ءبىلىم بەرۋ مەكەمەسى» نوميناتسيالارىنىڭ جەڭىمپازدارىنا ديپلومدار مەن باعالى سىيلىقتار تابىستالادى.
