باتىس قازاقستاندا ءساۋىر ايىندا ورىن العان 30 جاستاعى ايناگۇل حايرۋللينانى ءولتىرۋ ءىسى بويىنشا سوت وتىرىسى ءوتتى. ونى ءوزىنىڭ كۇيەۋى اسا قاتىگەزدىكپەن ولتىرگەن. ايناگۇل حايرۋللينانىڭ اناسى كۇيەۋ بالاسىنا وتە قاتاڭ جازانى سۇراپ وتىر، دەپ حابارلايدى "ادىرنا" ۇلتتىق پورتالى.
"موي گورود" باسىلىمىنىڭ حابارلاۋىنشا، ايەلىن 30 جەردەن پىشاقتاپ ولتىرگەن. اناسى قىلمىسكەردى ءولىم جازاسىنا كەسۋىن سۇرايدى.
"ول ايناگۇل حايرۋللينانى جەكە مەنشىگىم دەپ ساناعان. 2021 جىلى 19 ءساۋىر كۇنى، شامامەن ساعات 16:30-دا پەنجەگىنىڭ قالتاسىنا پىشاق سالعان باۋىرجان حايرۋللين بۇرىنعى ايەلىنىڭ جۇمىس ورنىنا كەلگەن. قىلمىستىق نيەتىن بولجاپ بىلمەگەن ايناگۇل ونىڭ ارتىنان شىققان.
مەكەمە جانىندا حايرۋللين كوڭىل تولماۋشىلىق ءبىلدىرىپ، قاسىندا ەشكىم جوق ەكەنىن بىلگەن سوڭ، قالتاسىنداعى پىشاقتى شىعارىپ، ايەلدى جاراقاتتاي باستاعان. اسقان قاتىگەزدىك تانىتقان. كەيىن ايەلدى جەرگە قۇلاتىپ، پىشاق جاراقاتىن سالۋدى جالعاستىرعان. ايناگۇل حايرۋللينا ءومىرى ءۇشىن كۇرەسىپ، پىشاقتاۋدى دوعارۋىن سۇراعان. الايدا حايرۋللين وعان قاراماي، ايەل ەشقانداي بەلگى بەرمەگەندە عانا قىلمىس ورنىنان قاشىپ كەتكەن", - دەدى مەملەكەتتىك ايىپتاۋشى ساكەن مولداشەۆ.
باۋىرجان ءحايرۋلليننىڭ ءوزى سوت زالىندا بولدى. ول ءىستى القابيلەر سوتىنىڭ قاراستىرعانىن قالامادى. ال مارقۇمنىڭ اناسى قاتيما كاجيپانوۆا ەكس-كۇيەۋ بالاسىنا ەڭ قاتاڭ جازا سۇراپ وتىر.
"ونىڭ ءولىم جازاسىنا كەسىلگەنىن قالار ەدىم. وكىنىشكە قاراي، بىزدە ونداي جازا جوق. سوندىقتان دا سوتتان ونى ءومىر بويىنا باس بوستاندىعىنان ايىرۋدى سۇرايمىن. ەكى كىشكەنتاي بالا اناسىز قالدى", - دەپ ءتۇسىندىردى ايەل.
"ادىرنا" ۇلتتىق پورتالى
