ورتالىق ازيا مەملەكەتتەرىنىڭ باسشىلارى ءوز جۇبايلارىن كوپشىلىك الدىنا كوپ شىعارمايدى. كوبىنەسە ءبىرىنشى حانىمدار وزگە مەملەكەت باسشىلارى كەلگەن ارنايى شاراعا قاتىسادى. ءبىرىنشى حانىمداردىڭ كوپشىلىگى ارنايى قورلار اشىپ، قايىرىمدىلىقپەن اينالىسادى.
قازاقستاننىڭ ءبىرىنشى حانىمى
قازاقستاندا وسى ۋاقىتقا دەيىن ءبىرىنشى حانىم رەتىندە ءبىر عانا ادام بەلگىلى. ول تۇڭعىش پرەزيدەنت، ەلباسى نۇرسۇلتان نازارباەۆتىڭ جارى سارا نازارباەۆا. سارا نازارباەۆا ارنايى قور اشىپ، "بوبەك قورى" ارقىلى ءتۇرلى قايىرىمدىلىق شارالارىن ىسكە اسىرادى. 2019 جىلى قاسىم-جومارت توقاەۆ پرەزيدەنتتىككە جايعاستى، مىنە وسى ۋاقىتتان باستاپ پرەزيدەنتتىڭ جۇبايىنا قاتىستى ساۋالدار تۋىندادى. قازاقستاندىق باق پرەزيدەنت توقاەۆتىڭ جۇبايى نادەجدا داۆىدوۆنا ەكەنىن، ونىڭ تاگيلدە ومىرگە كەلگەنىن جازدى.
اراعا ۋاقىت سالىپ اقوردا توقاەۆتىڭ وتباسىلىق جاعدايىنا قاتىستى رەسمي اقپاراتتى شىعاردى. وتباسىلىق جاعدايى - "اجىراسقان" دەپ كورسەتىلدى. كەي اشىق دەرەككوزدەرگە سەنەتىن بولساق نادەجدا ماسكەۋ مەملەكەتتىك تاريحي-مۇراعاتتىق ينستيتۋتىن بىتىرگەن. قاسىم-جومارت پەن نادەجدانىڭ 1984 جىلعى تيمۋر ەسىمدى ۇلدارى بار. قازىرگى تاڭدا تيمۋر مۇناي سالاسىندا قىزمەت ەتەدى.
قىرعىزستاننىڭ ءبىرىنشى حانىمى
قىرعىزستان باسشىسى جاپاروۆتىڭ جۇبايى ايگۇل اسانبايدىڭ جاسى 48-دە. ول ىستىق كول ايماعىنان. ونىڭ اكەسى قازىر داۋ-داماي ورتالىعىنا اينالعان قۇمتور كەنىشىندە ۇزاق ۋاقىت قىزمەت ەتكەن. ايگۇل امانباي مەكتەپ بىتىرگەن سوڭ، قاراكولدەگى مەديتسينا كوللەدجىنە وقۋعا تۇسەدى. ارتىنشا ول ي.اراباەۆا اتىنداعى قىرعىز مەملەكەتتىك ۋنيۆەرسيتەتىنىڭ پەداگوگيكالىق فاكۋلتەتىن بىتىرەدى.
سادىر مەن ايگۇلدىڭ ءتورت بالاسى بار. ايگۇل اسانباي ءبىر سۇحباتتا بەس بالاسى بارىن، بەسىنشى بالا رەتىندە جول اپاتىنان قازا تاپقان وتباسىنىڭ بالاسىن اسىراپ العانىن ايتقان. ايگۇلدىڭ شىن ەسىمى گۇلنۇر، تولقۇجاتىندا سولاي جازىلعان. دەگەنمەن حالىق تا، وتباسى دا ونى ايگۇل دەپ اتايدى.
ايگۇل اسانباي ء"ۇمىت بۇلاعى" اتتى قوعامدىق قور قۇرىپ، قىرعىزستانداعى انالار مەن بالالارعا قامقورلىق كورسەتۋمەن اينالىسادى. ال قازىرگى تاڭدا COVID-19 پاندەمياسىمەن كۇرەسۋدە ەرىكتى بولىپ جۇمىس جاساۋدا.
وزبەكستاننىڭ ءبىرىنشى حانىمى
وزبەكستان باسشىسى شاۆكات ميرزيەەۆ جۇبايىمەن ءىس-ساپارلارعا ءجيى شىعادى. العاش رەت وزبەكستاننىڭ ءبىرىنشى حاتشىسى 2017 جىلى وزبەك باسشىسى قىتايعا بارعان ساپارىندا تانىستى. وعان دەيىن زيرواتحون حوشيموۆا كوپشىلىك الدىنا كوپ شىقپايتىن.
زيرواتحون حوشيموۆانىڭ اكەسى فەرعانا جازىقتىعىنداعى ەڭ بەدەلدى جانداردىڭ ءبىرى بولعان. ال كوپشىلىك وزبەكستان باسشىسىنىڭ زيرواتحانمەن تانىسۋىنا اكەسى سەبەپكەر بولعان دەگەن ويدا. حوشيموۆا— ينجەنەر-ەكونوميست. الايدا ول ءوز ماماندىعى بويىنشا جۇمىس ىستەمەيدى، كوبىنە ءۇي شارۋاسىمەن اينالىسادى. زيرواتحون حوشيموۆا حالىقارالىق "زامين" قورىنىڭ وكىلى. ول مۇگەدەك جانداردىڭ قۇقىعىن قورعاۋ جۇمىستارىمەن اينالىسادى.
شاۆكات پەن زيرواتحاننىڭ ەكى قىزى جانە ءبىر ۇلدارى بار. زيرواتحون حوشيموۆا-ميرزيوەۆا مەن رەسەيلىك ميللياردەر الىشەر ۋسمانوۆ قۇدالار. كەي دەرەك كوزدەرى شاۆكات پەن زيرواتحوننىڭ قىزدارى پرەزيدەنتتىڭ وققاعارىنا تۇرمىسقا شىققانىن ايتادى.
تاجىكستاننىڭ ءبىرىنشى حانىمى
ەمومالي راحمونوۆتىڭ جۇبايى جايلى اقپارات وتە از. رەسمي اقپارات تا جوق. الەمدىك باق تاجىكستان باسشىسىنىڭ جۇبايىنىڭ ەسىمى ازيزمو اسادۋللاەۆا ەكەنىن جازادى. ول رەسمي جانە بەيرەسمي ساپارلارعا بارمايدى، كوپشىلىككە شىقپايدى. ەمومالي مەن ازيزمونىڭ جەتى قىزى مەن ەكى ۇلى بارى عانا بەلگىلى.
ازيزمو راحمونوۆا 2014 جىلى ەمومالي راحموننىڭ مالايزياعا ساپارى بارىسىندا ءبىر مارتە كورىنگەن.
تۇركىمەنستاننىڭ ءبىرىنشى حانىمى
تۇركىمەنستاننىڭ ءبىرىنشى حانىمى جايلى اقپارات مۇلدە جوق. بەلگىلى اقپاراتتار بويىنشا تۇركىمەنستاننىڭ ءبىرىنشى حانىمىنىڭ ەسىمى وگۋلگەرەك اتايقىزى بەردىمۋحامەدوۆا. ول لوندون مەن اشحاباد قالالارىندا تۇرىپ، ەكى ەل اراسىندا ءجيى ساياحاتتايدى.
"ادىرنا" ۇلتتىق پورتالى
