داۋلەت جانە "ەر-داۋلەت"

4259
Adyrna.kz Telegram

بەلگىلى قالامگەر باۋىرجان ومارۇلى گرەك-ريم كۇرەسىنەن قازاقستاندىق جانە بۇرىنعى كەڭەس وداعىنىڭ پالۋانى، قازاقستاننىڭ ەڭبەك سىڭىرگەن قايراتكەرى داۋلەت تۇرلىحانوۆتى ەلەۋلى ەلۋ سەگىز جاسىمەن قۇتتىقتادى. جۇرەك جاردى جازباسىن ءوز Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.

ايگىلى بالۋان. ارداقتى ازامات. مايتالمان مامان. الەمدىك دەڭگەيدەگى كۇرەس سپورتى قۇرىلىمدارى باسشىلارىنىڭ ءبىرى. اتاق-داڭقى جەر جارادى. سولاي ەكەن دەپ، كەۋدە كەرگەنىن كورمەپپىز. كوركەم مىنەزدى. كىشىپەيىل. قايىرىمدى. سويلەسە قالساڭ دا، ساپارلاس بولساڭ دا، سوعان كوزىڭ جەتەدى.

باسقا دا ونەگەلى ىستەرى بارشىلىق.

توقسانىنشى جىلداردىڭ باسىندا بەلگىلى كاسىپكەر ەركىن قاليەۆپەن بىرلەسىپ جەكەمەنشىك اقپارات مەكەمەسىن اشتى.

تانىمال ەكى جىگىتتىڭ ەسىمدەرىنەن قۇرالعان "ەر-داۋلەت" اقپارات اگەنتتىگىنىڭ تىلشىلەرى الەم قۇلاق تۇرگەن وقيعالاردىڭ ورتاسىنا بارىپ، دۇنيەنىڭ تۇكپىر-تۇكپىرىنەن حابار تاراتقانى جۇرتشىلىقتىڭ ەسىندە بولار.

اگەنتتىك وكىلدەرى مەملەكەت باسشىلارىنىڭ رەسمي ساپارلارىنا دا بىرگە اتتاندى. جان الىسىپ، جان بەرىسكەن ايتۋلى سپورت سايىستارىنان تىكەلەي رەپورتاج بەردى.

الاش تۋى جەلبىرەگەن وليمپيادالاردىڭ تورىندە دە "ەر-داۋلەتتىڭ" سايىپقىران ساربازدارى جاسىن ويناتتى. وسىنىڭ ءبارى جەكەمەنشىك اقپارات قۇرالىن قۇرىپ، ونىڭ تىزگىنىن بەلگىلى دە بەدەلدى جۋرناليست، قايراتكەر-قالامگەر قىدىربەك رىسبەكوۆكە سەنىپ تاپسىرعان داۋلەت بالۋاننىڭ ارقاسى ەدى. قارشادايىن تاۋ قوپارىپ، تاس جارىپ ۇيرەنگەن قىدىر دوس باستى سوسىن قامشىنى... از جىلدا اگەنتتىكتىڭ اتىن قالىڭ ەلگە تانىتتى. "ەر-داۋلەت" - ءوز زامانىندا ءوز مىندەتىن ورىنداي بىلگەن اقپارات قۇرىلىمى.

قازاق جىرىنىڭ ەرەن جۇيرىگى مۇرات موڭكەۇلىنىڭ:

بالۋان، بايلىق، باتىرلىق،

ۇشەۋى قولدان كەلمەي ءجۇر، -

دەگەن ولەڭ جولدارى بار.

مۇرات اقىن اتاپ كورسەتكەن وسى ءۇش ۇعىمدى جۇرەگىمەن سەزىنىپ، جونىمەن قادىرلەگەن، قاناسىنان اسپاعان، كەمەرىنەن تاسپاعان قاراپايىم قازاقتىڭ ءبىرى، ەلىمىزدىڭ پاراساتتى پەرزەنتى داۋلەت تۇرلىحانوۆ بۇگىن ەلۋ سەگىز جاسقا تولدى.

تۋعان كۇنىڭىز قۇتتى بولسىن، داۋكە! اماندىق تىلەيمىز!

داۋلەت بولاتۇلى تۇرلىحانوۆ 1963 جىلى 18 قاراشادا شىعىس قازاقستان وبلىسىنىڭ جارما اۋدانىندا دۇنيەگە كەلگەن. تۋريزم جانە سپورت اكادەمياسىن، ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن.

پالۋان، گرەك-ريم كۇرەسىنەن ەڭبەك سىڭىرگەن سپورت شەبەرى، قازاقستاننىڭ ەڭبەك سىڭىرگەن قايراتكەرى، قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن جاتتىقتىرۋشىسى.

قازاقستاننىڭ جانە حالىقارالىق تۋرنيرلەردىڭ جەڭىمپازى، كسرو-نىڭ جەتى دۇركىن چەمپيونى، كسرو حالىقتارى سپارتاكياداسىنىڭ كۇمىس جۇلدەگەرى، جانە جەڭىمپازى، ەۋروپا چەمپيونى، الەم چەمپيونى جانە كۇمىس جۇلدەگەرى، قولا جۇلدەگەرى، الەم كۋبوگىنىڭ ەكى مارتە جەڭىمپازى، 12-ءشى ازيا ويىندارىنىڭ جەڭىمپازى، ازيانىڭ ەكى دۇركىن چەمپيونى، 24-25-ءشى وليمپيادالىق ويىندارىنىڭ كۇمىس، قولا جۇلدەگەرى بولعان.

“ادىرنا” ۇلتتىق پورتالىنىڭ ۇجىمى دا تۋعان كۇنىڭىزبەن شىن جۇرەكتەن قۇتتىقتايدى!

“ادىرنا” ۇلتتىق پورتالى

پىكىرلەر