قر تاۋەلسىزدىگىنىڭ 30 جىلدىعى قارساڭىندا ءۇشىنشى مەگاپوليستە كەزەكتى ەلەكتر ستانتسياسى ىسكە قوسىلدى. قالانىڭ ينفراقۇرىلىمى ءۇشىن ماڭىزدى ستراتەگيالىق نىساننىڭ رەسمي اشىلۋ سالتاناتىنا قالا اكىمى مۇرات ايتەنوۆ، قالالىق ءماسليحاتتىڭ حاتشىسى باحادىر نارىمبەتوۆ، ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى بورانباي بولاتبەكوۆ جانە جاۋاپتى ماماندار مەن جەرگىلىكتى تۇرعىندار قاتىستى.
مەملەكەت باسشىسىنىڭ تاپسىرماسىمەن بۇگىنگى تاڭدا شىمكەنت قالاسىن ساپالى ەلەكتر قۋاتىمەن قامتۋ جوسپارى ىسكە اسىرىلۋدا.
– شىمكەنت قالاسىن ساپالى ەلەكتر قۋاتىمەن قامتۋ – ماڭىزدى مىندەت. قالانىڭ ەنەرگەتيكا سالاسىن كەشەندى تۇردە جاڭعىرتۋ باستاماسى قولعا الىندى. بەس جىلدا 10 قوسالقى ەلەكتر ستانتسياسى سالىنادى. بيىل «بوزارىق» قوسالقى ستانتسياسى ىسكە قوسىلدى. بۇگىن «1-م-1» ستانتسياسى جۇمىسىن باستاپ وتىر. بۇل جوبا 4 ەلدىمەكەننىڭ 70 مىڭعا جۋىق تۇرعىنىن ساپالى ەلەكتر قۋاتىمەن قامتۋعا مۇمكىندىك بەرەدى، – دەدى مۇرات دۇيسەنبەكۇلى.قۇرىلىسى 2019 جىلى باستالعان "1-م-1" قوسالقى ەلەكتر ستانتسياسىنىڭ قۋاتى قالانىڭ اسار-2, سولتۇستىك ساياجاي، قايناربۇلاق جانە دوستىق شاعىناۋداندارىنىڭ تۇرعىندارىن ساپالى ەلەكتر جارىعىمەن قامتاماسىز ەتۋگە مۇمكىندىك بەرەدى. بۇل كەشەن 110 كۆ جەلى ارقىلى «بوزارىق» ستانتسياسىنان قۋات الادى. قۇرىلىسىن «ەلەكترومونتاج» اق جۇرگىزگەن كەشەن زاماناۋي ەلەكتر قۇرالدارىمەن جابدىقتالعان. قوسالقى ەلەكتر ستانتسياسىنىڭ ىسكە قوسىلۋىمەن اسار-2 شاعىناۋدانىنداعى 2765 ابونەنتكە ساپالى ەلەكتر قۋاتى بەرىلدى. ال سولتۇستىك ساياجاي، قايناربۇلاق، دوستىق ەلدىمەكەندەرىنە ساپالى ەلەكتر ەنەرگياسى ىشكى ورامدىق جەلىلەر قۇرىلىسى اياقتالعاننان كەيىن بەرىلەدى.
