پرەزيدەنت قاسىم-جومارت توقاەۆ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىندا «قاراپايىم زاتتار ەكونوميكاسى» باعدارلامالارىنىڭ مەرزىمىن 2022 جىلعا دەيىن سوزۋ تۋرالى شەشىم قابىلدادى.
قاراپايىم زاتتار ەكونوميكاسىن دامىتۋ – بۇل ىشكى نارىقتى وتاندىق تاۋارلارمەن تولىقتىرۋ، باسەكەگە قابىلەتتى وندىرىستەر قۇرۋ. ەڭ باستىسى يمپورتتى وتاندىق الەۋمەتتىك ماڭىزى بار ازىق-تۇلىك تاۋارلارىمەن الماستىرۋ.
قالا اكىمىنىڭ ورىنباسارى ايبەك ساتتىباەۆ شىمكەنت قالاسىندا «قاراپايىم زاتتار ەكونوميكاسى» باعدارلاماسى بويىنشا جالپى سوماسى 50,6 ملرد تەڭگە بولاتىن 65 جوبا قارجىلاندىرىلعانىن ايتتى. وسىنىڭ ناتيجەسىندە مىڭنان اسا جۇمىس ورنى اشىلعان.
ونىڭ ايتۋىنشا، قالادا بيىلعى جىلى اتالعان باعدارلاما بويىنشا 80 جوبانىڭ بانك نەسيەلەرىن سۋبسيديالاۋ جانە 20 جوبانى كەپىلدەندىرۋ جوسپارلانىپ، بۇل ماقساتقا 83,4 ملرد. تەڭگە قارجى قارالعان. باعدارلاماعا قاتىسۋعا 84 كاسىپورىن ءوتىنىم بىلدىرگەن. ونىڭ ىشىندە بۇگىندە 65 جوبا قارجىلاندىرىلسا، قازىر ەكىنشى دەڭگەيدەگى بانكتەردە 4,2 ملرد تەڭگە سوماسىنداعى تاعى بەس جوبا قاراستىرىلۋدا.
قالا اكىمىنىڭ ورىنباسارى ايبەك ساتتىباەۆ شىمكەنت قالاسى «قاراپايىم زاتتار ەكونوميكاسى» باعدارلاماسى اياسىندا جوبالاردى سۋبسيديالاۋ بويىنشا الماتىدان كەيىن ەكىنشى ورىندا ەكەنىن ايتتى.
سونىمەن بىرگە ول ەكى اي بۇرىن وسى باعدارلاماعا تۇزەتۋلەر ەنگىزىلىپ، وندا قولداۋعا جاتاتىن باسىم قىزمەت تۇرلەرى مەن تاۋارلاردى كەڭەيتۋ، ليزينگتىك كومپانيالاردى باعدارلاما وپەراتورلارى رەتىندە قوسۋ كوزدەلگەنىن ايتىپ ءوتتى.
باعدارلامانىڭ ارقاسىندا 2025 جىلعا قاراي كرەديتتەلەتىن تاۋارلار بويىنشا يمپورت ۇلەسى 59 پايىزدان 37 پايىزعا دەيىن تومەندەپ، 16 مىڭعا جۋىق جۇمىس ورنى قۇرىلادى دەپ كۇتىلۋدە.
شىمكەنت قالاسى اكىمدىگىنىڭ ءباسپاسوز قىزمەتى
