شىمكەنتتە بالالارى ۇيىنەن قۋىپ جىبەرگەن 75 جاستاعى اجەيدى كورشىلەرى دالادا قاڭعىپ جۇرگەن جەرىنەن تاۋىپ الدى، دەپ حابارلايدى “ادىرنا” ۇلتتىق پورتالى otyrar.kz سايتىنا سىلتەمە جاساپ.
سالامات راحمانقىزىنىڭ جاسى 75-تە. شىمكەنتتە تۋىپ-وسكەن اجەي بار ءومىرىن مەدبيكەلىك قىزمەتكە ارنايدى. كۇيەۋى قايتىس بولعان سوڭ، بەس بالانى جالعىز ءوزى باعىپ-جەتىلدىرگەن. كەيىن ءۇيىن ساتىپ، جالعىز ۇلى مەن قىزدارىنا اقشاسىن ءبولىپ بەرەدى.
ال وزى ۇلكەن قىزىنىڭ قولىندا ۋاقىتشا تۇرعان. كەيىن قىزىمەن سوزگە كەلىپ قالعاندا، تۇڭعىشى ۇيدەن قۋىپ جىبەرەدى.
- كۇيەۋىم ومىردەن وتكەن سوڭ، ءبارىن ءوزىم اياققا تۇرعىزدىم. جوعارى ءبىلىم الدى بارلىعى. 90-جىلدارى قيىنداۋ بولسا دا، بىرنەشە جەردە جۇمىس ىستەپ، باعىپ-قاقتىم. وسكەن سوڭ ءبارى بولەك كەتتى. ۇيدە جالعىز قالعان سوڭ، باسپانانى ساتىپ، بالالارعا اقشاسىن ءبولىپ بەردىم. نە ومىرىم قالدى دەيسىڭ، بالالاردىڭ قولىندا تۇرا تۇرارمىن دەپ ويلادىم، — دەيدى سالامات بالاباەۆا.
قارتايعاندا بالالارىنان قىزىق كورمەگەن كەيۋانا ۇلكەن قىزىمەن ۇرىسىپ قالعان سوڭ، كوشە كەزىپ كەتەدى. بىرنەشە كۇن بويى دالادا جۇرگەن اجەيدى بۇرىنعى كورشىلەرى تاۋىپ الىپ، داعدارىس ورتالىعىنا الىپ كەلگەن.
- اجەي ۇلكەن سوققى العان. ەكى كۇن بويى كوشەدە قاراۋسىز جۇرگەن سوڭ، بۇل ومىردەن كەتكىسى كەلگەنىن دە جاسىرمايدى. تۋعان بالالارى قۋىپ شىققان سوڭ، ەلدىڭ بەتىنە قالاي قارايمىن دەگەن وي قاجاپ تاستاعان. جالعىز ۇلى دا اناسىنا قارامايدى. سەبەبى، كەلىنى ەنەسىمەن بىرگە تۇرعىسى كەلمەيدى، — دەيدى «كومەك» داعدارىس ورتالىعىنىڭ ديرەكتورى ماليكا ءجۇسىپوۆا.
سالامات بالاباەۆا ۇلكەن قىزىنىڭ ۇيىنە قايتا بارعان. الايدا، قىزى ءۇيدى ساتىپ، كوشىپ كەتكەنى بەلگىلى بولدى. بۇگىندە سالامات اجەيدىڭ داعدارىس ورتالىعىندا جۇرگەنىنە ەكى اي تولدى.
ول مۇندا ءتۇرلى قيىندىقتارمەن تۇسكەن جاس انالارعا كومەكتەسىپ، بالالارىن باعىسىپ، اقىلىن ايتىپ وتىرادى.
”ادىرنا” ۇلتتىق پورتالى
