Şymkentte balalary üiınen quyp jıbergen 75 jastaǧy äjeidı körşılerı dalada qaŋǧyp jürgen jerınen tauyp aldy, dep habarlaidy “Adyrna” ūlttyq portaly otyrar.kz saityna sılteme jasap.
Salamat Rahmanqyzynyŋ jasy 75-te. Şymkentte tuyp-ösken äjei bar ömırın medbikelık qyzmetke arnaidy. Küieuı qaitys bolǧan soŋ, bes balany jalǧyz özı baǧyp-jetıldırgen. Keiın üiın satyp, jalǧyz ūly men qyzdaryna aqşasyn bölıp beredı.
Al özı ülken qyzynyŋ qolynda uaqytşa tūrǧan. Keiın qyzymen sözge kelıp qalǧanda, tūŋǧyşy üiden quyp jıberedı.
- Küieuım ömırden ötken soŋ, bärın özım aiaqqa tūrǧyzdym. Joǧary bılım aldy barlyǧy. 90-jyldary qiyndau bolsa da, bırneşe jerde jūmys ıstep, baǧyp-qaqtym. Ösken soŋ bärı bölek kettı. Üide jalǧyz qalǧan soŋ, baspanany satyp, balalarǧa aqşasyn bölıp berdım. Ne ömırım qaldy deisıŋ, balalardyŋ qolynda tūra tūrarmyn dep oiladym, — deidı Salamat Balabaeva.Qartaiǧanda balalarynan qyzyq körmegen keiuana ülken qyzymen ūrysyp qalǧan soŋ, köşe kezıp ketedı. Bırneşe kün boiy dalada jürgen äjeidı būrynǧy körşılerı tauyp alyp, daǧdarys ortalyǧyna alyp kelgen.
- Äjei ülken soqqy alǧan. Ekı kün boiy köşede qarausyz jürgen soŋ, būl ömırden ketkısı kelgenın de jasyrmaidy. Tuǧan balalary quyp şyqqan soŋ, eldıŋ betıne qalai qaraimyn degen oi qajap tastaǧan. Jalǧyz ūly da anasyna qaramaidy. Sebebı, kelını enesımen bırge tūrǧysy kelmeidı, — deidı «Kömek» daǧdarys ortalyǧynyŋ direktory Malika Jüsıpova.Salamat Balabaeva ülken qyzynyŋ üiıne qaita barǧan. Alaida, qyzy üidı satyp, köşıp ketkenı belgılı boldy. Bügınde Salamat äjeidıŋ daǧdarys ortalyǧynda jürgenıne ekı ai toldy. Ol mūnda türlı qiyndyqtarmen tüsken jas analarǧa kömektesıp, balalaryn baǧysyp, aqylyn aityp otyrady.
”Adyrna” ūlttyq portaly
