ءجۇرسىن ەرمان ددسۇ باسشىسىمەن قالاي قۇدا بولعانىن ايتتى

5842
Adyrna.kz Telegram

ءجۇرسىن ەرمان ددسۇ باسشىسىمەن قالاي قۇدا بولعانىن ايتىپ بەردى، دەپ حابارلايدى «ادىرنا» ءتىلشىسى Sputnik قازاقستانعا سىلتەمە جاساپ.

"مەنىڭ ارداق دەگەن كىشى قىزىم بار. وسى الماتىدا تۇرادى. سودان تۋعان ايدانا دەگەن نەمەرە جيەنىم بار. سول بالانى مەكتەپتە وقىپ جۇرگەندە ءتىل ۇيرەنسىن دەپ جاڭا زەلاندياعا جىبەرگەنبىز. سول جاقتا مەكتەپتى بىتىرگەننەن كەيىن ءوزى شۆەيتسارياداعى اكادەمياعا "قوناق ءۇي بيزنەسى" بويىنشا وقۋعا تۇسكەن. ودان كەيىن يسپانياعا بارىپ، ماگيستراتۋرادا وقىدى. ال ءتورت جىل بۇرىن دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيسۋستىڭ ۇلكەن ۇلىنا تۇرمىسقا شىققان. قازىر ءبىر قىزى بار", - دەدى ول.

ونىڭ ايتۋىنشا، تەدروس گەبرەيسۋس باس قۇدا رەتىندە قازاقستانعا كەلىپ كەتكەن. ايدانانى ۇزاتۋعا قاتىستى. كۇنى كەشە ءجۇرسىن ەرمان 70-جاسقا تولدى. مەرەتويعا جەنەۆاداعى باس قۇدا دا شاقىرىلدى. بىراق جۇمىس بابىنا بايلانىستى كەلە الماعان.

"تەدروس قۇدا كەلەم دەگەن. بىراق كەلە المادى. دۇنيەجۇزىلىك دەنساۋلىق ساقتاۋ ۇيىمىنىڭ سەزى بولىپ قالدى. سودان بەينەقۇتتىقتاۋ جىبەردى. قازاقشا سويلەدى. سوڭىندا مەنىڭ ءبىر اۋىز ولەڭىمدى دە وقىپ بەردى", - دەپ اتاپ كورسەتتى ەرمان.

ايدانا شەتەلدە قالسا دا، ءتول مادەنيەتى مەن ونەرىن ۇمىتپايدى. وزىمەن بىرگە دومبىرانى الىپ كەتكەن. ءان ايتىپ، كۇي تارتادى. ال اتاسىنا قازاق ءتىلىن ۇيرەتىپ قويعان.

«ادىرنا» ۇلتتىق پورتالى

پىكىرلەر