شىمكەنت قالاسىندا كولىك كەپتەلىسىن بولدىرماۋ ماقساتىندا كوشەلەردىڭ قيىلىسىنا وڭ جاق وتكەلىن سالۋ جۇمىسى قارقىن العان. قالادا وڭ جاق وتكەلدەردىڭ جالپى قاجەتتىلىگى – 45 ورىن بولسا، 2021 جىلدىڭ جوسپارى بويىنشا 8 كوشەدەگى 10 ورىنعا وڭ جاق وتكەل سالىنۋدا.
اتاپ ايتقاندا، سىپىرعان اتا – ءال-فارابي، سىپىرعان اتا –تەمىرلان تاس جولىنىڭ قيىلىسى، رىسقۇلوۆ–ادىربەكوۆ، ارعىنبەكوۆ–وتەگەنوۆ، رىسقۇلوۆ–شاياحمەتوۆ، رىسقۇلوۆ –قازيەۆ، شاياحمەتوۆ–ارعىنبەكوۆ جانە ارعىنبەكوۆ–بايتەرەكوۆ كوشەلەرىنىڭ قيىلىسىنداعى قۇرىلىستى 3 مەردىگەر مەكەمە جۇمىس جۇرگىزۋدە.
قازىرگى ۋاقىتتا وڭ جاق وتكەلدەردىڭ سىپىرعان اتا–تەمىرلان تاس جولىنىڭ، ارعىنبەكوۆ–وتەگەنوۆ، رىسقۇلوۆ–شاياحمەتوۆ، رىسقۇلوۆ–قازيەۆ، شاياحمەتوۆ–ارعىنبەكوۆ قيىلىسىنداعى بولىكتەرى تولىق اياقتالىپ، جول بەلگىلەرى ورناتىلدى.
اتالعان كوشەلەردە جۇمىس بىتكەن سوڭ 60 جول بەلگىسى ورناتىلادى. وسى جىلدىڭ ءساۋىر ايىندا باستالعان وڭ جاق وتكەلدەردىڭ قۇرىلىس جۇمىستارىن جىل سوڭىندا اياقتاۋ جوسپارلانعان.
شىمكەنت قالاسى اكىمدىگىنىڭ ءباسپاسوز قىزمەتى
