ەل تاۋەلسىزدىگىنىڭ 30 جىلدىعىنا وراي شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «ايالى الاقان» مۇمكىندىگى شەكتەۋلى بالالاردى وڭالتۋ ورتالىعى اشىلدى. بۇل جوبا Nur Otan پارتياسىنىڭ 2021-2025 جىلدارعا ارنالعان «وزگەرىستەر جولى: بارشاعا لايىقتى ءومىر!» سايلاۋالدى باعدارلاماسىن ىسكە اسىرۋ اياسىندا جۇزەگە اسىرىلىپ وتىر.
ورتالىقتىڭ اشىلۋ راسىمىنە شىمكەنت قالالىق ءماسليحاتتىڭ حاتشىسى ب.نارىمبەتوۆ، Nur Otan پارتياسىنىڭ قالالىق فيليالى توراعاسىنىڭ ءبىرىنشى ورىنباسارى ج.بەكتاەۆا، اباي اۋدانىنىڭ اكىمى ب.پارمانوۆ، قالالىق ءماسليحات دەپۋتاتى ت.سۇلتانوۆا، Nur Otan پارتياسىنىڭ فيليالى جانىنداعى جۇمىسپەن قامتۋدى جانە حالىقتىڭ الەۋمەتتىك وسال توپتارىن قولداۋ جونىندەگى ايماقتىق قوعامدىق كەڭەس توراعاسى ب.كۋانىشبەكوۆ، بالالاردىڭ اتا-انالارى قاتىستى.
– الەۋمەتتىك جانە زايىرلى قوعامنىڭ باستى مىندەتى – ەرەكشە جاعدايداعى ازاماتتار مەن بالالارعا قولداۋ كورسەتۋ. وسىعان وراي، Nur Otan پارتياسىنىڭ سايلاۋالدى باعدارلاماسى اياسىندا مۇمكىندىگى شەكتەۋلى جانداردىڭ ەم الۋىنا قولايلى جاعداي تۋعىزۋ ماقساتىندا ەرەكشە كۇتىمدى قاجەت ەتەتىن بالالاردى وڭالتۋ ورتالىعىنىڭ جاڭا عيماراتىن پايدالانۋعا بەرىلىپ وتىر. مۇندا بالالاردى قوعامعا الەۋمەتتىك بەيىمدەۋ جانە وڭالتۋ جۇمىستارى جۇرگىزىلەدى. ورتالىقتا ستاتسيونار جاعدايدا 40-قا جۋىق بالاعا دەيىن قىزمەت كورسەتەدى، – دەيدى قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا.
«حالىققا الەۋمەتتىك قىزمەت كورسەتەتىن قالالىق اۋماقتىق ورتالىعى» مەكەمەسىنىڭ ىشىنەن اشىلعان ورتالىقتا تىرەك-قيمىل جانە جۇيكە جۇيەسىنىڭ دەرتىنە شالدىققان 18 جاسقا دەيىنگى بالالارعا تولىق ستاتسيونارلىق جاعدايدا الەۋمەتتىك، تۇرمىستىق، مەديتسينالىق، پسيحولوگيالىق، پەداگوگيكالىق، ەڭبەك، مادەني، ەكونوميكالىق، قۇقىقتىق قىزمەت تۇرلەرى كورسەتىلەدى. وسى ماقساتتا ەم-شارالىق، سپورتتىق جانە وزگە دە قىزمەت كورسەتەتىن بولمەلەرمەن جابدىقتالعان.
نۇرلان بەكتاەۆ
