بۇگىن وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىندە ۇجىمنىڭ ۇيىمداستىرۋىمەن "جىر ارقاۋى - تاۋەلسىزدىك" تاقىرىبىندا رەسپۋبليكالىق اقىندار ايتىسى ءوتتى. جىر دوداسى ەل تاۋەلسىزدىگىنىڭ 30 جىلدىعىنا، تۇڭعىش پرەزيدەنت كۇنى مەن قوعام قايراتكەرى ءو.جانىبەكوۆتىڭ 90 جىلدىعىنا ارنالدى.
ايتىسقا نۇر-سۇلتان، اقتوبە، وسكەمەن، تۇركىستان وبلىسى مەن شىمكەنت قالاسىنان 12 ايتىسكەر جاس اقىن قاتىستى.
ايتىسقا باتىربەك وتەپ اتىنداعى «ونەر» مەكتەبىنىڭ ديرەكتورى، ايتىسكەر اقىن مارجان ەسجانوۆا، كاريما ورالوۆا، «اقپارات سالاسىنىڭ ۇزدىگى»، اقىن قاجىمۇقان ابزالوۆ، قازاقستان جانە وزبەكستان جازۋشىلار وداعىنىڭ مۇشەسى، اقىن ءبورىباي ورازىمبەتوۆ، وقمپۋ-دىڭ «قازاق ءتىلى مەن ادەبيەتى» كافەدراسىنىڭ دوتسەنتى، فيلولوگيا عىلىمدارىنىڭ كانديداتى ناريمان نۇرپەيىسوۆ قازىلىق ەتتى.
ايتىستى وقۋ ورنىنىڭ رەكتورى گۇلجان سۇگىرباەۆا اشىپ، جاستارعا اق جول تىلەدى. جىر دوداسىن ايتىسكەر اقىنى ءبىرجان بايتۋوۆ جۇرگىزدى.
الدىمەن ايتىسقا نۇر-سۇلتاندىق داۋرەن ىسقاق پەن بالا اقىن اللاجار ساپارحان شىقتى. ايتا كەتەرلىگى، اللاجار ساپارحان «قاراتاۋ» ءداستۇرلى ونەر مەكتەبىنىڭ 4 سىنىپ وقۋشىسى. اتالمىش جۇپتىڭ ايتىسى كەزىندە بالا اقىننىڭ ايتىس ونەرىنە كورەرمەن ەرەكشە ىقىلاس ءبىلدىردى.
بۇدان ءارى، وقمپۋ-دىڭ تۇلەگى، ءارى اقىندار ۇيىرمەسىنىڭ جەتەكشىسى نۇرعالي ءاناپيا مەن شىعىستىڭ ءدۇلدۇلى ايشولپان تىلەۋتاي اراسىنداعى قىز بەن جىگىت ايتىسى دا كورەرمەندەردى ءبىر سىلكىنتىپ تاستادى. سونىمەن بىرگە، شىمكەنتتىك مەيىرجان جارىلقاپ پەن تۇركىستاندىق نۇرداۋلەت ومىربەكوۆ، شىمكەنتتىك ايان نيازبەك پەن ەلوردالىق مۇحيت باباقۇل، سونداي-اق، سايرامدىق جاندوس مىرزابەكوۆ پەن الماتى قالاسىنان كەلگەن ايىم اسىلبەكقىزى جانە شىمكەنتتىك ابىلاي قۇلتاي مەن اقتوبەلىك نارتاي تىلەۋقۇلداردىڭ ايتىستارى تارتىستى، ورنەكتى بولدى.
جۇرتتى جەلپىنتىپ، تىڭدارمانعا تۇيدەك-تۇيدەك ءسوز مارجانىن تارتۋ ەتكەن ايتىس قورىتىندىسى بويىنشا نارتاي تىلەۋقۇل، مۇحيت باباقۇل، ابىلاي قۇلتاي، جاندوس مىرزابەك، نۇرداۋلەت ومىربەك، مەيىرجان جارىلقاپ، داۋرەن ىسقاق اللاجار ساپارحان ايتىستىڭ ىنتالاندىرۋ سىيلىعىنا يە بولدى. سونداي-اق، اللاجار ساپارحان ىنتالاندىرۋ سىيلىعىنا قوسا قازىلار القاسىنىڭ ءتورايىمى مارجان ەسجانوۆانىڭ تاعايىنداعان 5و مىڭ تەڭگەسىن ولجالادى.
ال شىعىستان كەلگەن ايشولپان تولەۋتاي جۇلدەلى 3-ورىن الىپ، ەكى ءجۇز مىڭ تەڭگەگە، ايان نيازبەك 2-ورىن الىپ ءتورت ءجۇز مىڭ تەڭگەگە يە بولدى. الماتىلىق ارۋ ايىم اسىلبەكقىزى جۇلدەلى 1-ورىن الىپ، جەتى ءجۇز مىڭ تەڭگەگە قول جەتكىزدى.
ال باس جۇلدە ءۇشىن تىگىلگەن ءبىر ميلليون تەڭگە نۇرعالي اناپياعا بۇيىردى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
