تاۋەلسىزدىكتىڭ 30 جىلدىعىنىڭ قارساڭىندا شىمكەنت قالاسىنداعى ورتالىق ساياباقتا مەملەكەت جانە قوعام قايراتكەرى وزبەكالى جانىبەكوۆتىڭ كومپوزيتسيالىق ءمۇسىنى ورناتىلدى. ەسكەرتكىشتىڭ اشىلۋ سالتاناتىنا قالا اكىمى مۇرات ايتەنوۆ پەن زيالى قاۋىم وكىلدەرى قاتىستى.
–شىمكەنتتە كۇنى كەشە ايگىلى رەجيسسەر جۇمات ءشانيننىڭ ەسكەرتكىشى اشىلسا، بۇگىن مەملەكەت جانە قوعام قايراتكەرى وزبەكالى جانىبەكوۆتىڭ ءمۇسىنى ورناتىلدى. وزبەكالى جانىبەكوۆ حح عاسىردا قازاق حالقىنىڭ سالت-ءداستۇرى مەن مادەنيەتىن قايتا تۇلەتىپ، ۇلتىمىزدىڭ مادەني-رۋحاني مۇراسىن ساقتاۋ جولىندا ايانباي ەڭبەك ەتكەن تاريحي تۇلعالاردىڭ ءبىرى دە بىرەگەيى. بارشاڭىزدى قالامىزدىڭ مادەني-رۋحاني ومىرىندەگى وسىناۋ ەلەۋلى وقيعامەن قۇتتىقتايمىن. مەملەكەتىمىزدىڭ ماڭىزدى تاريحي بەلەسى – تاۋەلسىزدىگىمىزدىڭ 30 جىلدىعى قارساڭىندا اشىلعان بۇل ەسكەرتكىش بۇگىنگى ۇرپاقتىڭ ۇلت ازاماتىنا كورسەتكەن زور قۇرمەتى دەپ بىلەمىن، –دەدى مۇرات دۇيسەنبەكۇلى.
وزبەكالى جانىبەكوۆتىڭ باستاماسىمەن قازاقستاننىڭ كوپتەگەن قالالارىندا ەتنوگرافيالىق مۇراجايلار اشىلعان. قازاقستاننىڭ تاريحي جانە مادەني ەسكەرتكىشتەرىن ساقتاۋ مەن قالپىنا كەلتىرۋ ماقساتىن كوزدەگەن “ارقاس” قوعامى قۇرىلعان. ول كىسى ءوزى تىكەلەي ارالاسىپ ءجۇرىپ 17 مىڭنان استام تاريحي-مادەني ەسكەرتكىشتەردى تۇگەلدەپ، قۇجاتتارىن رەتكە كەلتىرىپ، مەملەكەتتىڭ قاراۋىنا قالدىرىپتى. سونىمەن بىرگە “شەرتەر”، ادىرنا”، “التىناي” جانە تاعى باسقا فولكلورلىق ونەر انسامبلدەرىن ۇيىمداستىرعان. مۇنىڭ بارلىعى جانىبەكوۆتىڭ قازاق ەتنوگرافياسى مەن فولكلورلىق ونەرىنە، جالپى مادەنيەتىنە سىڭىرگەن ەڭبەگىنىڭ ءبىر پاراسى عانا.
ايتا كەتەيىك، سالتاناتتى شاراعا شىمكەنت قالاسى ءماسليحاتىنىڭ حاتشىسى باحادىر نارىمبەتوۆ، حالىقارالىق «الاش» ادەبي سىيلىعىنىڭ لاۋرەاتى، جازۋشى مارحابات بايعۇت، «پاراسات» وردەنىنىڭ يەگەرى ءحانبيبى ەسەنقاراقىزى، قوعام قايراتكەرىنىڭ ۇرپاقتارى مەن عالىمدار، تاعى باسقا زيالى قاۋىم وكىلدەرى قاتىستى.
سونداي-اق، وزبەكالى جانىبەكوۆتىڭ 90 جىلدىعىنا وراي شىمكەنت قالاسىنىڭ «ادەت-عۇرىپ جانە سالت-ءداستۇر ورتالىعىندا» قوعام قايراتكەرىنىڭ ءومىر جولىن باياندايتىن «دارا» اتتى دەرەكتى ءفيلمنىڭ تۇساۋكەسەر ءراسىمى ءوتتى.
ايدار قۇلجانوۆ،
فوتو سەرىك قوساەۆ
