شىمكەنتتە تاعى ءۇش كىتاپحانا جاڭارتىلدى

«Nur Otan» پارتياسىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسى اياسىندا شىمكەنتتە ورتالىقتاندىرىلعان كىتاپحانالار جۇيەسى نىساندارىن مودەرنيزاتسيالاۋ ءساتتى جۇرگىزىلۋدە. ەل تاۋەلسىزدىگىنىڭ 30 جىلدىق مەرەيتويى قارساڭىندا، شىمكەنت قالاسىندا تاعى ءۇش كىتاپحاناعا كۇردەلى جوندەۋ جۇمىستارى جۇرگىزىلىپ، قايتا جاڭارتىلدى. سولاردىڭ العاشقىسى ش.قالداياقوۆ كوشەسىندە ورنالاسقان №2 كىتاپحانا. اتالعان كىتاپحانا قازاق ۆالسىنىڭ كارولى، اتاقتى سازگەر ش.قالداياقوۆ تۇرعان تۇرعىن ۇيدە ورىن تەپكەن. جاڭارۋدان وتكەن كىتاپحانانىڭ اشىلۋ ءىس-شاراسىنا شىمكەنت قالاسى ءماسليحاتىنىڭ حاتشىسى باحادىر نارىمبەتوۆ، اكىمىنىڭ ءبىرىنشى ورىنباسارى ش.مۇقان، ءماسليحات دەپۋتتاتتارى مەن ش.قالداياقوۆتىڭ تۋعان قارىنداسى رايحان قالداياقوۆا قاتىستى. جينالعاندار الدىمەن كىتاپحانا الدىندا تۇرعان ش.قالداياقوۆتىڭ ەسكەرتكىش- بيۋستىنا گۇل شوقتارىن قويىپ، سازگەردىڭ رۋحىنا تاعزىم ەتتى. ودان كەيىن قوناقتار قايتا جاساقتالعان كىتاپحانانى ارالاپ، اتقارىلعان جۇمىستاردىڭ ناتيجەسىمەن تانىستى. جاڭارعان كىتاپحانادا جاڭا وقۋ ايماقتارى، كىتاپ جانە وقىرماندار زالى، «Art Community Space» زالىنىڭ جاڭا جۇمىس جۇيەسى ىسكە قوسىلعان. كىتاپحانا تەك كىتاپ وقيتىن ورىن عانا ەمەس، سونىمەن قاتار وقىرماندار وزدەرىنىڭ شىعارماشىلىق الەۋەتىن ىسكە اسىراتىن، دەمالىپ جۇزدەسەتىن ورىنعا اينالعان. مودەرنيزاتسيادان ءوتىپ، ەل يگىلى ءۇشىن قايتا پايدالانۋعا بەرىلگەن كىتاپحانانى مۇقيات ارالاپ شىققان حالىق قالاۋلىلارى ۇجىمعا ساتتىلىك تىلەدى. سونداي-اق دەپۋتاتتار قالاداعى №2 بالالار كىتاپحاناسى مەن №5 ورتالىقتانعان كىتاپحانالارداعى جاڭارتىلۋ جۇمىستارىنا كۋا بولدى. ايتا كەتەيىك، شىمكەنت قالاسىنىڭ اكىمى مۇرات ايتەنوۆتىڭ باستاماسىمەن بيىل شىمكەنتتە 10 كىتاپحانانى جاڭارتۋ جوسپارلانعان بولاتىن.