تۇركيادا قازاقستان تاۋەلسىزدىگىنىڭ 30 جىلدىعىنا ارنالعان ءىس-شارالار جالعاسىپ جاتىر، دەپ حابارلايدى، "ادىرنا" ۇلتتىق پورتالى.
بۇل جولى ىشكى انادولىدا ورنالاسقان توكات قالاسىندا «قوجا احمەت ياسساۋي جولى مەن نۇرسۇلتان نازارباەۆ» اتتى كونفەرەنتسيا ۇيىمداستىرىلدى.
ءىس-شاراعا اتالعان ولكەنىڭ گۋبەرناتورى وزان بالجى، قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەكۇلى، توكات قالاسى كەڭەسىنىڭ مۇشەلەرى مەن تۇرعىندارى قاتىستى.
القالى جيىن قوجا احمەت ءياسساۋيدىڭ «ديۋاني-حيكمەت» شىعارماسى جانە ونىڭ كۇللى تۇركى جۇرتىنىڭ مۇسىلماندىق تۇسىنىگىنە قوسقان ۇلەسى قوزعالدى. سونىمەن قاتار ەلباسى نۇرسۇلتان نازارباەۆتىڭ جاھاندىق باستامالارى، ونىڭ ىشىندە تۇركى دۇنيەسى ىقپالداستىعىن دامىتۋداعى ءرولى جان-جاقتى ايتىلدى.
«قازاقستاننىڭ تاۋەلسىزدىگى بۇكىل تۇركى جۇرتى ءۇشىن ماڭىزدى. ويتكەنى، ول - اتاجۇرتىمىز. ەۋرازيانىڭ جارقىراعان جۇلدىزى - قازاقستاننىڭ قۋاتى، ءبىزدىڭ دە قۋاتىمىز. ازاتتىعى - ءبىزدىڭ دە ازاتتىعىمىز. ارقاشان دا سولاي بولسىن! ەكى ەل اراسىندا بارلىق سالاداعى ىنتىماقتاستىعىمىز ارتىپ، قازاق-تۇرىك قاتىناستارى تورتكۇل دۇنيەگە ۇلگى بولسىن!»، - دەدى توكات گۋبەرناتورى وزان بالجى.
