اۋعانستاندا بيلىكتى باسىپ العان «تاليبان» قوزعالىسىنا قارسى سوعىسىپ جاتقان اۋعانستاننىڭ ۇلتتىق قارسىلاسۋ مايدانىنىڭ جاۋىنگەرلەرى سوڭعى 8 كۇندە 61 تاليبان سودىرىن ءولتىردى. تاعى 42 تاليب جارالانعان. بۇل تۋرالى ماسۋد جاساقتارى حابارلادى.
ماسۋد جاساقتارى تاليبانعا قارسى 16 پروۆينتسيادا ارنايى وپەراتسيا وتكىزگەن. باعلان، پاندجشير، كابۋل، كاپيس، سامانگان، تاحار، پارۆان، بادگيس، لاعمان، بالح، فارياب، گازني، گور، گەرات، نانگارحار جانە كۋنار ايماقتارىندا پارتيزاندىق سوعىس تاسىلدەرى تابىستى بولىپ، تالىبتەر ۇلكەن شىعىنعا ۇشىراعان.
«جاۋ كابۋل، كاپيس، باعلان جانە پاندجشير پروۆينتسيالارىندا ەڭ كوپ شىعىنعا ۇشىرادى. ۇلتتىق قارسىلاسۋ مايدانى بۇل وپەراتسيالاردى شەبەرلىكپەن ۇيىمداستىرعاندىقتان، بەيبىت تۇرعىنداردىڭ ەشقايسىسى زارداپ شەكپەدى. وپەراتسيالاردا ءبىزدىڭ ەكى ەرجۇرەك ساربازىمىز قازا تاۋىپ، تاعى ۇشەۋى جارالاندى»، - دەدى ماسۋد جاساقتارىنىڭ ارنايى وكىلدەرى.
ماسۋد جاساقتارى بۇگىندە اۋعانستاننىڭ بارلىق ايماعىندا بار دەگەن اقپاراتتار كەزدەسەدى. ولار اشىق سوعىسپاي، پارتيزاندىق سوعىس ادىسىنە كوشكەنى ايتىلۋدا.
"ادىرنا" ۇلتتىق پورتالى
