«بولاشاق» حالىقارالىق ستيپەندياسىنا قۇجاتتار قابىلداۋ جانە كونكۋرس وتكىزۋ مەرزىمدەرى بەكىتىلدى، دەپ «حالىقارالىق باعدارلامالار ورتالىعى» اق سايتى حابارلايدى.
قر ءبىلىم جانە عىلىم ءمينيسترىنىڭ 2018 جىلعى 6 ناۋرىزداعى № 86 «بولاشاق» حالىقارالىق ستيپەندياسىن ىسكە اسىرۋ جونىندەگى كەيبىر شارالار تۋرالى» بۇيرىعىنا سايكەس «بولاشاق» حالىقارالىق ستيپەندياسىنا قۇجاتتار قابىلداۋ 2018 جىلعى 19 ناۋرىز بەن 31 تامىز ارالىعىندا ىسكە اسىرىلادى. سونداي-اق كونكۋرستىق ءىس-شارالار 2018 جىلعى 26 ناۋرىز بەن 20 قازان ارالىعىندا وتەدى.
ايتا كەتەرلىگى، قازاقستاندىقتار ءۇشىن ءبىلىم سالاسىنداعى ۇكىمەتارالىق كەلىسىمشارتتار نەگىزىندە شەت ەلدە تەگىن ءبىلىم الۋدىڭ مۇمكىندىكتەرى قاراستىرىلعان. بيىلعى جىلى تۇلەكتەر ءۇشىن 10 000-عا جۋىق گرانت ءبولىندى. قازىرگى تاڭدا رەسەي، قىتاي، مالايزيا، تۇركيا جانە پولشا ۋنيۆەرسيتەتتەرى گرانتتارىنا قۇجاتتار قابىلداۋ ءجۇرىپ جاتىر.
bilim-all.kz
