«ادىرنا» ۇلتتىق پورتالى 2021 جىل بويىنشا ءوز سالاسىنىڭ ۇزدىكتەرىن انىقتادى. «جىل ۇزدىكتەرىن» انىقتاۋ الەۋمەتتىك جەلى پاراقشالارىنداعى داۋىس بەرۋ ارقىلى ىسكە استى. بىرنەشە باعىت بويىنشا ۇيىمداستىرىلعان ساۋالناما ءبىر اپتا بويى جۇرگىزىلدى.
«2021 جىلدىڭ ۇزدىك دەپۋتاتى» بولىپ ءماجىلىس دەپۋتاتى قازىبەك يسا اتاندى. قازىبەك يسا پارلامەنت مىنبەرىنەن مەملەكەتتىك ءتىلدى دامىتۋ، جەر-سۋ اتاۋلارىنا تاريحي اتاۋلارىن قايتارۋ، الاش ارىستارىن ۇلىقتاۋعا قاتىستى وتكىر ۇسىنىستار جاساپ ءجۇر.
«2021 جىلدىڭ ۇزدىك ۇستازى» - اياتجان احمەتجانۇلى. اياتجان احمەتجانۇلى رەسپۋبليكالىق «Qazbilim» ورتالىعىنىڭ نەگىزىن قالاۋشى، نۇر-سۇلتان قالاسى قايىم مۇحامەدحانوۆ اتىنداعى 90-گيمنازيانىڭ ديرەكتورى، ۇستاز، حيميك.
«2021 جىلدىڭ ۇزدىك قارجى ساراپشىسى» - ماقسات حالىق. ماقسات ەلىمىزگە بەلگىلى ەكونوميست، قارجى سالاسىندا وتكىر بولجامدار جاساپ، ەلىمىز ءۇشىن ەۋرازيالىق ەكونوميكالىق وداقتىڭ ءتيىمسىز ەكەنىن قارجىلىق ەسەپتەۋلەر ارقىلى كورسەتىپ ءجۇر.
«2021 جىلدىڭ ۇزدىك ساياسي ساراپشىسى» - دوسىم ساتپاەۆ. بەلگىلى ساياساتتانۋشى، بىرنەشە كىتاپتىڭ اۆتورى، ەل تاريحىنا قاتىستى ەڭبەكتەردى باسىپ شىعارۋعا اتسالىپ جۇرگەن قايراتكەر.
«2021 جىلدىڭ ۇزدىك كۇرەسكەرى» - ارون اتابەك. ارون اتابەك "شاڭىراق وقيعاسى" بويىنشا ديسسيدەنت اتانىپ، 15 جىلىن تۇرمەدە وتكىزگەن كۇرەسكەر. 2021 جىلدىڭ 1-قازانىندا دەنساۋلىعىنا بايلانىستى اباقتىدان بوساتىلىپ، 24-قاراشادا كوز جۇمدى.
«2021 جىلدىڭ ۇزدىك سپورتشىسى» - ساكەن بيبوسىنوۆ. ساكەن بوكسشى، اسا جەڭىل سالماقتا ونەر كورسەتەدى. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى. 2020 جىلعى وليمپيادا ويىندارىنىڭ قولا جۇلدەگەرى، 2019 جىلعى الەم چەمپيوناتىنىڭ قولا جۇلدەگەرى. 2021 جىلى بەلگرادتا وتكەن الەم چەمپيوناتىندا التىن جۇلدەگە يە بولدى.
«2021 جىلدىڭ ۇزدىك ءجۋرناليسى» - نارتاي ارالبايۇلى. جۋرناليست، «Qazaqstan» تەلەارناسىنداعى بىرنەشە باعدارلامانىڭ جۇرگىزۋشىسى، ارنايى YouTube كانالى ارقىلى ساراپتامالىق شولۋ جاسايدى.
«2021 جىلدىڭ ۇزدىك ءمينيسترى» - اسحات ايماعامبەتوۆ. مەملەكەت قايراتكەرى، 2019 جىل 13 ماۋسىمنان باستاپ قازاقستان رەسپۋبليكاسى ءبىلىم جانە عىلىم ءمينيسترى. ەلدەگى ءبىلىم سالاسىنا رەفورما جاساۋدا.
«2021 جىلدىڭ ۇزدىك ءتىل جاناشىرى» - رۋزا بەيسەنبايتەگى. مەملەكەتتىك ءتىلدى كوتەرۋ بويىنشا بەلسەندى، ءتىل جاناشىرى.
«ۇلتىم دەپ سوققان جۇرەك – 2021» - قۋات احمەتوۆ. قۋات ء"تىل مايدانى" اتتى YouTube ارناسىمەن مەملەكەتتىك ءتىلدىڭ ساۋدا ورتالىقتارىندا دۇرىس ساقتالۋىن تەكسەرگەن ءتىل جاناشىرى، بەلسەندى. رەسەي قىسىمىنىڭ اسەرىنەن قازاقستاننان كەتۋگە ءماجبۇر بولعان ازامات.
"ادىرنا" ۇلتتىق پورتالى
