توقاەۆ: سودىرلار ساقالىن قىرىپ، كيىمىن اۋىستىرىپ العان

2164
Adyrna.kz Telegram

پرەزيدەنت قاسىم-جومارت توقاەۆ جاپپاي تارتىپسىزدىكتەرگە قاتىسقان سودىرلار جاسىرىنۋ ءۇشىن ساقالىن قىرىپ، كيىمىن اۋىستىرىپ العانىن ايتتى. بۇل تۋرالى Tengrinews.kzكە سىلتەمە جاساپ "ادىرنا" ۇلتتىق پورتالى حابارلايدى.  

ۇجىمدىق قاۋىپسىزدىك تۋرالى شارت ۇيىمىنىڭ سەسسياسىندا توقاەۆ قازىرگى ۋاقىتتا قازاقستاندا كونستيتۋتسيالىق ءتارتىپ قالىپقا كەلگەنىن، قاۋىپتىڭ الدى الىنعانىن مالىمدەدى.

"تەرروريزمگە قارسى وپەراتسيا اياسىندا قىلمىستارعا قاتىسقان ادامدار انىقتالىپ جاتىر. بۇگىندە پوليتسياعا 8 مىڭنان اسا ادام جەتكىزىلدى. قۇقىق قورعاۋ جانە ارنايى ورگاندار ولاردىڭ تەرروريزمگە، ادام ءولتىرۋ، توناۋ جانە باسقا دا قىلمىستارعا قاتىسى بار-جوعىن انىقتاپ جاتىر.

جاسىرىن شابۋىلداۋشىلاردى انىقتاۋ ماقساتىندا جوسپار جاسالىپ جاتىر. ولار ەرەكشە تۇردە جاسىرىنادى - ازاماتتىق كيىم كيەدى، ساقالدارىن قىرادى. قارقىندى جۇمىس ىستەۋ قاجەت", - دەدى توقاەۆ.

ونىڭ ايتۋىنشا، ءبىرىنشى كەزەكتە بەيبىت شەرۋلەر وتكەن.

"كەيىن الماتىدا ساياسي ميتينگىلەر ءوتتى. سودان سوڭ قالاعا ءۇش باعىتتان قارۋلى كۇشتەر باسىپ كىردى. باسىندا وزدەرىن بەيبىت دەمونسترانتتار سەكىلدى ۇستاپ، تۇرعىنداردى ارانداتتى. كەيىن تاريحتا الماتى تراگەدياسى دەگەن اتپەن قالاتىن وقيعا باستالدى", - دەدى مەملەكەت باسشىسى.

"ادىرنا" ۇلتتىق پورتالى

پىكىرلەر