اۋىر سىننان امان وتكەنىمىز — پرەزيدەنتكە ناعىز سەنىم ارتۋ!
ەل قامىن ويلاعان ەرەۋىلشىلەر مەن ەلگە قارسى لاڭكەستەردى ايىرا بىلەيىك!
وتان مۇددەسىنەن
وليگارحتار مۇددەسىن ارتىق كورۋ نەگە اپارىپ سوقتى؟!.
ءتىل بولماعان جەردە ءدىل بولمايدى!
ءدىل بولماسا، دىم بولمايدى!
جاڭا جىلدىڭ العاشقى اپتاسى — تاۋەلسىز مەملەكەتىمىزگە قاتەر تونگەن، توڭكەرىس جاساۋعا ۇمتىلعان اسا اۋىر كۇندەر، «قاڭتاردىڭ قاندى اپتاسى» بولدى!
- قازاقستان پرەزيدەنتى ق.توقاەۆ ەل باسىنا كۇن تۋعاندا — ەر باسىنا كۇن تۋعان بارلىق اۋىر سىناقتى مەملەكەت باسشىسى رەتىندە كوتەرە ءبىلىپ، ەلىن امان ساقتاپ قالدى!
وسى ەل تاعدىرى شەشىلگەن اۋىر كۇندەردە پرەزيدەنت توقاەۆتى حالىقتىڭ قولداپ، ۇلكەن سەنىم ارتۋى — پرەزيدەنت سايلاۋىنان كەيىنگى، ەل باسىنا كۇن تۋعانداعى اۋىر سىناقتان وتكەن ناعىز سەنىم ارتۋ بولدى — جانە ول سەنىم ابىرويمەن اقتالدى!
مەملەكەت باسشىسى قاسىم-جومارت توقاەۆ ەل ەرگە قاراعاندا، جەرگە قاراماي، ەر ەكەنىن كورسەتتى — تاۋەلسىز ەلدى ساقتاپ قالدى!
پرەزيدەنت ەلگە ايقىن گارانت ەكەنىن انىق كورسەتتى!
ەل قامىن ويلاعان ەرەۋىلشىلەر مەن ەلگە قارسى لاڭكەستەردى ايىرا بىلەيىك!
- ءبىز ەڭ الدىمەن ارنارسەنى انىقتاپ الىپ، ءوز اتىمەن اتاۋىمىز كەرەك!
ەل قامى ءۇشىن ەرەۋىلگە شىققاندار مەن مەملەكەتكە قارسى لاڭكەستىكتى، حالىققا قارسى قاراقشىلىقتىڭ باسىن ايىرىپ الۋىمىز كەرەك!
ويتكەنى ەل قامى ءۇشىن ەرەۋىلگە شىققاندار
— ەلگە قارسى سوعىسپايدى; ەشكىمدى ولتىرمەيدى; اۋرۋحاناعا، جەدەلجاردەمگە، اكىمشىلىك ورىندارعا، پوليتسياعا، قۇزىرلى ورىندارعا، بانكىگە، دۇكەندەرگە، مادەني ورىندارعا، حالىقتىڭ مۇلكىنە، كولىگىنە شابۋىل جاساپ، ورتەپ جىبەرمەيدى!
— تەلەارنالارعا شابۋىل جاساپ، ەل تاريحىنىڭ التىن قورىن ورتەپ جىبەرمەيدى.
— دارىگەرلەردى، ناۋقاستاردى، جەدەلجاردەمدى، قىزىل كرەست، جارتى اي قىزمەتكەرلەرىن قانداي سوعىس كەزىندە دە ەشكىم ۇرىپ-سوعىپ، تونامايدى!
الماتىدا پوليتسيا مەن اسكەردەن 18 بوزداق ءولتىرىلدى، ەكى پوليتسيانىڭ باسىن كەسىپ العان. مىڭنان اسا ادام جاراقات العان، جۇزگە جۋىعى جانساقتاۋ بولىمدەرىندە جاتىر. ولاردىڭ 200-دەيى ايەلدەر مەن قىزدار!
بۇل قازا تاپقاندار، اۋىر جاراقات الىپ، تونالعاندار، ءبىزدىڭ باۋىرلارىمىز، انالارىمىز، اپكە-قارىنداستارىمىز، قىزدارىمىز ەمەس پە؟!.
بۇنداي جاۋىز قانىشەرلىكتى قالاي جازاسىز قالدىرۋعا بولادى؟
مادەني وردامىز — ارۋ قالامىز الماتىنىڭ تاس-تالقانىن شىعارعان سوعىس بولدى، ءالى باسىلا قويعان جوق!
ءتىپتى، بەس تەلەارنانى باسىپ الىپ، «قازاقستان» ۇلتتىق ارنانى، ورداعى التىن قورىمىزدى، ياعني، ءوز تاريحىمىزدى ورتەپ، توناۋشىلار ىشىندە ولاردى باستاپ، ساقالى ساپسيعان، وزدەرىن «ساياساتكەر» سانايتىن، «اڭقاۋ ەلگە ارامزا مولدالار» جۇرگەنىنە نە دەۋگە بولادى؟! بۇلار سوندا ءوزىمىزدىڭ ۇلتتىق قۇندىلىقتارىمىزعا، ءوز تاريحىمىزعا، مەملەكەتىمىزگە قارسىلار ما؟!
«اق جول» تالاي ەسكەرتكەن ەرەۋىلشىلەر تالابى ەندى ورىندالدى!
- ەرەۋىلگە شىققانداردىڭ تالابىن بيلىك ورىندادى. گازدىڭ باعاسىن ءتۇسىرىپ، جانار-جاعارماي، ازىق-تۇلىك باعاسىن ءتۇسىرىپ، بىرقالىپتا ۇستاۋ تۋرالى شەشىم قابىلداندى.
ۇكىمەتكە بۇل ەلدىڭ نارازىلىعىن تۋدىرعان ماسەلەنى پارلامەنت، «اق جول» فراكتسياسى وسىدان ەكى اي جانە ءۇش اي بۇرىن ەسكەرتىپ، 2 رەت دەپۋتاتتىق ساۋال جاساپ، گاز بەن جانار-جاعارماي باعالارىن بۇرىنعى قالپىنا ءتۇسىرۋ تۋرالى تالاپ ەتكەن بولاتىن. ايتپەسە، حالىق نارازىلىعى ءورشي بەرەتىنىن قاداپ ايتقان بولاتىنبىز. ۇكىمەت بىراق بۇدان دۇرىس قورىتىندى جاسامادى. «قاتىرامىز» دەپ، اقىرى قاتىپ قالدى…
پرەزيدەنت بۇنداي ۇكىمەتتى وتستاۆكاعا جىبەرىپ دۇرىس جاسادى.
وتان مۇددەسىنەن وليگارحتار مۇددەسىن ارتىق كورۋدىڭ سوڭى نەگە اپارىپ، سوققانىنا ءبارىمىز كۋا بولدىق!..
- جاڭاوزەننەن باستالعان ەرەۋىل الدىمەن ەلدىڭ الەۋمەتتىك-ەكونوميكالىق جاعدايىنىڭ قيىندىعىنا بايلانىستى باستالدى.
ءيا، ەلدىڭ جاعدايى ءماز ەمەس. اركىمنىڭ باسىندا نەسيە قارىزى بار. نەسيەسىن تولەي الماي جالعىز باسپاناسىنان ايرىلىپ، بالا-شاعاسىمەن دالادا قالىپ جاتقاندار كوپ. وسىنداي قيىندىقتارعا بايلانىستى ءبىز، «اق جول» فراكتسياسى بانكىلەردىڭ باسىمدىعىنان كەدەيلەردى قۇتقارۋ ءۇشىن جەكە ادامداردىڭ بانكروتتىعى تۋرالى زاڭ قابىلداۋدى وسىدان 9 جىل بۇرىن، 2013 جىلى ۇسىندىق پارلامەنتتە. ۇكىمەت قارسى بولدى. ەندى مىنە، كەشە پرەزيدەنتتىڭ ءوزى تاپسىرما بەردى وسى زاڭدى قابىلداۋ تۋرالى.
سونىمەن قاتار الەۋمەتتىك جاعدايى قيىن وتباسىلاردىڭ باسپانا جالداۋ اقىسىن سۋبسيديالاۋ دا قولعا الىناتىن بولدى.
- ءبىز جاڭاوزەندە ەرەۋىل باستالعان كۇننىڭ ەرتەڭىنە 3 قاڭتاردا ءبىر تاۋلىككە جەتپەي «حالىقتىڭ ورىندى تالابى ورىندالۋى ءتيىس» دەپ جازدىق. ەل تالابى ورىندالدى.
- ەندى وسى ەلدىڭ تالاپتارىنىڭ ورىندالۋى ءۇشىن ەل تىنىشتىعى كەرەك ەڭ الدىمەن! ياعني، ەڭ ءبىرىنشى تىنىشتىقتى قالپىنا كەلتىرۋىمىز قاجەت!
تىنىشتىق بولعاندا عانا ىرىس-قۇت ورنايدى!
بىرلىك بولعاندا عانا تىرلىك بولادى!
مەملەكەتتى، حالىقتى قورعاۋ ءۇشىن قاتاڭ شارالاردى قولدايمىز!
«مالى جوعالماعاننىڭ ءبارى اقىلدى»
- ءبىز حالىقتى، مەملەكەتتى قورعاۋ ءۇشىن پرەزيدەنتتىڭ بارلىق قاجەتتى قاتال شارالارعا بارۋىن قولداپ، قۋاتتايمىز!
حالىقتى قورعاۋدا ەشقانداي ىركىلۋ-كىدىرۋ، بولماۋى كەرەكتىگىن، ءار كۇن ەمەس، ءار ساعات، ءاربىر ءسات قىمبات ەكەنىنە كوز جەتكىزدىك. ءبىر كۇن كەشىگۋدىڭ ءوزى قانشاما ادامي جانە ماتەريالدىق زور شىعىنعا اكەلدى.
پرەزيدەنت توقاەۆ كەشەگى ۇندەۋىندە «كەيبىر شەت مەملەكەتتەر تاراپتار كەلىسىمگە كەلۋى كەرەك» — دەپ، ءدارىس وقىعانىن وتكىر سىناپ، باتىل قايتارىپ تاستادى. وتە دۇرىس! ءيا، حالىقتى قىرىپ، قاندى قىرعىن جاساعان قىلمىسكەرلەرمەن قانداي كەلىسىم بولۋى كەرەك!؟ «مالى جوعالماعاننىڭ — ءبارى اقىلدى» دەيدى بۇنى اتام قازاق.
«مەدالدىڭ ەكى جاعى بار» دەگەندەي، «شاش ال دەسە، باس الۋعا» جالعاسىپ، ەندى جازىقسىز جاستار جازاعا ءىلىنىپ كەتپەۋى ءتيىس! بىزدە سان قۋالاپ، جوسپار ورىنداۋ دەگەن كەلەڭسىزدىكتەر بۇرىن دا بولعان.
- جاڭاوزەندە ەرەۋىل باستالعان كۇننەن كەيىن 4 قاڭتاردا ءبىز «اق جول» پارتياسى فراكتسيا جيىنىن وتكىزىپ، ەلدى تىنىشتىققا شاقىردىق.
پارتيا توراعاسى، ءماجىلىس دەپۋتاتى ازات پەرۋاشەۆ ينتەرنەت جوق بولسا دا، ءار وڭىرگە تەلەفون ارقىلى حابارلاسىپ، قيىندىق قۇرساۋىندا قالعان ەلگە كومەكتەسۋ ءۇشىن ۇيلەستىرۋ جۇمىسىن باسقارىپ وتىردى. كەشە 7 قاڭتاردا دا پارتيانىڭ كەڭەيتىلگەن پرەزيدۋىمى ەكى رەت جينالىپ، پرەزيدەنت شەشىمدەرى مەن ۇندەۋىن قولداپ، مالىمدەمە جاسادىق.
دەپۋتاتتارىمىز ماڭعىستاۋعا، الماتىعا، شىمكەنتكە، تۇركىستان وبلىسىنا جانە ءار وڭىرگە بارىپ، ەلدىڭ ىشىندە بولىپ، حالىق ءۇنىن تىڭداپ، تىنىشتىققا، بىرلىككە شاقىرۋ تۋرالى ۇسىنىس جاسادىق. توتەنشە جاعدايدا شىعۋعا رۇقسات بەرىلمەدى.
ايماقتاردا دا اقجولدىقتار مەملەكەت باسىنا تۇسكەن اۋىرتپاشىلىقتاردى ەلمەن بىرگە كوتەرىسىپ جاتىر. اقتوبە وبلىسى فيليالى توراعاسى اسقار سادىق توقتاپ قالعان پويىزداعى 700-دەي جولاۋشىنى تاماقتاندىرۋدى ۇيىمداستىردى. شىمكەنت قالاسى فيليالى باسشىسى ءالىمحان ءابجانوۆ پەن وبلىستىق ءماسليحات دەپۋتاتى نويان تولەگەنوۆتەر شىمكەنت قالالىق اكىمشىلىگىمەن تىعىز بايلانىستا جۇمىس ىستەپ، حالىقتى، مەملەكەتتىك نىسانداردى قورعايتىن مىڭعا جۋىق ەرىكتى جاساق جاساقتادى. 300-دەي اسكەر ساربازدارىن تاماقتاندىردى. جامبىل وبلىستىق فيليالى توراعاسى مۇقان شالقاربەك شۋ قالاسىن لاڭكەستەر مەن سودىرلاردان قورعاۋدا جىگىتتەردىڭ باسىن قوسا ءبىلدى.
الماتىدا ارمان يسمايلوۆ اۋرۋحانانى قورعاۋعا تىرىستى.
اقتاۋ مەن الماتىداعى ەرەۋىلدىڭ ايىرماشىلىعى
- جاڭاوزەن مەن اقتاۋدا ەرەۋىلگە شىققان ەل نەگە تىپ-تىنىش تۇرىپ، توناۋ مەن قاراقشىلىق جاساماي، ەشقانداي ارانداتۋعا ەرمەدى؟ ويتكەنى، ولار سول جەردىڭ تۇرعىندارى! ءوز جەرىن وزدەرى تالقانداي ما؟ ال الماتى مەن تالدىقورعاندا، تارازدا، شىمكەنت پەن قىزىلوردادا، سەمەيدە جانە تب جەرلەردە ەرەۋىلگە ارنايى دايىندىقتان وتكەن سودىرلار، باسقا جاقتان كەلگەن «لەگيونەرلەر» باسشىلىق جاسادى. سوندىقتان، قالالاردى تاس-تالقان ەتتى.
پرەزيدەنت كەشەگى ۇندەۋىندە تەك الماتىنىڭ وزىندە 20 مىڭ لاڭكەستەر مەن سودىرلار سويقان سالعانىن مالىمدەدى.
- ال وسى سىرتتان كەلگەن، بارلىق دايىندىقتان وتكەن قاپتاعان لاڭكەستەر مەن سودىرلار ەلىمىزگە قالاي كىرگەن؟ ەلىمىزدە مەملەكەتكە قارسى توڭكەرىس ۇيىمداستىرىلۋىنا ءبىزدىڭ ارناۋلى ورگاندار نەگە جول بەرگەن؟
بۇل تۋرالى مەملەكەت باسشىسى ۇندەۋىندە اشىق ايتىپ، قاتال سىنادى.
ءيا، ۇلتتىق قاۋىپسىزدىك كوميتەتى قايدا قاراعان، ايعا قاراعان با؟ ۇلتتىق قاۋىپسىزدىك ورگانى ۇلتقا قاۋىپتى لاڭكەستەرگە توسقاۋىل قويۋ كەرەك ەمەس پە؟
ءبىز، «اق جول» پارتياسى تالاي جىلدان بەرى ءدىن تۋرالى زاڭعا راديكالدى تەرىس اعىمدارعا توسقاۋىل قويۋ تۋرالى باپ ەنگىزۋ جايلى ۇسىنىس جاساپ كەلەمىز. ءبىراز جىل بۇرىن بۇل ماسەلەنى بيلىك تە قولعا الىپ، بارلىق مينيسترلىك پەن ۆەدوموستۆولار، باس پروكۋراتۋرا مەن جوعارى سوت تا قولداعاندا، تەك ۇلتتىق قاۋىپسىزدىك كوميتەتى كەلىسپەي قويىپ، وسى تىيىم سالۋ زاڭعا ەنبەي قالدى. مەن مۇنى سول كەزدە ۇلتتىق قاۋىپسىزدىك كوميتەتى الماتى قالالىق دەپاتامەنتى توراعاسىنىڭ ورىنباسارى وتكىزگەن الماتى قالاسى اكىمدىگىندەگى كونفەرەنتسيادا اشىق ايتقانمىن.
حالىقتىڭ تىلىندە سويلەي الاتىن حالىقتىق ۇكىمەت كەرەك!
- ەل باسىنا تۇسكەن بۇل اۋىر سىناق كىمنىڭ كىم ەكەنىن كورسەتتى؟
پاندەميا كەزىندە دە ەل قىناداي قىرىلعاندا پرەزيدەنت توقاەۆتىڭ ءسوزى بار ەدى، ءبىزدىڭ مەملەكەتتىك باسقارۋ جۇيەسى كۇيرەگەن دەگەن. سوعان تاعى دا كوزىمىز جەتتى.
بىزدە ەلدىڭ الدىنا شىعىپ سويلەيتىن ءبىر دە ءبىر اكىم، ءبىر دە ءبىر مينيستر جوق ەكەن؟!. ەلدىڭ الدىنا شىعىپ سويلەگەن ءبىر اكىمىمىزدىڭ ءوزى قازاقشاعا ءتىلى جەتپەي قالىپ، ورىسشا بوقتاپ جىبەرىپ، ەلدىڭ اشۋىن تۋدىرعان ۆيدەو تاراپ كەتتى… ءبىر وبلىستىڭ اكىمى ەلگە مەن سەندەردى قورعاي المايمىن دەگەنىن، ءبىر وبلىستىڭ ىشكى ىستەر باسقارماسى باسشىسى مەن حالىقتى ەمەس… اكىمدى عانا قورعاي الامىن دەگەنىن دە ەسىتتىك.
بىزگە حالىقتىڭ تىلىندە سويلەي الاتىن حالىقتىق ۇكىمەت كەرەك!
قايتا ماڭعىستاۋدىڭ اكىمى نۇرلان نوعاەۆقا ەلدەن ءسوز ەستىسە دە حالىقتىڭ ورتاسىندا بولدى، ايتار ءسوزىن ايتا ءبىلدى.
قىزىلوردا وبلىسى اكىمى گۇلشارا حانىم دا، ايەل دە بولسا ەل الدىنا شىقتى.
باسقالار شە؟ قايدا بولدى وبلىسىنا، قالاسىنا، ياعني ەلىنە اۋىر كۇن تۋعاندا؟ اكىمدەر سول وبلىستىڭ، قالانىڭ قولباسشىلارى بولىپ سانالماي ما؟
ياعني، مەملەكەتتىڭ باسقارۋ ورگاندارى باسشىلارىن تازارتۋ كەرەك!
باسقارۋ ورىندارىندا اكىم، مينيستر بولسىن، قازاقشا سويلەي الاتىن، قازاقشا ءتۇس كورەتىن مەملەكەتشىل-ۇلتشىل كادرلار كەرەك!
مۇناي مەن گازدىڭ ۇستىندە گازعا جارىماي وتىرعان حالىقتىڭ شىدامىن سىناعانداي گاز باعاسىن ەكى ەسە كوتەرۋگە بۇيرىق بەرگەن كىم؟ جاڭاوزەندىكتەردىڭ ايتۋىنشا، ايىنا 40 ميلليون ايلىق الاتىن گاز زاۋىتىنىڭ ديرەكتورى گاز باعاسىن ءوزى كوتەرە سالعان جوق شىعار، وعان كىم بۇيرىق بەردى؟!
مەن وسى انتيمونوپوليالىق، باسەكەلەستىكتى قورعاۋ اگەنتتىگىنىڭ نەمەن اينالىساتىنىن تۇسىنبەيمىن؟!. باعاعا شەكتەۋ قوياتىن ورگان رەتىندە نە ىستەپ وتىر؟ ويتكەنى، ازىق-تۇلىكتەن باستاپ، گاز، جارىق، سۋدىڭ باعاسى اي سايىن، كۇن سايىن كوتەرىلىپ كەلەدى. ال الىگە دەيىن ولاردى شەكتەگەن وقيعانى كورمەپپىن ءوز باسىم.
جاڭاوزەن — جاڭا كەزەڭ باستاۋى
- قۇدايعا شۇكىر، پرەزيدەنت ق.توقاەۆتىڭ باتىل شەشىمدەرى ارقاسىندا ەلىمىزدە كونستيتۋتسيالىق ءتارتىپ قايتا ورنادى.
ەندى مەملەكەتكە وپاسىزدىق جاساعان لاۋازىمدى تۇلعالاردىڭ ءبارىن اشىق جاريالاپ، جازالاۋ كەرەك!
مەملەكەتكە قارسى شىققان جانە ساتقىندىق جاساعان قىلمىسكەرلەردى، جاۋىزدىق جاساعان قانىشەرلەر، سودىرلار، باسبۇزارلاردى تۇگەل انىقتاپ، ەل ساباق الاتىنداي قاتاڭ جازالاۋ كەرەك!
بۇل — بۇنداي توڭكەرىستىڭ قايتالانباۋىنا ساباق بولادى.
ەندى وسى باستالعان تازارتۋدا ءبىز بۇرىنعى وتارلاۋشى يمپەريا كەڭەس وداعىن اڭساپ، كوممۋنيستىك ۇگىت جۇرگىزىپ، سەپاراتيستىك پيعىلىن اشىق ناسيحاتتاپ جۇرگەندەرگە دە توسقاۋىل قويۋىمىز كەرەك.
ولاردىڭ قاۋپى بۇلاردان ارتىق بولماسا، كەم ەمەس!
ۇلتتىق يدەولوگيانى قولعا الۋىمىز كەرەك! ساياساتتا دا، دىندە دە ۇلتسىزدىقتىڭ كەسىرى — مىنە، مەملەكەتتىك توڭكەرىس جاساۋعا اكەلىپ سوقتى.
ءتىل بولماعان جەردە ءدىل بولمايدى!
ءدىل بولماسا، دىم بولمايدى!
پرەزيدەنت توقاەۆ ەندى تەرەڭ ساياسي جاڭارۋ كەزەڭى باستالاتىنىن مالىمدەدى. ياعني، جاڭا جىلدا جاڭاوزەن جاڭا كەزەڭنىڭ باستاۋى بولايىن دەپ تۇر!
ەلدىڭ الەۋمەتتىك-ەكونوميكالىق جاعدايىن جاقسارتۋ ءۇشىن، مەملەكەتشىلدىك-ۇلتشىلدىق سانا قالىپتاستىرىپ، ساياسي ۇستانىمىمىز بەرىك بولۋى ءۇشىن ەڭ الدىمەن ۇلتتىق يدەولوگيامىزدى جولعا قويۋ — ەڭ باستى مىندەتىمىز بولۋى ءتيىس!
«پوليتسيا — ەل قورعانى»، «مەملەكەتتى قورعايتىن — قۋاتتى اسكەرىمىز بار» دەگەن ۇعىمدارىمىز قايدا قالدى ءبىزدىڭ؟
لاڭكەستەر لاڭىنا، سودىرلار سويقانىنا نەگە توتەپ بەرە الماي، اكىمشىلىكتەرىمىزدەن باستاپ، مەملەكەتتىك نىساندارىمىز نەگە قورعاي المادى؟!. ەڭ باستىسى — حالىقتى نەگە قورعاي المادى؟ بۇل تۋرالى پرەزيدەنت ۇندەۋىندە دە اشىق سىنالدى.
مەن «بىزدە 30 جىلدا ۇلتتىق مۇددەمىزدى، مەملەكەتتىك ءتىلىمىزدى قورعاۋدا تۇك تە ىستەلگەن جوق» دەپ ءجيى سىناۋشى ەدىم بيلىكتى. سويتسەك، وتىز جىلدا ءتىلىمىز ءۇشىن عانا ەمەس… تىرىلىگىمىز بەن تىرلىگىمىز ءۇشىن دە تۇك تە ىستەلمەگەن بە سوندا؟!.
ەڭ الدىمەن قورعانىسىمىزدى مىقتى ەتۋىمىز كەرەك!
قۇزىرلى ورگاندار باسشىلارىن تۇگەل تازارتىپ، پرەزيدەنت پەن پارلامەنت الدىندا انت قابىلداتۋ كەرەك! مەملەكەتتىك تىلدە عانا جازىلاتىن انتتى (سولاي بولۋى ءتيىس) ءتۇسىنىپ، تۇيسىنە الاتىن باسشىلاردى عانا تاعايىنداۋ كەرەك!
ۇجىمدىق قاۋىپسىزدىك شارتى ۇيىمىن شاقىرۋ — ۋاقىتشا شارا
- قازىر ەلدىڭ تاعى ءبىر الاڭداۋى — ۇجىمدىق قاۋىپسىزدىك شارتى ۇيىمى (ۇقشۇ) اسكەرىنىڭ كەلۋى.
ءيا، وتارلاپ العان كەڭەس يمپەرياسىنان تاۋەلسىزدىك العانىنا 30 جىل بولعان ەلدىڭ سىرتتان اسكەر كىرگىزۋگە الاڭداۋى زاڭدى. بىراق ءبىر نارسەنى ەسكەرۋىمىز كەرەك. ۇقشۇ دەگەن تەك رەسەي ەمەس! وعان 6 مەملەكەت كىرەدى: قازاقستان، قىرعىز رەسپۋبليكاسى، تاجىكستان، ارمەنيا، بەلورۋسسيا، رەسەي فەدەراتسياسى. اتاپ ايتارىمىز — بۇل ۇيىمعا قازىر توراعا -ارمەنيا مەملەكەتى، رەسەي ەمەس. جانە بۇل ۇيىم ءبىزدىڭ ەلدە ۋاقىتشا، ارى كەتكەندە 19 قاڭتارعا دەيىن عانا بولادى.
«ارقادا قىس جايلى بولسا، ارقار اۋىپ نەسى بار؟!» — دەگەندەي، ءوزىمىزدىڭ قورعانىس مينيسترلىگىمىز ەل قورعاۋدا سەنىمدى بولسا، ۇلتتىق قاۋىپسىزدىك كوميتەتى ۇلتقا قاۋىپتى كوميتەتكە اينالماسا، سىرتتان ىسكەر شاقىرىپ نەمىز بار؟!.
ەگەر، پرەزيدەنت شۇعىل دا، باتىل شەشىم جاساپ، بىتىمگەرشىلىك كۇشتەرىن شاقىرماعاندا، بۇگىن بيلىك كەشەگى مەملەكەتتىك توڭكەرىس جاساۋعا شىعىپ، كوپ قالالاردىڭ تاس-تالقانىن شىعارىپ، مادەني ورىندارىمىز بەن تاريحىمىزدى ورتەپ، تالاي بوزداعىمىزدى اتىپ، باۋىزداپ كەتكەندەردىڭ قولىندا بولار ەدى… ال ول كەزدە سىرتتان، الاقاندارىن ىسقىلاپ وتىرعان الپاۋىت مەملەكەتتەردىڭ اسكەرى شاقىرماي-اق كەلۋى مۇمكىن ەدى…
قامىتتان بوساعان ەل قايتا قامىتقا كىرمەيدى! قامىتقا قايتا كىرەتىن ەل — قۇلدىقتان ارىلماعان ەل! ال قازاق ەلىنىڭ تاۋەلسىزدىك العانىنا 30 جىل! ال ناعىز رۋحاني تاۋەلسىزدىك ەندى باستالادى! ءبىز سوعان دايىن بولىپ، ارقايسىمىز ءوز ۇلەسىمىزدى قوسۋىمىز كەرەك!
ول ءۇشىن ءبارىمىز، ۇلتقا، پارتياعا، جىككە بولىنبەي، پرەزيدەنت توقاەۆتىڭ ماڭىنا توپتاسۋىمىز، قولداۋىمىز قاجەت!
پرەزيدەنت 10 قاڭتاردى جالپىۇلتتىق ازا تۇتۋ كۇنى دەپ جاريالادى!
ەل تاۋەلسىزدىگىن ساقتاۋداعى قۇربان بولعاندار، ياعني، مەملەكەت مۇددەسىن قورعاپ، شەيىت بولعان بوزداقتاردىڭ پەيىشتە نۇرى شالقىپ، يماندارى سالامات بولسىن!
ەل قورعاپ، ەرلىكپەن قازا تاپقانداردىڭ بارىنە حالىق قاھارمانى اتاعى بەرىلۋى كەرەك.
اللا الاشقا جار بولسىن!
ەل امان، جۇرت تىنىش بولسىن!
اق جول!
قازىبەك يسا،
"ادىرنا" ۇلتتىق پورتالى
