Halyqtyŋ tılınde söilei alatyn halyqtyq ükımet kerek — Qazybek İsa

AUYR SYNNAN AMAN ÖTKENIMIZ — PREZİDENTKE NAǦYZ SENIM ARTU! EL QAMYN OILAǦAN EREUILŞILER men ELGE QARSY LAŊKESTERDI AIYRA BILEIIK! OTAN MÜDDESINEN OLİGARHTAR MÜDDESIN ARTYQ KÖRU nege aparyp soqty?!. TIL BOLMAǦAN JERDE DIL BOLMAIDY! Dıl bolmasa, dym bolmaidy! Jaŋa jyldyŋ alǧaşqy aptasy — Täuelsız memleketımızge qater töngen, töŋkerıs jasauǧa ūmtylǧan asa auyr künder, «Qaŋtardyŋ qandy aptasy» boldy!

1. Qazaqstan Prezidentı Q.Toqaev El basyna kün tuǧanda — Er basyna kün tuǧan barlyq auyr synaqty Memleket basşysy retınde kötere bılıp, elın aman saqtap qaldy!

Osy El taǧdyry şeşılgen auyr künderde Prezident Toqaevty Halyqtyŋ qoldap, ülken senım artuy — Prezident Sailauynan keiıngı, el basyna kün tuǧandaǧy auyr synaqtan ötken naǧyz senım artu boldy — jäne ol senım abyroimen aqtaldy! Memleket basşysy Qasym-Jomart Toqaev El Erge qaraǧanda, jerge qaramai, Er ekenın körsettı — Täuelsız Eldı saqtap qaldy! Prezident elge aiqyn GARANT ekenın anyq körsettı! EL QAMYN OILAǦAN EREUILŞILER men ELGE QARSY LAŊKESTERDI AIYRA BILEIIK!

2. Bız eŋ aldymen ärnärsenı anyqtap alyp, öz atymen atauymyz kerek!

El qamy üşın Ereuılge şyqqandar men Memleketke qarsy laŋkestıktı, halyqqa qarsy qaraqşylyqtyŋ basyn aiyryp aluymyz kerek! Öitkenı El qamy üşın ereuılge şyqqandar — elge qarsy soǧyspaidy; eşkımdı öltırmeidı; auruhanaǧa, jedeljärdemge, äkımşılık oryndarǧa, polisiiaǧa, qūzyrly oryndarǧa, bankıge, dükenderge, mädeni oryndarǧa, halyqtyŋ mülkıne, kölıgıne şabuyl jasap, örtep jıbermeidı! — Telearnalarǧa şabuyl jasap, el tarihynyŋ altyn qoryn örtep jıbermeidı. — Därıgerlerdı, nauqastardy, Jedeljärdemdı, Qyzyl krest, Jarty ai qyzmetkerlerın qandai soǧys kezınde de eşkım ūryp-soǧyp, tonamaidy! Almatyda polisiia men äskerden 18 bozdaq öltırıldı, ekı polisiianyŋ basyn kesıp alǧan. Myŋnan asa adam jaraqat alǧan, jüzge juyǧy jansaqtau bölımderınde jatyr. Olardyŋ 200-deiı äielder men qyzdar! Būl qaza tapqandar, auyr jaraqat alyp, tonalǧandar, bızdıŋ bauyrlarymyz, analarymyz, äpke-qaryndastarymyz, qyzdarymyz emes pe?!. Būndai jauyz qanışerlıktı qalai jazasyz qaldyruǧa bolady? Mädeni ordamyz — aru qalamyz Almatynyŋ tas-talqanyn şyǧarǧan soǧys boldy, älı basyla qoiǧan joq! Tıptı, bes telearnany basyp alyp, «Qazaqstan» ūlttyq arnany, ordaǧy Altyn qorymyzdy, iaǧni, öz tarihymyzdy örtep, tonauşylar ışınde olardy bastap, saqaly sapsiǧan, özderın «saiasatker» sanaityn, «Aŋqau elge Aramza moldalar» jürgenıne ne deuge bolady?! Būlar sonda özımızdıŋ ūlttyq qūndylyqtarymyzǧa, öz tarihymyzǧa, memleketımızge qarsylar ma?! «AQ JOL» talai eskertken EREUILŞILER TALABY ENDI ORYNDALDY!

3. Ereuılge şyqqandardyŋ talabyn bilık oryndady. Gazdyŋ baǧasyn tüsırıp, janar-jaǧarmai, azyq-tülık baǧasyn tüsırıp, bırqalypta ūstau turaly şeşım qabyldandy.

Ükımetke būl eldıŋ narazylyǧyn tudyrǧan mäselenı parlament, «Aq jol» fraksiiasy osydan ekı ai jäne üş ai būryn eskertıp, 2 ret deputattyq saual jasap, gaz ben janar-jaǧarmai baǧalaryn būrynǧy qalpyna tüsıru turaly talap etken bolatyn. Äitpese, halyq narazylyǧy örşi beretının qadap aitqan bolatynbyz. Ükımet bıraq būdan dūrys qorytyndy jasamady. «Qatyramyz» dep, aqyry qatyp qaldy… Prezident būndai ükımettı otstavkaǧa jıberıp dūrys jasady. Otan müddesınen oligarhtar müddesın artyq körudıŋ soŋy nege aparyp, soqqanyna bärımız kuä boldyq!..

4. Jaŋaözennen bastalǧan ereuıl aldymen eldıŋ äleumettık-ekonomikalyq jaǧdaiynyŋ qiyndyǧyna bailanysty bastaldy.

İä, eldıŋ jaǧdaiy mäz emes. Ärkımnıŋ basynda nesie qaryzy bar. Nesiesın tölei almai jalǧyz baspanasynan airylyp, bala-şaǧasymen dalada qalyp jatqandar köp. Osyndai qiyndyqtarǧa bailanysty Bız, «Aq jol» fraksiiasy bankılerdıŋ basymdyǧynan kedeilerdı qūtqaru üşın Jeke adamdardyŋ bankrottyǧy turaly zaŋ qabyldaudy osydan 9 jyl būryn, 2013 jyly ūsyndyq parlamentte. Ükımet qarsy boldy. Endı mıne, keşe Prezidenttıŋ özı tapsyrma berdı osy zaŋdy qabyldau turaly. Sonymen qatar äleumettık jaǧdaiy qiyn otbasylardyŋ baspana jaldau aqysyn subsidiialau da qolǧa alynatyn boldy.

5. Bız Jaŋaözende ereuıl bastalǧan künnıŋ erteŋıne 3 qaŋtarda bır täulıkke jetpei «Halyqtyŋ oryndy talaby oryndaluy tiıs» dep jazdyq. El talaby oryndaldy.
6. Endı osy eldıŋ talaptarynyŋ oryndaluy üşın El tynyştyǧy kerek eŋ aldymen! Iаǧni, eŋ bırınşı tynyştyqty qalpyna keltıruımız qajet!

Tynyştyq bolǧanda ǧana yrys-qūt ornaidy! Bırlık bolǧanda ǧana tırlık bolady! MEMLEKETTI, HALYQTY QORǦAU ÜŞIN QATAŊ ŞARALARDY QOLDAIMYZ! «Maly joǧalmaǧannyŋ bärı aqyldy»

7. Bız Halyqty, memlekettı qorǧau üşın Prezidenttıŋ barlyq qajettı qatal şaralarǧa baruyn qoldap, quattaimyz!

Halyqty qorǧauda eşqandai ırkılu-kıdıru, bolmauy kerektıgın, är kün emes, är saǧat, ärbır sät qymbat ekenıne köz jetkızdık. Bır kün keşıgudıŋ özı qanşama adami jäne materialdyq zor şyǧynǧa äkeldı. Prezident Toqaev keşegı Ündeuınde «keibır şet memleketter taraptar kelısımge keluı kerek» — dep, därıs oqyǧanyn ötkır synap, batyl qaitaryp tastady. Öte dūrys! İä, halyqty qyryp, qandy qyrǧyn jasaǧan qylmyskerlermen qandai kelısım boluy kerek!? «Maly joǧalmaǧannyŋ — bärı aqyldy» deidı būny atam qazaq. «Medaldyŋ ekı jaǧy bar» degendei, «şaş al dese, bas aluǧa» jalǧasyp, endı jazyqsyz jastar jazaǧa ılınıp ketpeuı tiıs! Bızde san qualap, jospar oryndau degen keleŋsızdıkter būryn da bolǧan.

8. Jaŋaözende ereuıl bastalǧan künnen keiın 4 qaŋtarda bız «Aq jol» partiiasy fraksiia jiynyn ötkızıp, eldı tynyştyqqa şaqyrdyq.

Partiia töraǧasy, Mäjılıs deputaty Azat Peruaşev internet joq bolsa da, är öŋırge telefon arqyly habarlasyp, qiyndyq qūrsauynda qalǧan elge kömektesu üşın üilestıru jūmysyn basqaryp otyrdy. Keşe 7 qaŋtarda da partiianyŋ keŋeitılgen preziduymy ekı ret jinalyp, Prezident şeşımderı men Ündeuın qoldap, Mälımdeme jasadyq. Deputattarymyz Maŋǧystauǧa, Almatyǧa, Şymkentke, Türkıstan oblysyna jäne är öŋırge baryp, eldıŋ ışınde bolyp, halyq ünın tyŋdap, tynyştyqqa, bırlıkke şaqyru turaly ūsynys jasadyq. Tötenşe jaǧdaida şyǧuǧa rūqsat berılmedı. Aimaqtarda da aqjoldyqtar memleket basyna tüsken auyrtpaşylyqtardy elmen bırge köterısıp jatyr. Aqtöbe oblysy filialy töraǧasy Asqar Sadyq toqtap qalǧan poiyzdaǧy 700-dei jolauşyny tamaqtandyrudy ūiymdastyrdy. Şymkent qalasy filialy basşysy Älımhan Äbjanov pen oblystyq mäslihat deputaty Noian Tölegenovter Şymkent qalalyq äkımşılıgımen tyǧyz bailanysta jūmys ıstep, halyqty, memlekettık nysandardy qorǧaityn myŋǧa juyq erıktı jasaq jasaqtady. 300-dei äsker sarbazdaryn tamaqtandyrdy. Jambyl oblystyq filialy töraǧasy Mūqan Şalqarbek Şu qalasyn laŋkester men sodyrlardan qorǧauda jıgıtterdıŋ basyn qosa bıldı. Almatyda Arman İsmailov auruhanany qorǧauǧa tyrysty. AQTAU men ALMATYDAǦY EREUILDIŊ AIYRMAŞYLYǦY

9. Jaŋaözen men Aqtauda ereuılge şyqqan el nege typ-tynyş tūryp, tonau men qaraqşylyq jasamai, eşqandai arandatuǧa ermedı? Öitkenı, olar sol jerdıŋ tūrǧyndary! Öz jerın özderı talqandai ma? Al Almaty men Taldyqorǧanda, Tarazda, Şymkent pen Qyzylordada, Semeide jäne tb jerlerde ereuılge arnaiy daiyndyqtan ötken sodyrlar, basqa jaqtan kelgen «legionerler» basşylyq jasady. Sondyqtan, qalalardy tas-talqan ettı.

Prezident keşegı ündeuınde tek Almatynyŋ özınde 20 myŋ laŋkester men sodyrlar soiqan salǧanyn mälımdedı.

10. Al osy syrttan kelgen, barlyq daiyndyqtan ötken qaptaǧan laŋkester men sodyrlar elımızge qalai kırgen? Elımızde memleketke qarsy töŋkerıs ūiymdastyryluyna bızdıŋ arnauly organdar nege jol bergen?

Būl turaly memleket basşysy ündeuınde aşyq aityp, qatal synady. İä, Ūlttyq qauıpsızdık komitetı qaida qaraǧan, aiǧa qaraǧan ba? Ūlttyq qauıpsızdık organy ūltqa qauıptı laŋkesterge tosqauyl qoiu kerek emes pe? Bız, «Aq jol» partiiasy talai jyldan berı Dın turaly zaŋǧa radikaldy terıs aǧymdarǧa tosqauyl qoiu turaly bap engızu jaily ūsynys jasap kelemız. Bıraz jyl būryn būl mäselenı bilık te qolǧa alyp, barlyq ministrlık pen vedomostvolar, Bas prokuratura men Joǧary sot ta qoldaǧanda, tek Ūlttyq Qauıpsızdık komitetı kelıspei qoiyp, osy tyiym salu zaŋǧa enbei qaldy. Men mūny sol kezde Ūlttyq Qauıpsızdık komitetı Almaty qalalyq depatamentı töraǧasynyŋ orynbasary ötkızgen Almaty qalasy äkımdıgındegı konferensiiada aşyq aitqanmyn. HALYQTYŊ TILINDE SÖILEI ALATYN HALYQTYQ ÜKIMET KEREK!

11. El basyna tüsken būl auyr synaq kımnıŋ kım ekenın körsettı?

Pandemiia kezınde de el qynadai qyrylǧanda Prezident Toqaevtyŋ sözı bar edı, bızdıŋ memlekettık basqaru jüiesı küiregen degen. Soǧan taǧy da közımız jettı. Bızde eldıŋ aldyna şyǧyp söileitın bır de bır äkım, bır de bır ministr joq eken?!. Eldıŋ aldyna şyǧyp söilegen bır äkımımızdıŋ özı qazaqşaǧa tılı jetpei qalyp, orysşa boqtap jıberıp, eldıŋ aşuyn tudyrǧan video tarap kettı… Bır oblystyŋ äkımı elge men senderdı qorǧai almaimyn degenın, bır oblystyŋ ışkı ıster basqarmasy basşysy men halyqty emes… äkımdı ǧana qorǧai alamyn degenın de esıttık. Bızge HALYQTYŊ TILINDE SÖILEI ALATYN HALYQTYQ ÜKIMET KEREK! Qaita Maŋǧystaudyŋ äkımı Nūrlan Noǧaevqa elden söz estıse de halyqtyŋ ortasynda boldy, aitar sözın aita bıldı. Qyzylorda oblysy äkımı Gülşara hanym da, äiel de bolsa el aldyna şyqty. Basqalar şe? Qaida boldy oblysyna, qalasyna, iaǧni elıne auyr kün tuǧanda? Äkımder sol oblystyŋ, qalanyŋ qolbasşylary bolyp sanalmai ma? Iаǧni, memlekettıŋ basqaru organdary basşylaryn tazartu kerek! Basqaru oryndarynda äkım, ministr bolsyn, qazaqşa söilei alatyn, qazaqşa tüs köretın memleketşıl-ūltşyl kadrlar kerek! Mūnai men gazdyŋ üstınde gazǧa jarymai otyrǧan halyqtyŋ şydamyn synaǧandai gaz baǧasyn ekı ese köteruge būiryq bergen kım? Jaŋaözendıkterdıŋ aituynşa, aiyna 40 million ailyq alatyn gaz zauytynyŋ direktory gaz baǧasyn özı kötere salǧan joq şyǧar, oǧan kım būiryq berdı?! Men osy Antimonopoliialyq, bäsekelestıktı qorǧau agenttıgınıŋ nemen ainalysatynyn tüsınbeimın?!. Baǧaǧa şekteu qoiatyn organ retınde ne ıstep otyr? Öitkenı, azyq-tülıkten bastap, gaz, jaryq, sudyŋ baǧasy ai saiyn, kün saiyn köterılıp keledı. Al älıge deiın olardy şektegen oqiǧany körmeppın öz basym. JAŊAÖZEN — JAŊA KEZEŊ BASTAUY

12. Qūdaiǧa şükır, Prezident Q.Toqaevtyŋ batyl şeşımderı arqasynda elımızde Konstitusiialyq tärtıp qaita ornady.

Endı memleketke opasyzdyq jasaǧan lauazymdy tūlǧalardyŋ bärın aşyq jariialap, jazalau kerek! Memleketke qarsy şyqqan jäne satqyndyq jasaǧan qylmyskerlerdı, jauyzdyq jasaǧan qanışerler, sodyrlar, basbūzarlardy tügel anyqtap, el sabaq alatyndai qataŋ jazalau kerek! Būl — būndai töŋkerıstıŋ qaitalanbauyna sabaq bolady. Endı osy bastalǧan tazartuda bız būrynǧy otarlauşy imperiia Keŋes odaǧyn aŋsap, kommunistık ügıt jürgızıp, separatistık piǧylyn aşyq nasihattap jürgenderge de tosqauyl qoiuymyz kerek. Olardyŋ qaupı būlardan artyq bolmasa, kem emes! Ūlttyq ideologiiany qolǧa aluymyz kerek! Saiasatta da, Dınde de Ūltsyzdyqtyŋ kesırı — mıne, memlekettık töŋkerıs jasauǧa äkelıp soqty. TIL BOLMAǦAN JERDE DIL BOLMAIDY! Dıl bolmasa, dym bolmaidy! Prezident Toqaev endı tereŋ saiasi jaŋaru kezeŋı bastalatynyn mälımdedı. Iаǧni, Jaŋa jylda Jaŋaözen Jaŋa kezeŋnıŋ bastauy bolaiyn dep tūr! Eldıŋ äleumettık-ekonomikalyq jaǧdaiyn jaqsartu üşın, memleketşıldık-ūltşyldyq sana qalyptastyryp, saiasi ūstanymymyz berık boluy üşın eŋ aldymen Ūlttyq ideologiiamyzdy jolǧa qoiu — eŋ basty mındetımız boluy tiıs! «Polisiia — el qorǧany», «Memlekettı qorǧaityn — quatty äskerımız bar» degen ūǧymdarymyz qaida qaldy bızdıŋ? Laŋkester laŋyna, Sodyrlar soiqanyna nege tötep bere almai, äkımşılıkterımızden bastap, memlekettık nysandarymyz nege qorǧai almady?!. Eŋ bastysy — halyqty nege qorǧai almady? Būl turaly Prezident ündeuınde de aşyq synaldy. Men «Bızde 30 jylda ūlttyq müddemızdı, memlekettık tılımızdı qorǧauda tük te ıstelgen joq» dep jiı synauşy edım bilıktı. Söitsek, otyz jylda TILIMIZ üşın ǧana emes… TIRILIGIMIZ ben TIRLIGIMIZ üşın de tük te ıstelmegen be sonda?!. Eŋ aldymen Qorǧanysymyzdy myqty etuımız kerek! Qūzyrly organdar basşylaryn tügel tazartyp, Prezident pen parlament aldynda Ant qabyldatu kerek! Memlekettık tılde ǧana jazylatyn Antty (solai boluy tiıs) tüsınıp, tüisıne alatyn basşylardy ǧana taǧaiyndau kerek! ŪJYMDYQ QAUIPSIZDIK ŞARTY ŪIYMYN ŞAQYRU — UAQYTŞA ŞARA

13. Qazır eldıŋ taǧy bır alaŋdauy — ŪJYMDYQ QAUIPSIZDIK ŞARTY ŪIYMY (ŪQŞŪ) äskerınıŋ keluı.

İä, otarlap alǧan Keŋes imperiiasynan Täuelsızdık alǧanyna 30 jyl bolǧan eldıŋ syrttan äsker kırgızuge alaŋdauy zaŋdy. Bıraq bır närsenı eskeruımız kerek. ŪQŞŪ degen tek Resei emes! Oǧan 6 memleket kıredı: Qazaqstan, Qyrǧyz Respublikasy, Täjıkstan, Armeniia, Belorussiia, Resei Federasiiasy. Atap aitarymyz — būl ūiymǧa qazır töraǧa -Armeniia memleketı, Resei emes. Jäne būl ūiym bızdıŋ elde uaqytşa, ary ketkende 19 qaŋtarǧa deiın ǧana bolady. «Arqada qys jaily bolsa, arqar auyp nesı bar?!» — degendei, özımızdıŋ Qorǧanys ministrlıgımız el qorǧauda senımdı bolsa, Ūlttyq qauıpsızdık komitetı Ūltqa qauıptı komitetke ainalmasa, syrttan ısker şaqyryp nemız bar?!. Eger, Prezident şūǧyl da, batyl şeşım jasap, bıtımgerşılık küşterın şaqyrmaǧanda, bügın bilık keşegı memlekettık töŋkerıs jasauǧa şyǧyp, köp qalalardyŋ tas-talqanyn şyǧaryp, mädeni oryndarymyz ben tarihymyzdy örtep, talai bozdaǧymyzdy atyp, bauyzdap ketkenderdıŋ qolynda bolar edı… Al ol kezde syrttan, alaqandaryn ysqylap otyrǧan alpauyt memleketterdıŋ äskerı şaqyrmai-aq keluı mümkın edı… Qamyttan bosaǧan el qaita qamytqa kırmeidı! Qamytqa qaita kıretın el — qūldyqtan arylmaǧan el! Al Qazaq Elınıŋ Täuelsızdık alǧanyna 30 jyl! Al naǧyz ruhani Täuelsızdık endı bastalady! Bız soǧan daiyn bolyp, ärqaisymyz öz ülesımızdı qosuymyz kerek! Ol üşın bärımız, ūltqa, partiiaǧa, jıkke bölınbei, Prezident Toqaevtyŋ maŋyna toptasuymyz, qoldauymyz qajet! Prezident 10 qaŋtardy jalpyūlttyq aza tūtu künı dep jariialady! El Täuelsızdıgın saqtaudaǧy Qūrban bolǧandar, iaǧni, memleket müddesın qorǧap, şeiıt bolǧan bozdaqtardyŋ peiışte nūry şalqyp, imandary salamat bolsyn! El qorǧap, erlıkpen qaza tapqandardyŋ bärıne Halyq Qaharmany ataǧy berıluı kerek. Alla Alaşqa jar bolsyn! El aman, jūrt tynyş bolsyn! Aq jol!

Qazybek İSA,

"Adyrna" ūlttyq portaly