ماسكەۋدىڭ زاموسكۆورەتسكي سوتى ماسكەۋ مەتروسىنداعى اكتسيادان كەيىن تىركەلمەگەن «درۋگايا روسسيا ە.ۆ.ليمونوۆا» پارتياسىنىڭ ون بەلسەندىسىن قاماۋعا الدى، دەپ حابارلايدى «ادىرنا» ءتىلشىسى «وۆد-ينفو»- عا سىلتەمە جاساپ.
بەلسەندىلەر 10-نان 15 تاۋلىككە دەيىن قاماۋعا الىندى. حاتتامالار پوليتسياعا باعىنباۋ تۋرالى باپ بويىنشا جاسالدى.
8 قاڭتاردا «الما-اتينسكايا» مەترو ستانتسياسىندا بىرنەشە بەلسەندى پويىزداردىڭ ءبىرىنىڭ ۆاگونىنا «سولتۇستىك قازاقستانعا» باننەرىن تىركەگەن. وسىلايشا، ولار «رەسەي بيلىگى تاراپىنان قازاقستاننىڭ ءورىستىلدى حالقىن قورعاۋ بويىنشا باتىل ءىس-قيمىل جاساۋ قاجەتتىلىگىنە» نازار اۋدارتۋعا تىرىسقان.
ايتا كەتەيىك، 10 قاڭتاردا پوليتسيا ۇيىمنىڭ شتاب-پاتەرىنە ءتىنتۋ جۇرگىزدى. ناتيجەسىندە قاۋىپسىزدىك قىزمەتكەرلەرى كەڭسەدە بولعان 14 ادامدى ۇستادى.
«ادىرنا» ۇلتتىق پورتالى