باس دارىگەر تۇرعىنداردى رەۆاكتسيناتسياعا شاقىردى

868

«شىمكەنت قالاسىندا 2022 جىلدىڭ باسىنان بەرى كوروناۆيرۋس جۇقتىرعان 933 ناۋقاس انىقتالدى. ال، وسى مەرزىم ىشىندە 7 ناۋقاس كوروناۆيرۋس ينفەكتسياسىنان قايتىس بولدى. وتكەن تاۋلىكتە COVID-19 ينفەكتسياسىن جۇقتىرۋ بويىنشا 221 جاعدايى تىركەلدى. اۋرۋحاناداعى ناۋقاستاردىڭ باسىم بولىگى ۆاكتسينا الماعان ازاماتتار». بۇل تۋرالى شىمكەنت قالالىق دەنساۋلىق ساقتاۋ باسقارماسىنىڭ باسشىسى ب. پوزيلوۆ باق وكىلدەرىنە مالىمدەدى. شىمكەنت قالاسى 11 قاڭتاردان باستاپ ەپيدەميولوگيالىق احۋال بويىنشا قىزىل ايماققا ءوتتى. بۇگىندە قالاداعى «ينفەكتسيالىق ورتالىقتىڭ» ستاتسيونارىندا 157 ناۋقاس ەم قابىلداپ جاتىر.

— ستاتسيونارداعى 157 ناۋقاستىڭ 65-ءى جۇكتى ايەلدەر. ولاردىڭ جاعدايى كۇردەلى. وكىنىشتىسى، ناۋقاس ايەلدەردىڭ ەشبىرى بۇگىنگە دەيىن ۆاكتسينا الماعان. ال، 13 ناۋقاس جان ساقتاۋ بولىمىندە. جاعدايدىڭ كۇردەلى ەكەنىن جىل باسىنان بەرى 7 كىسىنىڭ قايتىس بولعانىنان كورۋگە بولادى. سوندىقتان قالا تۇرعىندارىن ۆاكتسينا الۋعا شاقىرامىن. سەبەبى، ەكپە العان ازاماتتار پاندەميانى جەڭىل وتكىزۋدە. ۆاكتسينا العانىنا 6 اي تولعان كەز كەلگەن قالا تۇرعىنى رەۆاكتسيناتسيادان تەگىن وتە الادى، - دەدى ب.پوزيلوۆ.

مامانداردىڭ ايتۋىنشا، شىمكەنت قالاسى بويىنشا Pfizer ەكپەسىنىڭ ءبىرىنشى كومپونەنتىن 17 663 ادام، ەكىنشى كومپونەنتىن 7850 ادام قابىلداعان.
— جاعىمدى جاڭالىق، تاياۋ كۇندەرى قر دەنساۋلىق ساقتاۋ مينيسترلىگىنىڭ تالاپتارىنا سايكەس، 60 جاستان اسقان ازاماتتارعا Pfizer ەكپەسىن سالىناتىن بولادى. الايدا، قالادا رەۆاكتسيناتسيادان نەبارى 37 934 ادام عانا وتكەن. بۇل ميلليون تۇرعىنى بار قالا ءۇشىن وتە از. قالاداعى قوعامدىق ورىنداردا تالاپ ساقتالماي وتىر. ادامدار قوعامدىق كولىكتەردە ماسكاسىز ءجۇر. بۇل پاندەميانىڭ تەز تارالۋىنا اسەر ەتۋدە، - دەيدى باس دارىگەر.

ايتا كەتەيىك، بۇگىندە 12-17 جاس ارالىعىنداعى بالالار مەن جۇكتى، ەمىزۋلى ايەلدەرگە Pfizer ەكپەسىن سالىنسا، 18 جاستان اسقان رەۆاكتسيناتسيادان وتەتىن ازاماتتار ءۇشىن QazVac جانە VeroCell ەكپەلەرى قولجەتىمدى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket