ۇلىتاۋ وبلىسىندا مۇگەدەكتىگى بار ازاماتتاردى الەۋمەتتىك قولداۋ، وڭالتۋ جانە قوعام ومىرىنە بەيىمدەۋ باعىتىنداعى جۇمىستار كەزەڭ-كەزەڭىمەن جۇزەگە اسىرىلىپ كەلەدى. ءوڭىر بويىنشا مۇگەدەكتىگى بار ادامدار سانى 11 167 ادامدى قۇرايدى. ونىڭ ىشىندە 1 051-ءى – بالالار. بۇل جالپى كورسەتكىشتىڭ 9,4 پايىزىن قۇرايدى.
مۇگەدەكتىگى بار ازاماتتاردى قاجەتتى وڭالتۋ قۇرالدارىمەن قامتاماسىز ەتۋ مەديتسينالىق كورسەتىلىمدەر مەن قارسى كورسەتىلىمدەردى ەسكەرە وتىرىپ، وڭالتۋدىڭ جەكە باعدارلاماسىنا سايكەس جەرگىلىكتى بيۋدجەت ەسەبىنەن جۇرگىزىلۋدە. اتاپ ايتقاندا، پروتەزدىك-ورتوپەديالىق قۇرالدار، ءجۇرىپ-تۇرۋى قيىن ازاماتتارعا ارنالعان كرەسلو-اربالار، ساناتوري-كۋرورتتىق ەمدەۋ، مىندەتتى گيگيەنالىق قۇرالدار، تيفلوتەحنيكالىق جانە سۋردوتەحنيكالىق قۇرالدار، سونداي-اق ىمداۋ ءتىلى مامانىنىڭ قىزمەتتەرى ۇسىنىلادى.
قازىرگى تاڭدا وڭالتۋدىڭ جەكە باعدارلاماسىنا سايكەس 973 ادام، ياعني 41,7 پايىزى قاجەتتى قۇرالدار مەن قىزمەتتەردى الىپ وتىر. ال 2025 جىلدىڭ قورىتىندىسى بويىنشا بۇل كورسەتكىش 4 839 ادامدى نەمەسە 98,1 پايىزدى قۇراعان.
مەملەكەتتىك تاپسىرىس اياسىندا مۇگەدەكتىگى بار ازاماتتارعا ينۆاتاكسي قىزمەتى دە ۇيىمداستىرىلعان. بۇگىندە بۇل قىزمەتپەن 221 ادام قامتىلعان. ونىڭ ىشىندە جەزقازعان قالاسىندا – 150, ساتباەۆ قالاسىندا – 37, قاراجال قالاسىندا – 18, جاڭاارقا اۋدانىندا 16 ادام بار. ينۆاتاكسي قىزمەتىن كورسەتۋگە بارلىعى 11 ارنايى اۆتوكولىك جۇمىلدىرىلعان. ونىڭ 5-ەۋى جەزقازعاندا، 2-ەۋى ساتباەۆتا، 1-ەۋى قاراجالدا، 3-ەۋى جاڭاارقا اۋدانىندا قىزمەت كورسەتىپ وتىر.
الەۋمەتتىك كومەك كورسەتۋدىڭ، ونىڭ مولشەرلەرىن بەلگىلەۋدىڭ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋدىڭ ۇلگىلىك قاعيدالارىنا سايكەس، جەرگىلىكتى ۋاكىلەتتى ورگاندار شەشىمىمەن بىرجولعى الەۋمەتتىك تولەمدەر دە قاراستىرىلعان. اتاپ ايتقاندا، قازان ايىنىڭ ەكىنشى جەكسەنبىسى – قازاقستان رەسپۋبليكاسىنىڭ مۇگەدەكتىگى بار ادامدار كۇنىنە وراي مۇگەدەكتىگى بار بارلىق ساناتتاعى ادامدارعا جانە مۇگەدەكتىگى بار بالالارعا 20 000 تەڭگەدەن تولەنەدى. سونىمەن قاتار، 1-2 قاڭتار – جاڭا جىل مەرەكەسىنە وراي مۇگەدەكتىگى بار بالالارعا 20 000 تەڭگە كولەمىندە بىرجولعى الەۋمەتتىك تولەم قاراستىرىلعان.
وڭىردە مۇگەدەكتىگى بار ازاماتتاردىڭ قوعام ومىرىنە بەيىمدەلۋىنە جاعداي جاساۋ ماقساتىندا ارناۋلى الەۋمەتتىك قىزمەتتەر كورسەتەتىن ليتسەنزيالانعان ورتالىقتار جۇمىس ىستەيدى. سونىڭ ءبىرى – ستاتسيونارلىق ۇلگىدەگى 241 ورىنعا ارنالعان «ۇلىتاۋ وبلىسىنىڭ ارناۋلى الەۋمەتتىك قىزمەتتەر كورسەتۋ ورتالىعى» كوممۋنالدىق مەملەكەتتىك مەكەمەسى. قازىرگى ۋاقىتتا ورتالىقتا 214 ادام تۇرىپ جاتىر. ونىڭ 81-ءى – مۇگەدەكتىگى بار ادامدار، 133-ءى – زەينەتكەرلەر.
بۇدان بولەك، وبلىستا 5 اۋداندىق جانە قالالىق جۇمىسپەن قامتۋ جانە الەۋمەتتىك باعدارلامالار بولىمدەرى قىزمەت كورسەتەدى. ولاردىڭ قاراماعىندا ءۇي جاعدايىندا ارناۋلى الەۋمەتتىك قىزمەت كورسەتەتىن 14 بولىمشە بار. اتاپ ايتقاندا، جەزقازعاندا – 7, ساتباەۆتا – 3, قاراجالدا – 1, جاڭاارقا اۋدانىندا – 2, ۇلىتاۋ اۋدانىندا 1 بولىمشە جۇمىس ىستەيدى. جىل باسىنان بەرى بۇل قىزمەتتەرمەن 958 ادام قامتىلعان.
سونداي-اق وڭىردە ۇكىمەتتىك ەمەس ۇيىمدار دا بەلسەندى جۇمىس اتقارۋدا. اتاپ ايتقاندا، «ۇلىتاۋ مەيىرىم» قوعامدىق قورى 18-35 جاس ارالىعىنداعى مۇگەدەكتىگى بار ادامدارعا ارنالعان 30 ورىندىق كۇندىزگى بولۋ ورتالىعىن ىسكە اسىرۋدا. «نۇر ماقسات» مۇگەدەكتەر قوعامى» قوعامدىق بىرلەستىگى 18-35 جاس ارالىعىنداعى ازاماتتارعا ارنالعان 25 ورىندىق كۇندىزگى بولۋ ورتالىعىن ۇيىمداستىرعان. ال «تالاپ» قايىرىمدىلىق قورى 3-18 جاس ارالىعىنداعى مۇگەدەكتىگى بار بالالارعا ارنالعان 25 ورىندىق ورتالىق جۇمىسىن جۇرگىزسە، «قازىنا قامقور» قايىرىمدىلىق قورى 1,5-18 جاس ارالىعىنداعى بالالارعا ارنالعان 25 ورىندىق كۇندىزگى بولۋ ورتالىعى ارقىلى قىزمەت كورسەتىپ وتىر.
جۇمىسپەن قامتۋ باعىتىندا دا ناقتى شارالار قابىلدانۋدا. 2026 جىلى ۇلىتاۋ وبلىسىنىڭ مانساپ ورتالىقتارىنا ەرەكشە قاجەتتىلىكتەرى بار 151 جۇمىسسىز ازامات ءوتىنىش بىلدىرگەن. ناتيجەسىندە 26 ادام جۇمىسقا ورنالاستىرىلدى. ونىڭ ىشىندە 18 ادام تۇراقتى جۇمىسقا تۇرسا، 8 ادام سۋبسيديالاناتىن جۇمىس ورىندارىنا، ناقتىراق ايتقاندا قوعامدىق جۇمىستارعا جولداندى.
سونىمەن بىرگە، «باستاۋ بيزنەس» جوباسى اياسىندا كاسىپكەرلىك نەگىزدەرىنە وقىتۋ كۋرستارىنان 4 ەرەكشە قاجەتتىلىگى بار ازامات ءوتىپ، ءتيىستى سەرتيفيكاتتارىن العان. ال 2026 جىلى حالىقتىڭ الەۋمەتتىك وسال توپتارىنا ارنالعان 120 گرانت بەرۋ جوسپارلانىپ وتىر. ءار گرانتتىڭ مولشەرى 1 ميلليون 730 مىڭ تەڭگەنى قۇرايدى. گرانتتار جولدانىمدار مەن بيزنەس-جوبالار قابىلدانعاننان كەيىن ەكى كەزەڭ بويىنشا ارنايى كوميسسيا شەشىمىنە سايكەس بەرىلەتىن بولادى.
ۇلىتاۋ وبلىسىندا مۇگەدەكتىگى بار بارلىق ساناتتاعى ازاماتتاردى قولداۋ ماقساتىندا قوسىمشا الەۋمەتتىك شارالار دا قاراستىرىلعان. اتاپ ايتقاندا، جەزقازعان جانە ساتباەۆ قالالارىندا مۇگەدەكتىگى بار ادامدار، بالالار جانە ولاردى تاربيەلەپ وتىرعان اتا-انالار تەگىن جول ءجۇرۋ بيلەتتەرىمەن قامتاماسىز ەتىلۋدە.
جالپى، وڭىردە مۇگەدەكتىگى بار ازاماتتاردىڭ ءومىر ساپاسىن ارتتىرۋ، ولاردى الەۋمەتتىك تۇرعىدا قولداۋ، بەيىمدەۋ جانە جۇمىسپەن قامتۋ باعىتىنداعى جۇمىستار جۇيەلى تۇردە جالعاسىپ كەلەدى.
