"استانا ەكسپو-2017" ۇلتتىق كومپانياسىنىڭ بۇرىنعى باسشىسى تالعات ەرمەگياەۆ سوتتان ءوزىن قونىس كولونياسىنا اۋىستىرۋدى سۇرادى. بۇل تۋرالى الماتى وبلىستىق سوتىنىڭ Tengrinews.kz رەسمي ساۋالىنا بەرگەن جاۋابىندا ايتىلدى، دەپ حابارلايدى "ادىرنا" ۇلتتىق پورتالى.
قازىرگى ۋاقىتتا ەرمەگياەۆ قاپشاعاي ىرگەسىندەگى زارەچنىيداعى قاتاڭ رەجيمدەگى كولونيادا جازاسىن وتەپ جاتىر. ول 14 جىلدىق جازاسىنىڭ جارتىسىنا جۋىعىن قاتاڭ رەجيمدەگى مەكەمەلەردە وتەگەن. الايدا ەكى جىل بۇرىن "استانا ەكسپو-2017" كورمەسىنىڭ ەكس-توراعاسى جەڭىلىرەك رەجيمدەگى كولونياعا اۋىستىرۋدى سۇراعانى بەلگىلى بولدى.
"2018 جىلى شىلدەدە زاڭنامامىز وزگەردى. وسىعان بايلانىستى 2020 جىلى ەرمەگياەۆ وعان قاتىستى قىلمىستىق كودەكستىڭ 6-بابىن قولدانۋ تۋرالى، ياعني "سوتتالعان ادامنىڭ جاعدايىن جاقسارتاتىن، جازانى وتەۋدى جەڭىلدەتۋ تۋرالى" ءوتىنىشحات بەردى. ول جازاسىن وتەۋ ءۇشىن ەڭ تومەنگى قاۋىپسىزدىك مەكەمەسىنە جىبەرۋدى سۇرادى.
سول جىلدىڭ جەلتوقسانىندا قاپشاعاي قالالىق سوتى بۇل تالاپتى قاناعاتتاندىرۋدان باس تارتتى. 2021 جىلى سوتتالۋشىنىڭ ادۆوكاتتارىنان وسى سوت شەشىمىنە شاعىمدار كەلىپ تۇسكەن. كەيىنىرەك سول جىلدىڭ اقپانىندا الماتى وبلىستىق سوتى شاعىمدى قاناعاتتاندىرۋسىز قالدىردى", - دەدى سوت وكىلدەرى.
ەستەرىڭىزگە سالا كەتەيىك، 2016 جىلدىڭ جازىندا "استانا ەكسپو-2017" ۇلتتىق كومپانياسىنىڭ بۇرىنعى توراعاسى تالعات ەرمەگياەۆ اسا ءىرى كولەمدە پارا العانى جانە بوتەن مۇلىكتى ۇرلاعانى ءۇشىن كىنالى دەپ تانىلدى. سوت ونى قاتاڭ رەجيمدەگى كولونيادا 14 جىلعا باس بوستاندىعىنان ايىردى. سول كەزدە سوت ونىڭ بارلىق مۇلكىن تاركىلەۋگە قاۋلى ەتكەن ەدى.
"ادىرنا" ۇلتتىق پورتالى
