"Astana EKSPO-2017" ulttyq kompanııasynyń burynǵy basshysy Talǵat Ermegııaev sottan ózin qonys kolonııasyna aýystyrýdy surady. Bul týraly Almaty oblystyq sotynyń Tengrinews.kz resmı saýalyna bergen jaýabynda aıtyldy, dep habarlaıdy "Adyrna" ulttyq portaly.
Qazirgi ýaqytta Ermegııaev Qapshaǵaı irgesindegi Zarechnyıdaǵy qatań rejımdegi kolonııada jazasyn ótep jatyr. Ol 14 jyldyq jazasynyń jartysyna jýyǵyn qatań rejımdegi mekemelerde ótegen. Alaıda eki jyl buryn "Astana EKSPO-2017" kórmesiniń eks-tóraǵasy jeńilirek rejımdegi kolonııaǵa aýystyrýdy suraǵany belgili boldy.
"2018 jyly shildede zańnamamyz ózgerdi. Osyǵan baılanysty 2020 jyly Ermegııaev oǵan qatysty Qylmystyq kodekstiń 6-babyn qoldaný týraly, ıaǵnı "sottalǵan adamnyń jaǵdaıyn jaqsartatyn, jazany óteýdi jeńildetý týraly" ótinishhat berdi. Ol jazasyn óteý úshin eń tómengi qaýipsizdik mekemesine jiberýdi surady.
Sol jyldyń jeltoqsanynda Qapshaǵaı qalalyq soty bul talapty qanaǵattandyrýdan bas tartty. 2021 jyly sottalýshynyń advokattarynan osy sot sheshimine shaǵymdar kelip túsken. Keıinirek sol jyldyń aqpanynda Almaty oblystyq soty shaǵymdy qanaǵattandyrýsyz qaldyrdy", - dedi sot ókilderi.
Esterińizge sala keteıik, 2016 jyldyń jazynda "Astana EKSPO-2017" ulttyq kompanııasynyń burynǵy tóraǵasy Talǵat Ermegııaev asa iri kólemde para alǵany jáne bóten múlikti urlaǵany úshin kináli dep tanyldy. Sot ony qatań rejımdegi kolonııada 14 jylǵa bas bostandyǵynan aıyrdy. Sol kezde sot onyń barlyq múlkin tárkileýge qaýly etken edi.
"Adyrna" ulttyq portaly
