اتىراۋ وبلىسىندا 7-سىنىپ وقۋشىسى ساباق اراسىنداعى ءۇزىلىس كەزىندە سىنىپتاستارى تاراپىنان اياۋسىز سوققىعا جىعىلدى، دەپ حابارلايدى "ادىرنا" ۇلتتىق پورتالى.
زارداپ شەككەن وقۋشىنىڭ اناسىنىڭ ايتۋىنشا، بالاسى ۇزدىك وقيتىن، بەلسەندى جانە ءتارتىپتى بولعان. دەگەنمەن ونىڭ جاقسى باعالارى مەن بىلىمگە دەگەن ىنتاسى كەيبىر سىنىپتاستارىنىڭ قىزعانىشىن تۋدىرىپ، سوڭى جۇيەلى بۋللينگكە ۇلاسقان. جانتۇرشىگەرلىك جاعداي 15 مينۋتتىق ءۇزىلىس كەزىندە سىنىپتا، مۇعالىمدەر بولماعان ساتتە ورىن العان.
«باسىن پارتاعا ۇرىپ، ەسىكتى جاۋىپ الىپ، ۇرعان. ەشكىم ارا تۇسپەگەن. مۇنداي جاعداي بۇل مەكتەپتە بۇرىننان بار. بۋللينگكە قارسى ەشقانداي شارا قابىلدانبايدى. قورلىق پەن قورقىتۋ قالىپتى جاعدايعا اينالعان»، — دەيدى زارداپ شەككەن بالانىڭ اناسى.
ونىڭ ايتۋىنشا، بالاسىنا قول كوتەرگەن وقۋشى پوليتسيا قىزمەتكەرىنىڭ
بالاسى، ال اناسى سول مەكتەپتە قىزمەت اتقارادى. وسىعان بايلانىستى وتباسى ءىستىڭ ءادىل قارالماي قالۋىنان قاۋىپتەنىپ وتىر.
«ءبىز بۇل ءىستى جىلى جاۋىپ قويۋعا تىرىسادى دەپ قورقامىز. پوليتسيا جاراقاتتى ‘جەڭىل’ دەپ كورسەتىپ، تولىق سوت-مەديتسينالىق ساراپتاما ناتيجەسىن كۇتپەستەن ءىستى جابۋعا بەيىل تانىتىپ وتىر. بۇل — جاي عانا توبەلەس ەمەس، بۇل – ماقساتتى، سانالى تۇردە كورسەتىلگەن زورلىق»، — دەپ مالىمدەدى اناسى.
اتا-انالار بۇل وقيعانى مەكتەپتەگى جىلدار بويى جالعاسىپ كەلە جاتقان بۋللينگتىڭ شارىقتاۋ شەگى دەپ باعالايدى. ولار ءبىلىم مەكەمەسىنە تولىق تەكسەرۋ جۇرگىزىپ، وقۋشىلار اراسىنداعى زورلىق-زومبىلىقتىڭ الدىن الۋعا ارنالعان ناقتى ءارى جۇيەلى شارالار قابىلدانۋىن تالاپ ەتىپ وتىر.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز