«Шымбұлақ» тау шаңғы курорты Гиннестің рекордтар кітабына кірді. Бұл туралы ҚР Мәдениет және спорт министрі Асхат Оралов өзінің фейсбук парақшасында хабарлады, деп жазады "Адырна" ұлттық порталы.
"Кешегі күн Қазақстан футбол құрамасының Дания құрамасына қарсы ойындағы тарихи жеңісімен ғана емес, сонымен қатар жаңа әлемдік рекордпен де есте қалады. Шымбұлақ - әлемдегі түнгі ең биік тау шаңғысы курорты ретінде Гиннестің рекордтар кітабына енді. Бұл нәтиже Шымбұлақтың ең биік нүктесінде, теңіз деңгейінен 3200 метр биіктікте орналасқан «Талғар асуы» станциясында тіркелді. Дәл осы жерде салтанатты рәсім өтті. Мен іс-шараға жиналған мегаполис тұрғындары мен қонақтарының алдында сөз сөйледім. Ал Гиннестің рекордтар кітабының ресми судьясы Шейд Субаши трассаның барлық талаптарға сәйкестігін растай отырып, тарихи нәтижені тіркеді. Содан кейін Алматы тұрғындары мен қонақтары рекорд тіркелген тау баурайынан төменге жаппай сырғанап түсті. Шымбұлақ - жыл сайын миллиондаған қонақ келетін еліміздің басты туристік бағыттарының бірі. Бұл жердің біз барлық жағынан дамытқымыз келетін үлкен әлеуеті бар. Жаңадан тіркелген рекорд мәртебесі тау шаңғысы курортын әлемде теңдесі жоқ бірегей орынға айналдыратынына сенімдімін. Мен Алматы тұрғындары мен қазақстандықтарды осы жетістікпен құттықтаймын. Біздің елде көптеген тамаша орындар бар. Сол себепті мен алдағы уақытта жаңа рекордтардың куәсі болатынымызға сенемін",- деп жазды министр.
"Адырна" ұлттық порталы
