«شىمبۇلاق» تاۋ شاڭعى كۋرورتى گيننەستىڭ رەكوردتار كىتابىنا كىردى. بۇل تۋرالى قر مادەنيەت جانە سپورت ءمينيسترى اسحات ورالوۆ ءوزىنىڭ فەيسبۋك پاراقشاسىندا حابارلادى، دەپ جازادى "ادىرنا" ۇلتتىق پورتالى.
"كەشەگى كۇن قازاقستان فۋتبول قۇراماسىنىڭ دانيا قۇراماسىنا قارسى ويىنداعى تاريحي جەڭىسىمەن عانا ەمەس، سونىمەن قاتار جاڭا الەمدىك رەكوردپەن دە ەستە قالادى. شىمبۇلاق - الەمدەگى تۇنگى ەڭ بيىك تاۋ شاڭعىسى كۋرورتى رەتىندە گيننەستىڭ رەكوردتار كىتابىنا ەندى. بۇل ناتيجە شىمبۇلاقتىڭ ەڭ بيىك نۇكتەسىندە، تەڭىز دەڭگەيىنەن 3200 مەتر بيىكتىكتە ورنالاسقان «تالعار اسۋى» ستانتسياسىندا تىركەلدى. ءدال وسى جەردە سالتاناتتى ءراسىم ءوتتى. مەن ءىس-شاراعا جينالعان مەگاپوليس تۇرعىندارى مەن قوناقتارىنىڭ الدىندا ءسوز سويلەدىم. ال گيننەستىڭ رەكوردتار كىتابىنىڭ رەسمي سۋدياسى شەيد سۋباشي تراسسانىڭ بارلىق تالاپتارعا سايكەستىگىن راستاي وتىرىپ، تاريحي ناتيجەنى تىركەدى. سودان كەيىن الماتى تۇرعىندارى مەن قوناقتارى رەكورد تىركەلگەن تاۋ باۋرايىنان تومەنگە جاپپاي سىرعاناپ ءتۇستى. شىمبۇلاق - جىل سايىن ميلليونداعان قوناق كەلەتىن ەلىمىزدىڭ باستى تۋريستىك باعىتتارىنىڭ ءبىرى. بۇل جەردىڭ ءبىز بارلىق جاعىنان دامىتقىمىز كەلەتىن ۇلكەن الەۋەتى بار. جاڭادان تىركەلگەن رەكورد مارتەبەسى تاۋ شاڭعىسى كۋرورتىن الەمدە تەڭدەسى جوق بىرەگەي ورىنعا اينالدىراتىنىنا سەنىمدىمىن. مەن الماتى تۇرعىندارى مەن قازاقستاندىقتاردى وسى جەتىستىكپەن قۇتتىقتايمىن. ءبىزدىڭ ەلدە كوپتەگەن تاماشا ورىندار بار. سول سەبەپتى مەن الداعى ۋاقىتتا جاڭا رەكوردتاردىڭ كۋاسى بولاتىنىمىزعا سەنەمىن",- دەپ جازدى مينيستر.
"ادىرنا" ۇلتتىق پورتالى
