تۇركىستاندا ۇلتتىق قۇرىلتاي ءوتىپ جاتىر. مەملەكەت باسشىسى قۇرىلدايدىڭ ەل باسىنا قاتەر تونگەن كەزدە شاقىرىلاتىنىن ايتىپ، ەلىمىزدەگى قايعىلى وقيعانى ەسكە الدى، دەپ حابارلايدى "ادىرنا" ۇلتتىق پورتالى.
توقاەۆ قۇرىلتايدىڭ تاريحي تولعاقتاردا، قيىن-قىستاۋ كەزدە شاقىرىلاتىنىن ايتىپ، ارقانى كەڭگە سالاتىن كەز ەمەس ەكەنىن ەسكەرتتى.
«ءسوز باسىندا بىردەن اتاپ وتەيىن، مەنىڭشە، ۇلتتىق قۇرىلتاي بۇل – ارقانى كەڭگە سالىپ وتىراتىن جيىن ەمەس. ءسان-سالتاناتپەن وتكىزەتىن توي دا ەمەس. بابالارىمىز ماڭىزدى شەشىم قابىلدار كەزدە نەمەسە ەلگە قاتەر تونگەن سىن ساعاتتا قۇرىلتاي شاقىرعان، - دەدى قاسىم-جومارت توقاەۆ.
سونىمەن قاتار، پرەزيدەنت اباي وبلىسىنداعى الاپات ءورتتى ايتىپ، قايعىلى جاعدايدى ەسكە الدى.
- بۇگىنگى قۇرىلتايدىڭ وتىرىسى ەلىمىزدەگى قايعىلى وقيعادان كەيىن ءوتىپ جاتىر. اباي وبلىسىندا الاپات ءورت شىعىپ، ازاماتتارىمىز قازا تاپتى. تاعى دا قايتالاپ ايتقىم كەلەدى: ءبىز مۇنداي وقيعادان ساباق الۋىمىز كەرەك، ناقتى شەشىمدەر قابىلداۋىمىز قاجەت.
ەل باسىنا تۇسكەن قيىندىقتار، ەڭ الدىمەن، ءبىزدىڭ بەرەكە-بىرلىگىمىزدى سىنعا سالادى. وسىنداي كۇردەلى ساتتەر، ەڭ باستىسى – شىنايى جاناشىرلىق جانە تەرەڭ جاۋاپكەرشىلىك تانىتۋ قاجەت ەكەنىن ايقىن كورسەتەدى. مۇنى وزدەرىڭىز وتە جاقسى ءتۇسىنىپ وتىرسىزدار»، - دەدى پرەزيدەنت.
"ادىرنا" ۇلتتىق پورتالى
