Ақтөбеде 19 жасар студенттің денесі көпір астынан табылды, деп хабарлайды "Адырна" тілшісі ҚазАқпаратқа сілтеме жасап.
Осыдан бірнеше күн бұрын Ақтөбе қаласында 2004 жылы туған жігітке іздеу жарияланып, еріктілер хабарлама таратқан болатын. Студент 13-қыркүйек күні сағат 17:00 шамасында үйінен шығып кетіп, қайта оралмаған. Кейін студенттің денесі табылды.
«14-қыркүйек күні сағат 19:30-да Заречный ауылының қасындағы көпірдің астынан, «Юрта» мейрамханасының жанынан 19 жастағы жігіттің мәйіті табылды. Оқиға орнына жедел-тергеу тобы шықты. Қылмыстық кодекстің «Өзін-өзі өлтіруге дейін жеткізу» бабы бойынша сотқа дейінгі тергеу басталды. Себептері анықталып жатыр. Сараптама тағайындалды»,- деп хабарлады облыстық Полиция департаменті баспасөз қызметінің жетекшісі Ерболат Сарқұлов.
Қайтыс болған студент Қ.Жұбанов атындағы Ақтөбе өңірлік университетінде оқитыны белгілі болды.
«Жұбанов университеті дүниеден озған студенттің ата-анасына және жақындарына қайғырып көңіл айтады. Студенттің аты-жөні оның отбасына деген құрмет пен жеке деректерін сақтап қалу үшін жарияланбады. Ол жарқын жүзді, болашағынан үміт күттіретін студенттердің бірі еді. Сабақ үлгерімі жақсы, белсенді студенттердің қатарында болды. Бұл – бәріміз үшін де орны толмас қайғылы жағдай. Қалалық полиция департаментінде аталған жағдай бойынша тергеу іс-шаралары жүріп жатыр. Университет тарапынан білім алушының отбасына барынша қолдау көрсетіледі»,- деп хабарлады университеттің баспасөз қызметі.
