Шымкент қаласының қылмыстық соты Kausar travel туристік фирмасының директоры Медет Мұратбайұлына қатысты үкім шығарды, ол жүздеген қазақстандықтарды қажылыққа жолдама уәде етіп алдады, деп хабарлайды "Адырна" ұлттық порталы сот залынан ақпарат таратқан Orda.kz-ке сілтеме көрсете отырып.
Сот талқылауы барысында турфирма директоры өз кінәсін мойындаудан бас тартты. Оның айтуынша, бұл іске бұрынғы депутат Бекболат Тілеуханның қатысты бар.
"Мен кінәлі емеспін. Барлық ақшаны Бекболат Тілеуханға жібердік. Бірақ оған қатысты ештеңе айтылмайды. Мен барлық инстанциялар бойынша арыз жаздым", - деді сотталушы.
Тараптардың пікірлерін тыңдап, судья зардап шеккендердің материалдық шығынын қанағаттандырды, ол, шамамен, 250 млн теңгені болды. Сонымен қатар, процесс барысында туристік компания директорының өз компаниясын заңсыз ашқаны туралы дәлелдер келтірілді.
"Сот үкімімен сотталушы кінәлі деп танылып, 6 жылға бас бостандығынан айырылды. Ол жазасын орташа қауіпсіздік мекемесінде өтейтін болады", - деп үкімді судья Айнель Орақбаева оқыды.
Еске сала кетейік, жыл басында дүйім жұртты дүрліктірген «Кәусар тревел» туристік компаниясы жолаушыларды ойша қажылыққа аттандырып, өз ғимаратының алдында шыр көбелек айналдырып қойған еді. 500-600 мың теңгенің төңірегінде жолдама сатып, 300-ден астам адамның көңіліне күдік ұялатқан туристік компанияға қатысты тергеу жұмыстары басталғанын жазғанбыз.
Сонымен қатар, «Адырна» ұлттық порталы маусым айының жиырма жетісі күні қажылыққа аттанған 120 адамның құжатсыз қалдырып, қамауда отырғанын да хабарлаған еді. Олардың барлығы "ZamZam Qazaqstan" қажылық компаниясы арқылы үлкен қажылыққа тур сатып алған, алайда жалған визаға алданып, жат елде жанкештіге айналған болатын.
"Адырна" ұлттық порталы
