Мәжіліс отырысында депутат Қарақат Әбден елдегі гендерлік теңдік мәселесін көтерді, деп хабарлайды “Адырна” ұлттық порталы.
Ол әйелдер үшін билікте тең құқықтар болуын талап етті.
«Гендерлік саясатты іске асыру – еліміздегі өзекті бағыттардың бірі. Халқымыздың 51%-ы әйелдер қауымы екенін ескерсек, елдегі саяси өмірге де барлық азаматтың тең дәрежеде қатысуын қамтамасыз ету маңызды. Әрине, қазір мемлекеттік басқару ісінде, саясатта, бизнесте де әйелдер үлесі біршама артқанын мойындауымыз керек. Жаңартылған министрлер кабинетінің өзінде 4 әйел бар. Бұл – өткен жылдармен салыстырғанда жақсы көрсеткіш. Мемлекет басшысы гендерлік теңдікті қамтамасыз ету бойынша жұмысты жетілдіруге баса назар аударады. Бірақ әлі күнге дейін мемлекеттік компаниялардың басқарушы санатындағы әйелдердің үлесі небәрі 6-7%», - деді Қарақат Әбден депаттық сауал жолдай отырып.
Оның айтуынша, «Қазақстан Темір Жолы», «KEGOC», «Қазақтелеком» сынды ірі компаниялардың директорлар кеңесінде бірде-бір әйел жоқ.
«Кадрлар шоғырланған Астананада 5 аудан бойынша бір де бір әйел әкім немесе оның орынбарасы болып тағайындалмаған. «Халықтың 50%-дан астам үлесіне тең болып отырған әйелдер неге лауазымды қызметте 50%-ға жетпей отыр?» деген заңды сұрақ туындайды. Көп ойланудың қажеті жоқ. Гендерлік теңдікті қамтамасыз ету жолында біз 30%-ға жеткізіп, 50%-ға ұмтылуымыз керек», - дейді ол.
Депутат білімді әйелдердің үні мінбеден естілуі керегін айта кетті.
"Қазақстандық әйелдердің ел үшін маңызды шешімдерді қабылдауға білімі де, біліктілігі де жетеді. Ия, әйелдің ең ұлы миссиясы – ана, жар болу, саналы ұрпақ тәрбиелеу. Бірақ "Меңіреу әйелден меңіреу ұрпақ туады!" деген ғұлама Мәшһүр Жүсіптің сөзін ұмытпайық. Сондықтан тас керең болашаққа тас атпайық десек, Домалақ ананың көзіндей болған сауатты, саналы әйелдің бүгінгі үні мінбеден естілуі тиіс!", – деп қорытындылады Қарақат Әбден.
Сонымен қатар, ол Премьер-Министр Әлихан Смаиловқа мынадай ұсыныс білдірді.
- Әкімдердің қызметін бағалайтын рейтингке өңірдегі топ-менеджменттегі әйелдердің үлесін анықтайтын көрсеткіш қосылсын;
- Үкімет тарапынан әйелдердің саяси көшбасшылығын дамыту бойынша нақты бағдарламаларды даярлау қарастырылсын.
