Түркия президенті Режеп Тайып Ердоған палестина-израиль қақтығыс тараптарын мәселені әділ бейбітшілік орнату арқылы шешуге шақырды. Бұл туралы түрік басшысы Анкарада Австрия канцлері Карл Нехаммермен кездесуден кейін өткен баспасөз мәслихатында айтты, - деп хабарлайды "Адырна" тілшісі haqqin.az сайтына сілтеме жасап.
«Әділ әлемде жеңілгендер жоқ» ұранымен аймақтағы барлық күшті ойыншыларды бейбітшілік орнату жауапкершілігін алуға шақырамыз... Біз қантөгістің артуына әкелетін қадамдардан аулақ болуымыз керек», - деді Ердоған.
Түрік көшбасшысы Таяу Шығыс мәселесін шешу қажет екенін және «түпкілікті шешім - астанасы Шығыс Иерусалимде болатын тәуелсіз Палестина мемлекетін құру» деп көрсетті.
Оның айтуынша, Анкара аймақтағы қақтығыстың шиеленісіп, ұзаққа созылуынан қауіптенеді.
"Біздің бұл мәселеге қатысты алаңдаушылығымыз өте, өте жоғары. Мұның бәрі бір-екі аптаның ішінде аяқталатынына сенімді емеспін. Сондықтан біз жұмысты жалғастырамыз, басшылармен байланыс жасаймыз. Біз соғысты тоқтату үшін медиацияның шешімдерін іздейміз», - деді Түркия президенті.
Сондай-ақ Ердоған «болып жатқан жайтқа тек ХАМАС ислам партиясының көзқарасымен қарауға болмайды» деп атап өтті. Оның айтуынша, «олардың шығыны 750 адам, екі мыңнан астамы жараланған». «Израиль тарапынан шығын бар. Бұл мен бұрын алған деректер...», - деп қосты ол.
Түркия президенті сондай-ақ Американың ұшақ тасығышының Жерорта теңізінің шығысына жіберілуінің осы шешімнің мақсатына қатысты сұрақтар туғызатынын айтты.
"АҚШ-тың ұшақ тасығышы Израильде не істеп жүр? Неліктен ол жаққа барады? Ол өзінің барлық ұшақтарын, қайықтарын ұшырып, Газаны қоршап, оны соққыға жығып, өте ауыр жаппай өлімге жол ашады ма?" – деді ол брифингте.
Палестина-израиль қақтығыстарының шиеленісуі салдарынан қаза тапқан израильдік тұрғындардың саны мыңнан асты, деп хабарлады сейсенбі күні АҚШ-тағы Израиль елшілігі. Палестина денсаулық сақтау министрлігінің соңғы мәліметтері бойынша, Израильдің Газа секторына жасаған соққыларынан қаза тапқандар саны 900-ге жетті.
