10 قازان قازاقستان پرەمەر-ءمينيسترى ءاليحان سمايىلوۆتىڭ توراعالىعىمەن زاڭسىز يەمدەنىلگەن اكتيۆتەردى مەملەكەتكە قايتارۋ جونىندەگى كوميسسيانىڭ ءبىرىنشى وتىرىسى ءوتتى. بۇل تۋرالى ۇكىمەتتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
كوميسسيا مەملەكەت باسشىسىنىڭ تاپسىرماسىنا سايكەس جانە «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭدى ورىنداۋ ماقساتىندا قۇرىلعان.
ونىڭ قۇرامىنا ۇكىمەت مۇشەلەرى، قۇقىق قورعاۋ ورگاندارىنىڭ باسشىلارى، پارلامەنت دەپۋتاتتارى مەن قوعام قايراتكەرلەرى كىردى.
كوميسسيانىڭ نەگىزگى مىندەتتەرىنىڭ ءبىرى – جۇيەلى شارالاردى جۇزەگە اسىرۋ، زاڭسىز شىعارىلعان كاپيتالدى ەلگە قايتارۋدىڭ ادىستەرى مەن تەتىكتەرىن ازىرلەۋ. بۇل رەتتە بارلىق شەشىمدەر ەلىمىزدىڭ الەۋمەتتىك، ەكونوميكالىق جانە ساياسي مۇددەلەرىن ەسكەرە وتىرىپ، القالى تۇردە، اشىق جانە بەيتاراپ قابىلدانادى، - دەلىنگەن حابارلامادا.
وتىرىس بارىسىندا كوميسسيا مۇشەلەرىنىڭ نازارىنا زاڭدا كوزدەلگەن راسىمدەر شەڭبەرىندە اكتيۆتەردى مەملەكەتكە ءوز ەركىمەن جانە ءماجبۇرلى تۇردە قايتارۋعا دايىندىق تۋرالى اقپارات ۇسىنىلدى.
جاقىن ارادا كوميسسيانىڭ قاراۋىنا كوميتەتپەن ىنتىماقتاستىققا دايىن تۇلعالاردىڭ اكتيۆتەردى ءوز ەركىمەن قايتارۋى جونىندەگى ۇسىنىستار، سونداي-اق ءتىزىلىم ارقىلى ءارى قاراي زاڭدا كوزدەلگەن ءتۇرلى تالاپ قويۋ شارالارى كەشەنىن ىسكە اسىرا وتىرىپ، وزگە تۇلعالارعا قاتىستى ءماجبۇرلى تۇردە قايتارۋ جونىندە ۇسىنىستار شىعارىلاتىن بولادى، - دەلىنگەن حابارلامادا.
پرەمەر-مينيستر جۇمىستى ۆەدومستۆوارالىق تىعىز ىنتىماقتاستىق نەگىزدە جانە ارتىق بيۋروكراتياسىز شۇعىل ۇيىمداستىرۋدى تاپسىردى.
