قازاقستان قىتايدان 1 ميلليارد يۋاننان استام ينۆەستيتسيا تارتۋى مۇمكىن. بۇل شامامەن 70 ملرد 980 ملن تەڭگەگە تەڭ، دەپ حابارلايدى "ادىرنا" ۇلتتىق پورتالى
اقپاراتتى قر ۇكىمەتىنىڭ ءباسپاسوز قىزمەتى تاراتتى.
اتالعان ماسەلە استانادا وتكەن كەزدەسۋدە تالقىلاندى. پرەمەر-مينيستر ولجاس بەكتەنوۆ قىتايدىڭ ەڭ ءىرى قارجى ينستيتۋتتارىنىڭ ءبىرى — ICBC بانكىنىڭ توراعاسى ليۋ تسزيۋنمەن كەلىسسوز جۇرگىزدى.
ء“بىز ۇزاقمەرزىمدى جانە بەرىك سەرىكتەستىككە مۇددەلىمىز. ورتاق باستامالار مەملەكەتتەرىمىزگە دامۋ تۇرعىسىنان جاڭا مۇمكىندىكتەر اشادى”، – دەدى بەكتەنوۆ كەزدەسۋ بارىسىندا.
ۇكىمەت دەرەكتەرىنە سايكەس، قىتاي – قازاقستان ەكونوميكاسىنا ەڭ كوپ قارجى قۇيىپ وتىرعان بەس ەلدىڭ ءبىرى. قازىرگى تاڭدا قىتايدىڭ جالپى ينۆەستيتسيا كولەمى 26 ميلليارد دوللاردان استى.
“وتكەن جىلى ەكى ەل اراسىنداعى تاۋار اينالىمى 44 ميلليارد دوللاردى قۇراپ، رەكورد ورناتتى. بيىل بۇل كورسەتكىش ودان ءارى ءوسىپ كەلەدى”، – دەلىنگەن ۇكىمەت حابارلاماسىندا.
ICBC بانكى قازاقستاننىڭ ەكونوميكالىق جوبالارىن قارجىلاندىرۋعا قاتىسىپ كەلەدى. بيىل كوكتەمدە "بايتەرەك" حولدينگىمەن بىرلەسكەن جۇمىس ناتيجەسىندە "اگرارلىق نەسيە كورپوراتسياسى" 430 ميلليون يۋان العان بولاتىن.
كەلەسى كەزەڭ – 1 ميلليارد يۋاننان استام نەسيە قارجىسى ء"وندىرىستى دامىتۋ قورىنا" باعىتتالۋى مۇمكىن.
سونىمەن قاتار، قىتايدىڭ ىشكى قارجى نارىعىندا 5 ميلليارد يۋان (670 ملن دوللار) كولەمىندە وبليگاتسيا ورنالاستىرۋ مۇمكىندىگى قاراستىرىلۋدا.
