Өзбекстан үкіметі қоғамдық орындарда ниқаб тағатындарға айыппұл сала бастайтынын мәлімдеді. Айтуларынша, жаңа заң — елдегі діни экстремизмге қарсы ауқымды күрестің бір бөлігі. Тиісті жарлыққа Өзбекстан президенті қол қойды, деп хабарлайды «Адырна» тілшісі.
Әділет министрлігі заң қоғамдық қауіпсіздікті қорғау үшін қажет деген мәлімдеме жасады.
«Қоғамдық орындарда тұлғаны анықтауға мүмкіндік бермейтін дәрежеде бетін жауып жүру 3,3 миллионнан 4,95 миллион сумға дейін (126 мың теңгеден 189 мың теңгеге дейін — ред.) айыппұл салуға әкеп соғады»,—делінген хабарламада.
Елде заңды сынаушылар да бар. Олар бұндай шара діни сенім бостандығына нұқсан келтіреді дейді. Айтуларынша, ниқаб әйелдің жеке таңдауы және үкімет олардың діни сенімдеріне араласпауы керек.
Еске салайық, бұған дейін Өзбекстанда дүкеннің діни атауларын өзгертіп, арабша жазуларды алып тастау тапсырылғанын жазған едік.
