Қазақстанның Ұлттық банкі ұлттық валюта банкноттарының жаңа сериясын таныстырды. Ол «сақ стилінің» элементтеріне негізделген және көшпелілердің бірегей мәдениетінен қазіргі Қазақстанға дейінгі елдің мұрасын көрсетеді, - деп хабарлайды “Адырна” ұлттық порталы.
Банкноттардың жаңа сериясы шығарылған сайын айналымға түседі. Номиналы 5 мың теңгелік жаңартылған дизайндағы алғашқы банкнот ағымдағы жылдың соңына дейін қолжетімді болады.
“Халықаралық тәжірибеге сәйкес қауіпсіздіктің жақсартылған деңгейлерін енгізу және жалған ақша жасаудың алдын алу мақсатында банкноттардың дизайны кезең-кезеңімен жаңартылуда. Сондай-ақ еліміздің мәдени құндылықтары мен тарихын танымал ету маңызды элемент болып табылады”, деп атап өтті Ұлттық банк.
Жаңа банкноттарды Қазақстан Республикасының бүкіл аумағында номиналды құны бойынша төлемнің барлық түрлері бойынша, сондай-ақ банк шоттарына есептеу үшін және Қазақстан Республикасының барлық банктерінде аудару, өзгерту және айырбастау үшін қабылдау талап етіледі.
Ұлттық Банк ескі және жаңа үлгідегі банкноттардың параллель айналыс мерзімін 1 жылға белгілейді, қажет болған жағдайда ұзартылуы мүмкін.
Параллель айналыс кезеңі аяқталғаннан кейін барлық банктер мен «Қазпочта» АҚ ескі үлгідегі банкноттарды жаңа үлгідегі банкноттарға 3 жыл ішінде, Ұлттық банк филиалдары - мерзімсіз айырбастайды.
Еске сала кетейік, бүгін Қазақстанда ұлттық валюта және қаржыгерлер күні. Биыл теңгенің айналымға шыққанына 30 жыл толып отыр.