Ауа райының бұзылуынан Екібастұз жылу электр орталығында қазандықтар тоқтап қалды, деп хабарлайды "Адырна" тілшісі.
Қатты дауылдан түнде Екібастұз жылу электр орталығында қазандықтар тоқтап қалған.
"Кеше түнде соққан дауылды желдің салдарынан кей жерлерде 30 м/с-тан асатын Екібастұз ЖЭО кернеусіз қалды. ГРЭС-1-ден қуат алатын негізгі және резервтік қосалқы станциялардың тоқтап қалуына байланысты станцияны электрмен қамту үзілді. ЖЭО-ның негізгі жабдықтары электр энергиясы есебінен жұмыс істейтіндіктен, стансадағы қазандықтар мәжбүрлі түрде өшірілді", - делінген "Екібастұзтеплоэнерго" ЖШС хабарламасында.
Таңғы 5:15-те жылу электр орталығында электрмен жабдықтау қалпына келтірілген.
Ал Энергетика министрлігі сағат 12.00-дегі жағдай бойынша "№7 қазандық жұмыс істеп, №14 қазандық жануда, №11 және 15 қазандықтар жарықтандыруға дайындалып жатыр" деген хабарлама жолдады.
Дауылды ауа райы Павлодарлық тұрғындарды да әбігерге салған. 18-19 қараша аралығында Павлодар облысында ауа райының нашарлауына байланысты 100 елді мекенде электр энергиясы үзіліп, тұрғындар жарықсыз қалды.
Облыстық төтенше жағдайлар департаментінің мәліметінше, қазір олардың 60-ында ғана жарық қалпына келтірілсе, 40-ы жарықсыз.
